Report Dagiti Manangiwaragawag iti Pagarian
Ti Naragsak a Pamilia Iyadanina ti Dadduma iti Dios
PINARABURAN ni Jehova ni Jose iti naisangsangayan a sirib ken pannakaawat. (Aramid 7:10) Kas resultana, ti pannakaawat ni Jose “nakaay-ayo idi kadagiti mata ni Faraon.”—Genesis 41:37.
Kasta met ita, ipapaayan ni Jehova ti ilina iti nauneg a pannakaawat ken saririt babaen ti panagadalda iti Biblia. (2 Timoteo 3:16, 17) Mangpataud daytoy a sirib ken pannakaawat iti nasayaat a bunga no mayaplikar ti naibatay-Biblia a balakad. Masansan a dagiti nasayaat a konduktada ‘makaay-ayo kadagiti mata dagiti mangpalpaliiw iti dayta,’ kas ipakita dagiti sumaganad a kapadasan idiay Zimbabwe.
• Maysa a babai ti addaan kadagiti kaarruba a Saksi ni Jehova. Nupay dina magustuan dagiti Saksi, dayawenna ti konduktada, nangnangruna ti biagda kas pamilia. Napaliiwna a nagsayaat ti relasion ti agassawa ken natulnog dagiti annakda. Nadlawna pay nga ay-ayaten unay ti asawa a lalaki ni baketna.
Adda gagangay a pammati ti dadduma a kultura idiay Africa a no ay-ayaten ti lalaki ni baketna, sigurado nagusar ti asawa a babai iti mahika a “mangpaamo” ken lakayna. Isu nga inasitgan ti babai ti Saksi a babai ket dinamagna kenkuana: “Mabalin kadi nga ikkannak iti mahika nga inusarmo ken lakaymo tapno ayatennak met ni lakayko kas iti panagayat kenka ni lakaymo?” Simmungbat ti Saksi: “Wen, bay-am ta itedkonto kenka inton malem no bigat.”
Iti simmaruno nga aldaw, sinarungkaran ti kabsat a babai ti kaarrubana ket awitna ti ‘mahikana.’ Ania dayta? Ti Biblia, agraman ti publikasion a Pannakaammo a Mangiturong iti Biag nga Agnanayon. Kalpasan nga inusigda ti impormasion iti libro a Pannakaammo iti suheto a “Panangbangon iti Pamilia a Pakaidayawan ti Dios,” kinunana iti babai: “Isu daytoy ti ‘mahika’ nga us-usarenmi ken ni lakayko tapno ‘mapaamomi’ ti maysa ken maysa, ket dayta ti makagapu no apay a kasta unay ti panaginnayan-ayatmi.” Nairugi ti panagadal iti Biblia, ket napartak a rimmang-ay ti babai agingga nga insimbolona ti dedikasionna ken Jehova babaen ti pannakaitaneb.
• Dua a lawas a di nangasaba iti binalaybalay ti dua nga special pioneer a naidestino iti maysa a bassit a kongregasion iti makin-amianan a daya ti beddeng ti Zimbabwe ken Mozambique. Apay? Gapu ta dagiti tao ti immay kadakuada tapno agimdeng kadagiti ibagada. Insalaysay ti maysa kadagiti payunir no kasano a napasamak daytoy: “Sangapulo ket lima a kilometro ti pagnaenmi a mapan mangikondukta iti linawas a panagadal iti Biblia iti pagtaengan ti maysa nga interesado. Saan a nalaka kadakami ti mapan iti dayta a lugar. Masapul a lasatenmi dagiti kapitakan, ken ballasiwenmi ti adalem a karayan a pagattengnged. Masapul a susuonenmi dagiti kawes ken sapatosmi, ballasiwenmi ti karayan, sakami manen agsukat iti takdang.
“Natukay ti rikna dagiti kaarruba ti interesado iti regtami. Ti maysa kadagidiay nakapaliiw ket panguluen ti maysa a relihion iti dayta a lugar. Kinunana kadagiti pasurotna: ‘Diyo kadi kayat a tuladen ti kinaregta dagidiay dua nga agkabannuag a lallaki a Saksi ni Jehova?’ Iti simmaruno nga aldaw, adu kadagiti pasurotna ti immay iti pagtaenganmi tapno ammuenda no apay a nakapingpingetkami. Kanayonanna, iti simmaruno a dua a lawas, nakaad-adu ti bisitami nga uray la awanen ti tiempomi nga agluto iti kanenmi!”
Ti panguluen ti relihion ti maysa kadagidiay simmarungkar iti pagtaengan dagiti payunir kabayatan daytoy dua a lawas. Iladawanyo ti rag-o dagiti payunir idi immannugot a makipagadal iti Biblia!