Asidegen​—Ti Lubong nga Awan ti Leddaang

RUMIGAT a rumigat ti biag, ket adu ti pakaigapuan ti panagleddaang. No mapaaytayo, mabalin a narigattay a medmedan dagiti riknatayo. Kinapudnona, mabalin a mapukaw pay ketdi ti ragsak uray dagiti tattao a mangipatpateg iti biag! Usigenyo ti sumagmamano a pagarigan.

Idi un-una a panawen, kasta unay ti pannakaupay ni mammadto a Moises isu a naikunana iti Dios: “Dawatek kenka a patayennak ita imam, no natumpongak la ket ti kaasi iti saklangmo; ket dika koma ipalubos a makitak ti kinaay-ay-ayko.” (Numeros 11:15) Idi itartarayanna dagiti kabusorna, kinuna ni propeta Elias: “Umdasen; ita, O Jehova, alaemon ti biagko.” (1 Ar-ari 19:4) Ken kinuna ni propeta Jonas: “Ita ngarud, O Jehova, dawatek kenka nga ikkatem ti biagko, ta nasaysayaat kaniak ti ipapatay ngem ti panagbiag.” (Jonas 4:3) Ngem saan a nagpakamatay ti uray sino kada Moises, Elias, ken Jonas. Silalagipda amin iti bilin ti Dios: “Dika mamapatay.” (Exodo 20:13) Gapu iti nabileg a pammatida iti Dios, ammoda nga adda solusion ti amin a banag ken sagut a naggapu iti Dios ti biag.

Dagiti ngay parikut a sangsanguentayo ita? Malaksid kadagiti pakaburiboran ti panunot wenno pisikal nga an-annayen, mabalin a nasken nga anusantayo no dadduma ti naulpit a panangtrato dagiti kapamilia, kaarruba, wenno katrabahuantayo. Dakamaten ti Biblia dagiti tattao a napno “iti amin a kinakillo, kinadangkes, kinaagum, kinadakes, a napnoda iti apal, panangpapatay, ringgor, allilaw, makadangran a pagannayasan, a managarasaasda, manangpadpadakes, mananggura iti Dios, nakuspag, natangsit, napalangguad, manangpartuat kadagiti makadangran a bambanag, nasukir kadagiti nagannak, awanan pannakaawat, naulbod kadagiti tulagan, awanan ti nainkasigudan a panagayat, awanan asi.” (Roma 1:28-31) Kasla narigat ti agbiag gapu iti kasta a tattao nga inaldaw a makapulapoltayo. Kasanotay a matulongan dagidiay agkasapulan iti liwliwa ken bang-ar?

Sidadaan nga Umimdeng

Mabalin a mapukaw ti tao ti kinasimbeng ti panunotna gapu kadagiti pakariribukan ken pakarigatan. Kinuna ti masirib a tao: “Ti panaggamsaw pagmaagenna ti masirib a tao.” (Eclesiastes 7:7) Masapul ngarud a maipangag ti tao a mangdakdakamat iti panagpakamatay. Nalabit nasken a maasikaso a dagus dagiti problemana, dagita man ket emosional, pisikal, mental, wenno naespirituan. Siempre, nagduduma ti propesional a panangagas, ket adda iti tao nga agpili iti kita ti panangagas a kayatna.​—Galacia 6:5.

Aniaman ti pakaigapuan nga agpanggep ti maysa a tao nga agpakamatay, dakkel ti epektona no adda mannakaawat, mannakipagrikna, ken naanus a tao a pagpudnuanna. Makatulong dagiti kameng ti pamilia ken gagayyem a sidadaan a dumngeg. Malaksid iti pannakipagrikna ken kinamanangngaasi, dakkel ti maitulong dagiti makapabileg a kapanunotan manipud iti Sao ti Dios kadagidiay naawanan iti namnama.

