“Umadanikayo iti Dios, ket Isu Umadaninto Kadakayo”

Sakbay ken Kalpasanna​—Napabileg nga Agbalbaliw

NI Sandra, maysa a babai idiay Mexico, minatmatanna ti bagina kas buong ti ulo iti pamiliana. Nadadael ti kinaagtutubona gapu iti pannakailaksid ken kaawan ti pammateg. Kunana: “Idi agtutuboak, diak pulos narikna nga adda serbi ti biagko ken adu ti salsaludsodko maipapan iti kaaddak ken maipapan iti biag.”

Idi haiskul ni Sandra, inumenna ti arak ni tatangna nga adda iti balayda. Idi agangay, gumatang iti bukodna nga arak ket nagbalin nga alkoholiko. “Awan ti ganasko nga agbiag,” binigbigna. Gapu ta desperado, nagdroga ni Sandra. “Ti laeng timmulong kaniak tapno malipatak ti parikutko,” kunana, “isu ti linaon ti bassit a bagko: nakabotelia nga arak, droga, wenno bassit a marihuana.”

Idi nalpas ni Sandra ti kurso a medisina, ad-adda a nagbalin nga alkoholiko. Pinadasna ti agpakamatay. Ngem nakalasat.

Napaay ti panangbirok ni Sandra iti naespirituan ken emosional a tulong kadagiti adu a nagduduma a relihion. Gapu ta desperado ken malmaldaangan, inulit-ulitna nga inyararaw iti Dios: “Sadino ti ayanmo? Apay a dinak tulongan?” Nakaro idin ti marikriknana a kinaawan-pateg idi makasao ti maysa kadagiti Saksi ni Jehova. Nangitunda dayta iti personal a panagadalna iti Biblia. Natukay ti rikna ni Sandra idi naammuanna a ni “Jehova asideg kadagidiay nadunor ti pusoda.”​—Salmo 34:18.

Babaen ti tulong ti mangyad-adal kenkuana iti Biblia, natarusan ni Sandra nga ammo ni Jehova a Dios a nakapuytayo gapu iti basol ken kinaimperpekto a natawidtayo ken ni Adan. Nabigbig ni Sandra a maawatan ti Dios a saantayo a naan-anay a matungpal dagiti nalinteg a pagalagadan. (Salmo 51:5; Roma 3:23; 5:12, 18) Naragsakan ni Sandra idi maammuanna a saan laeng a dagiti pagkapuyantayo ti kitkitaen ni Jehova, ken saanna a namnamaen ti nalablabes ngem iti kabaelantayo. Inyimtuod ti salmista: “No dagiti biddut koma ti siputam, O Jah, O Jehova, siasino ti makapagtakder?”​—Salmo 130:3.

Ti maysa a napateg a kinapudno iti Biblia a nanglapunos ken ni Sandra iti panagyaman isu ti daton a pangsubbot ni Jesu-Kristo. Babaen dayta, siaasi nga ipaayan ni Jehova dagiti natulnog a tattao iti nalinteg a takder iti laksid dagiti kinaimperpektoda. (1 Juan 2:2; 4:9, 10) Wen, mabalintayo a gun-oden ti “pannakapakawan dagiti labsingtayo” ket iti kasta, matulongantayo a mangiwaksi iti marikriknatayo a kinaawan ti pateg.​—Efeso 1:7.

Nasursuro ni Sandra dagiti napapateg a leksion manipud iti ulidan ni apostol Pablo. Inapresiarna unay ti kinaimbag ti Dios, a sipaparabur a nangpakawan kadagiti basol ni Pablo ken nangsuporta iti napinget a pannakidangadangna a mangparmek kadagiti agsublisubli a pagkapuyan. (Roma 7:15-25; 1 Corinto 15:9, 10) Inlinteg ni Pablo ti panagbiagna, a ‘dinisnogna ti bagina ket inadipenna’ tapno maitultuloyna ti wagas ti panagbiag nga anamongan ti Dios. (1 Corinto 9:27) Saanna nga impalubos a dagiti pagannayasan nga agbasol ti mangadipen kenkuana.

Adu ti pagkapuyan ni Sandra, ngem intultuloyna a sinaranget dagitoy. Sipapasnek nga inkararagna a tulongan ni Jehova tapno maparmekna dagitoy ken nagkiddaw iti asina. (Salmo 55:22; Santiago 4:8) Narikna ni Sandra ti personal nga interes kenkuana ti Dios, ket binalbaliwanna ti panagbiagna. “Maragsakanak a mangisursuro iti Biblia kadagiti sabsabali iti amin a tiempo,” kunana. Naaddaan ni Sandra iti gundaway a tumulong ken ni manangna ken iti adingna a babai a maam-ammo ni Jehova. Bayat nga ‘agar-aramid iti naimbag,’ boluntario met nga us-usarenna dagiti medikal a paglainganna kadagiti kombension dagiti Saksi ni Jehova.​—Galacia 6:10.

Komusta met ti pannakaadikto ni Sandra? Sikokompiansa a kinunana: “Nalimbong ti panunotko. Saanakon nga agin-inum iti arak, agsigarilio, wenno agdroga. Diak kasapulan dagita. Nabirokakon ti sapsapulek.”

[Blurb iti panid 9]

“Nabirokakon ti sapsapulek”

[Kahon iti panid 9]

Dagiti Epektibo a Prinsipio ti Biblia

Adtoy ti sumagmamano a prinsipio ti Biblia a nakatulong iti adu a makalapsut kadagiti mangtulaw a pannakaadikto:

“Dalusantayo koma ti bagbagitayo iti tunggal pakatulawan iti lasag ken iti espiritu, nga an-anayentayo ti kinasanto iti panagbuteng iti Dios.” (2 Corinto 7:1) Ti Dios bendisionanna dagidiay nangdalus iti bagbagida kadagiti pakatulawan, nga idianda dagiti narugit nga ar-aramid.

“Ti panagbuteng ken Jehova kaipapananna ti pananggura iti dakes.” (Proverbio 8:13) Ti nadayaw a panagbuteng iti Dios tulonganna ti maysa a tao a lumapsut kadagiti dakes nga aramid, agraman ti panagdroga. Malaksid a maay-ayona ni Jehova, ti nagbalbaliw a tao masalakniban met kadagiti nakaam-amak a sakit.

‘Agpasakup ken agtulnog kadagiti gobierno ken autoridad kas agtuturay.’ (Tito 3:1) Iti adu a lugar, panaglabsing iti linteg ti panagikut wenno panagusar iti droga. Dagiti pudno a Kristiano saanda nga agikut wenno agusar iti ilegal a droga.