Narisgo a Panagbiag
“Aniaman a banag nga ar-aramidem iti inaldaw—agraman pannaturog—pagpeggadenna ti biagmo.”―Magasin a Discover.
TI BIAG ket nayarig iti pannagna iti lugar a nakaimulaan dagiti bomba, gapu ta mabalin a masugatan wenno matay ti maysa a tao iti aniaman nga oras, a masansan nga awan ti pakdaar. Nagduduma dagiti pakaigapuan ti risgo, depende iti pagilian. Karaman kadagitoy ti aksidente iti trapiko, gerra sibil, bisin, AIDS, kanser, sakit iti puso, ken adu pay a bambanag. Kas pagarigan, idiay abagatan ti Africa, nagbalinen a numero uno a mammapatay ti AIDS. Iti nabiit pay a tawen, “pinukawna ti 2.2 milion a biag, 10 a daras a nangatngato ngem iti pakabuklan a bilang dagiti pimmusay kadagiti amin a gerra sibil idiay Africa,” kuna ti U.S. News & World Report.
Kabayatanna, binilion a kuarta ti busbusbosen ti lubong iti panagreggetda a paatiddogen ti biag ken kissayan ti risgo ti panagsakit ken pannakabaldado. Mabalin a makagunggona ti resulta ti adu kadagiti singasingda, kas iti umiso a pannangan ken panaginum ken ti panagwatwat ti bagi. Nupay kasta, adda ti gubuayan ti mapagtalkan nga impormasion a mainaig iti tunggal napapateg nga aspeto ti panagbiag a makatulong kadakayo a mangtagiragsak iti nataltalged a biag. Dayta a gubuayan isu ti Biblia. Naglaon daytoy kadagiti giya a mainaig iti
panangasikaso kadagiti adu a pakaseknan a mangapektar iti salun-at ken pagimbagantayo. Siempre, saan a detalyado a tamingen ti Biblia ti tunggal parikut. Kaskasdi, mangipaay kadagiti nakasaysayaat a prinsipio a mangiwanwan kadatayo iti bambanag kas iti ugali iti pannangan, pisikal a salun-at, panagpampanunot, sekso, panaginum iti arak, tabako, dagiti makuna a mapaglinglingayan a droga, ken dadduma pay a banag.
Agsagaba met ti biag ti adu gapu iti pinansial a pakarigatan. Tumulong met ti Biblia iti daytoy a banag. Saanna laeng nga iparegta ti nainsiriban a panangmatmat iti kuarta ken ti panangsalimetmet iti kuarta, no di ket ilawlawagna met no kasano ti agbalin a nasaysayaat nga empleado ken amo. Maibagatayo a nasayaat a giya ti Biblia, saan laeng a maipaay iti pinansial a kinatalged ken pisikal a karadkad, no di ket maipaay iti biag a mismo. Kayatyo kadi a maammuan no kasano kapraktikal ti Biblia iti kaaldawantayo? Pangaasiyo ta itultuloyyo ngarud a basaen ti sumaganad nga artikulo.