Naespirituan a Saranay Agpaay iti Masnaayan

Mabalin a masdaawkayo a makaammo a makaparegta unay ti panagbasa iti Biblia. Nupay saan a libro maipapan iti panangsaluad iti panunot, matulongannatayo ti Biblia a mangipateg iti biag. Kinuna ni Ari Solomon: “Ammok nga awan ti aniaman a naim-imbag a maipaay kadakuada, ngem ti panagrag-o ken iti panagaramidda iti naimbag iti bayat ti panagbiagda. Ket kasta met a tunggal tao mangan koma ken uminum, ken agrag-o iti kinaimbag iti amin a pagbannoganna, isu a sagut ti Dios.” (Eclesiastes 3:12, 13) Malaksid iti makapnek a trabaho a mangted panggep iti panagbiag, mabalintayo a tagiragsaken dagiti simple a bambanag a sagut ti Dios kas iti presko nga angin, silnag ti init, sabsabong, kaykayo, ken tumatayab.

Ad-adda pay a makaliwliwa ti pammatalged ti Biblia a maseknan kadatayo ni Jehova a Dios ken ti Anakna a ni Jesu-Kristo. (Juan 3:16; 1 Pedro 5:6, 7) Maitutop ti kinuna ti salmista: “Bendito ti Apo, nga inaldaw-aldaw a mangawit iti awittayo, wen, ti Dios isu ti salakantayo.” (Salmo 68:19) Nupay iti panagkunatayo ket nagnumo ken awan ti pategtayo, iyaw-awis ti Dios nga umararawtayo kenkuana. Masiguradoyo a dina laksiden ti siasinoman a sipapakumbaba ken sipapasnek nga agpatulong kenkuana.

Ditay mainanama a maawan ti parikut iti agdama a biag. (Job 14:1) Kaskasdi, ti kinapudno iti Sao ti Dios impakitana kadagiti adu a tattao a saan a ti panagpakamatay ti umiso a solusion dagiti parikutda. Usigenyo laengen no kasano a tinulongan ni apostol Pablo ti nalpay nga agbambantay iti pagbaludan, “idi nariing iti pannaturogna ken idi makitana a silulukat dagiti ruangan ti pagbaludan, inasutna ti kampilanna ket papatayenna koman ti bagina, ta pagarupenna a nakalibas dagiti balud.” Dagdagus nga impagarup ti agbambantay iti pagbaludan a nasaysayaat ti agpakamatay ngem iti nakababain ken nalabit in-inut nga ipapatay gapu iti pannakaliwayna. Impukkaw ti apostol: “Dika saktan ta bagim, ta addakami amin ditoy!” Saan la a dayta ti imbaga ni Pablo. Kinapudnona, liniwliwada ken Silas ti agbambantay iti pagbaludan ket sinungbatanda ti saludsodna nga: “Appo, ania ti masapul nga aramidek tapno maisalakanak?” Insungbatda: “Mamatika ken Apo Jesus ket maisalakankanto sika ken ti sangakbbalayam.” Kalpasanna inlawlawagda kenkuana ken iti sangakabbalayanna ti sao ni Jehova ket kas banagna, “isu ken ti sangakabbalayanna nabautisaranda nga awanan panagtaktak.” Kasta unay ti ragsak ti agbambantay iti pagbaludan ken ti intero a sangakabbalayanna ket naaddaanda iti baro a panangmatmat iti biag.​—Aramid 16:27-35.

Anian a makapabang-ar ita a maammuan a saan a ti Dios ti pakaigapuan ti kinadakes! Ipabigbig ti Saona a ti dakes nga espiritu, “daydiay naawagan iti Diablo ken Satanas,” ti “mangyaw-awan iti intero a mapagnaedan a daga.” Ngem bassiten ti tiempona. (Apocalipsis 12:9, 12) Din agbayag, pukawento ti Dios ti amin a rigat nga inyeg ni Satanas ken dagiti demoniona kadagiti agnanaed ditoy daga. Kalpasanna, dagiti pakaigapuan ti kinaawan namnama ken panagpakamatay ket naan-anayto nga ikkaten ti nalinteg a baro a lubong nga inkari ti Dios.​—2 Pedro 3:13.

Liwliwa Para Kadagidiay Makasapul iti Tulong

Uray ita, makaliwliwa ti Kasuratan kadagiti malmaldaangan. (Roma 15:4) Inkanta ni salmista David: “Ti nadudog ken sibababawi, a puso, O Dios, saanmonto a laisen.” (Salmo 51:17) Pudno, ditay maliklikan ti sumagmamano a pakasuotan ken mariknatayo ti bunga ti kinaimperpekto. Ngem ti pananggun-od iti umiso a pannakaammo maipapan iti naasi, naayat, ken nainkalintegan a nailangitan nga Amatayo ipatalgedna kadatayo a napategtayo iti imatangna. Posible nga agbalin a kangrunaan a Gayyem ken Mannursurotayo ti Dios. No patanorentayo ti nasinged a relasion ken Jehova a Dios, dinatayto pulos paayen. Kuna ti Namarsua: “Siak ni Jehova a Diosmo, a mangisuro kenka a maipaay iti gunggonam, a mangiturong kenka iti dalan a papanam koma.”​—Isaias 48:17.

