No Kasano a ti Pannakabalo Inapektaranna ti Dua a Babbai

BALO ni Sandra nga agnanaed idiay Australia. Naklaat ni Sandra idi natay ti asawana sumagmamano a tawenen ti napalabas. “Nalapunosak idi mabigbigko a giddato a napukawko ti asawak ken kasingedan a gayyemko. Talaga a diak malagip no kasano a nakaawidak manipud ospital wenno no ania ti inaramidko iti natda nga oras dayta nga aldaw. Iti simmaganad a sumagmamano a lawas, dagiti panagamakko nagbalin a patinayon a panagpaut-ot iti pisikal.”

Adda in-inauna a gayyem ni Sandra, ni Elaine, a balo iti innem a tawenen. Tinaraken ni Elaine ti asawana, ni David, iti innem a bulan sakbay ti ipapatayna gapu iti kanser. Nakaro idi ti ladingitna ta uray la nagpasar iti temporario a panagbulsek di nagbayag kalpasan ti ipupusay ti asawana. Naglusdoy iti kaaduan dagiti tattao dua a tawen kalpasanna. Awan nakita ti doktorna a pagilasinan ti pisikal a sakit. Nupay kasta, naduktalanna a pengpengdan ni Elaine ti ladingitna, gapuna insingasingna nga agawid ket ikagumaanna ti agsangit. “Nabayag a pinarmekko ti ladingitko,” inamin ni Elaine, sana innayon a no malmaldaang, “uray la mapanak iti siled ket isuksokko ti ulok kadagiti kawes ni David.”

Wen, mangpataud iti nagduduma a reaksion ti ipupusay ti ingungoten nga asawa, ta saan laeng a basta panagbiag nga awanan asawa ti ramanen ti pannakabalo. Kas pagarigan, adda panawen a ti panagrikna ni Sandra ket napukawna ti kinataona. Kas iti adu a sabsabali a nabiit pay a nabalo, nariknana met nga agpegpeggad, di natalged. Kuna ni Sandra: “Tangay naruamak a ti asawak ti mangar-aramid idi iti pinal a pangngeddeng, kellaat nga agbukbukodakon a mangaramid kadagidiay a pangngeddeng. Matukay idi ti turogko. Nabannog ken napaksuyanak. Diak ammo ti aramidek.”

Iti intero a lubong inaldaw a maulit-ulit ti pasamak nga umasping iti kapadasan da Sandra ken Elaine. Ti sakit, aksidente, gubgubat, panangtalipupos iti puli, ken kinaranggas ti kaaduanna a makagapu iti umad-adu a bilang dagiti balo.a Adu kadagitoy a babbai ti siuulimek nga agsagsagaba, a dida ammo ti aramidenda. Ania ti maitulong dagiti gagayyem ken kakabagian kadagidiay mangsarsaranget iti pannakabalo? Adda sumagmamano a singasing ti sumaganad nga artikulo a mabalin a makatulong.

[Footnote]