Nakatulong iti adu a tattao ti panagtalek iti Dios. Kas panangyilustrar: Nabayagen a malmaldaang ni Mara idi simmaruno a natay ti anakna a lalaki iti maysa nga aksidente ti lugan.a Kasta unay ti pannakaburiborna ket ginandatna ti agpakamatay. Ngem ita, nasapa nga agriing kada bigat tapno asikasuenna ti trabahona iti balay. Magusgustuanna ti agdengngeg iti musika ken tumulong iti sabsabali. Nailiwliwagna uray kaskasano ti ladingit nga inyeg ti nasaem nga ipapatay ti ing-ingungotenna nga anak ken napabileg ti pammatina iti Dios gapu iti namnama nga “addanto panagungar agpadpada dagiti nalinteg ken dagiti nakillo.” (Aramid 24:15) Gapu ta saan a pulos a tinarigagayan ni Mara ti agbalin a kasla maysa nga anghel idiay langit, natukay ti pusona kadagiti sasao ti Salmo 37:11: “Dagiti naemma tawidendanto ti daga, ket maay-ayatandanto iti kinaruay ti talna.”

Ni Sandra a taga Brazil inkagumaanna ti agbalin a nasayaat nga ina dagiti tallo nga annakna. Inadmitirna: “Okupadoak unay a diak man la napanunot ti agpatulong iti Dios babaen ti kararag idi saan a napakpakadaan a natay ni tatangko ken maigiddato iti dayta, natakuatak nga agbabbabai ni lakayko.” Iti napalalo a leddaangna, ginandat ni Sandra ti agpakamatay. Ania ti nangpakired iti nakemna? Ti panangipategna kadagiti naespirituan a banag. “Kada rabii sakbay a maturogak, basaek ti Biblia, ket panunotek a siak ti tao nga adda iti salaysay a basbasaek. Basaek met dagiti magasin a Pagwanawanan ken Agriingkayo!, ket magustuak la unay dagiti pakasaritaan ti biag agsipud ta matulongandak nga agbalin a kontento iti agdama a kasasaadko.” Gapu ta ammona a ni Jehova ti kasingedan a gayyemna, nasursurona ti agkararag nga espesipiko.

Masakbayan nga Awan ti Leddaang

Anian a makaliwliwa a maammuan a temporario ti panagsagaba ti tao! Iti sidong ti turay ti Pagarian ti Dios, agrag-onto dagiti ubbing ken nataengan a biktima ita ti krimen, kinaawan hustisia, ken panangidumduma. Kas iti naipadto iti maysa a salmo, ni Jesu-Kristo a dinutokan ni Jehova kas Ari “ispalennanto ti makasapul intono umkis, ken ti napanglaw nga awan mangarayat kenkuana.” Kanayonanna, “mangngaasinto kadagiti napanglaw ken makasapul, ket dagiti kararua dagiti makasapul isalakannanto.” Kinapudnona, “subbotennanto dagiti kararuada iti panangirurumen ken iti panangrabsut: ket napategto ti darada iti saklangna.”​—Salmo 72:12-14.

Asidegen a matungpal dagita a padto. Kayatyo kadi ti agbiag nga agnanayon iti sidong dagiti kasta a kasasaad? No wen, adda rasonyo nga agrag-o ken mangipateg iti biag kas sagut a naggapu iti Dios. Ket no iranudyo iti sabsabali dagita a makaliwliwa a Nainkasuratan a karkari, makaipaaykayo iti dakkel a ragsak iti biag dagidiay dumawdawat iti tulong iti tengnga daytoy awan pannakaseknan ken panagayatna a lubong.

[Footnote]

[Ladawan iti panid 6]

Adu dagiti gundaway a mangyeg ragsak ita

[Ladawan iti panid 7]

Segseggaanyo kadi ti lubong nga awan ti leddaang?