Ti Tulbek iti Naragsak a Lubong

“TI MAYMAYSA a kabilgan a persona​—saan laeng a kadagitoy dua a milenio no di ket iti intero a pakasaritaan ti sangatauan​—ket ni Jesus a taga Nazaret,” kinuna ti magasin a Time. Idi adda ni Jesus ditoy daga, rinibu a nasingpet panagpuspusoda a tattao ti nangbigbig, saan laeng nga iti kinatan-okna, no di ket iti pannakaseknanna kadagiti sabsabali. Gapuna, saan a pagsiddaawan a tinarigagayanda a pagbalinen nga ari. (Juan 6:10, 14, 15) Nupay kasta, kas nadakamat iti immuna nga artikulo, nagtukiad ni Jesus a makinamin iti politika.

ADDA tallo a rason no apay a nagkedked ni Jesus: ti panangmatmat ni Amana iti panangaramid dagiti tattao iti kaykayatda, a pakairamanan ti panagturay ti tao; ti pannakaammo ni Jesus nga adda dagiti mannakabalin, nalimed a puersa nga agtigtignay a maibusor iti uray kasayaatan a panangikagumaan ti tao nga agturay; ken ti panggep ti Dios a mangipasdek iti nailangitan a gobierno a mangituray iti intero a daga. Bayat nga usigentayo a naimbag dagitoy tallo a banag, makitatayo no apay a napaay ti panangikagumaan ti sangatauan a mamagbalin iti lubong a nasaysayaat a pagnaedan. Maammuantayo met no kasano a matun-oy ti balligi.

Maiturayan Kadi Dagiti Tattao ti Bagbagida?

Idi pinarsua ti Dios ti tattao, inikkanna ida iti autoridad a mangituray kadagiti animal. (Genesis 1:26) Ngem ti Dios ti mangituray iti sangatauan. Ti panagpasakup ti immuna a lalaki ken babai iti Dios ket maipakita babaen ti situtulnog nga iyaadayoda iti bunga ti maysa a kayo, ti “kayo ti pannakaammo iti naimbag ken dakes.” (Genesis 2:17) Makapaladingit ta inabuso da Adan ken Eva ti wayawayada nga agpili ket nagsukirda iti Dios. Saan laeng a basta panagtakaw ti panangalada iti maiparit a bunga. Maysa dayta nga iyaalsa iti kinasoberano ti Dios. Ti footnote ti Genesis 2:17 iti The New Jerusalem Bible ibagana a tinarigagayan da Adan ken Eva ti “naan-anay a wayawaya a mangikeddeng no ania ti umiso ket iti kasta, ti tao dina bigbigen ti kasasaadna a kas maysa a parsua . . . Ti immuna a basol ket maysa nga ibubusor iti kinasoberano ti Dios.”

Gapu kadagiti nainaig a napapateg a moral nga isyu, pinalubosan ti Dios da Adan ken Eva ken dagiti kaputotanda a mangpili iti bukodda a wagas ti panagbiag ket impasdekda dagiti bukodda a pagalagadan iti naimbag ken dakes. (Salmo 147:19, 20; Roma 2:14) No pampanunoten, pinadas idin ti tao ti agbiag nga agbukbukod. Nagballigi kadi? No amirisentayo dagiti pasamak iti naglabas a rinibu a tawen, maibagatayo a saan! Kuna ti Eclesiastes 8:9: “Ti tao dinominaranna ti tao iti pakadangrananna.” Daytoy nakaay-ay-ay a panangituray dagiti tattao iti bagbagida patalgedanna a pudno ti kuna ti Jeremias 10:23: “Pagaammok unay, O Jehova, a saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.” Pinaneknekan ti historia a saan a makapagturay a sibaballigi dagiti tattao no awan ti Namarsua kadakuada.

Naan-anay nga inanamongan dayta ni Jesus. Makarimon kenkuana ti isisina iti Dios. “Awan ti aramidek iti bukodko a nakem,” kinunana. “Kankanayon nga aramidek ti bambanag a makaay-ayo [iti Dios].” (Juan 4:34; 8:28, 29) Gapuna, saan man la a pinanunot ni Jesus nga awaten ti kinaturay a nagtaud kadagiti tattao no awan ti pammalubos ti Dios. Ngem di kayat a sawen daytoy nga agkedked a tumulong iti padana a tao. Iti kasumbangirna, inaramidna ti amin a kabaelanna a tumulong kadagiti tattao a mangsapul iti kadakkelan a ragsak idi ken iti masanguanan. Intedna pay ketdi ti biagna para iti sangatauan. (Mateo 5:3-11; 7:24-27; Juan 3:16) Ngem ammo ni Jesus nga “iti tunggal banag adda naituding a tiempo,” agraman ti tiempo a panangituray ti Dios iti sangatauan. (Eclesiastes 3:1; Mateo 24:14, 21, 22, 36-39) Nupay kasta, laglagipenyo nga idiay Eden timmulok dagiti immuna a nagannak kadatayo iti pagayatan ti nadangkes nga espiritu a parsua a nagsao babaen ti serpiente. Iyegnatay daytoy iti maikadua a rason no apay nga inidian ni Jesus ti politika.

Ti Nalimed nga Agturay iti Lubong

Kunaen ti Biblia kadatayo nga intukon ni Satanas ken ni Jesus “dagiti amin a pagarian ti lubong ken ti dayagna” a kasukat ti maysa a tignay a panagdayaw. (Mateo 4:8-10) No an-anagen, naitukon ken Jesus ti panangiturayna iti lubong​—ngem adda kondision ti Diablo. Saan a timmulok ni Jesus iti daytoy a sulisog. Ngem talaga kadi a sulisog dayta? Maitukon kadi a talaga ni Satanas ti kasta a nagdakkelan a banag? Wen, agsipud ta ni Jesus a mismo inawaganna ti Diablo a “ti agturay iti lubong,” ken dineskribir ni apostol Pablo kas “ti dios daytoy a sistema ti bambanag.”​—Juan 14:30; 2 Corinto 4:4; Efeso 6:12.

Siempre, ammo ni Jesus nga awan pannakaseknan ti Diablo iti sangatauan. Inawaganna ni Satanas iti “mammapatay” ken “ulbod ken ama ti amin a kinaulbod.” (Juan 8:44, Naimbag a Damag Biblia) Nabatad, nikaanoman nga agbalin a pudno a naragsak ti lubong nga “adda iti pannakabalin” ti kasta a nadangkes nga espiritu. (1 Juan 5:19) Ngem saan nga agnanayon daytoy a pannakabalin ti Diablo. Din agbayag, kas maysa itan a mannakabalin nga espiritu a parsua, paksiatenton ni Jesus ni Satanas ken naan-anay nga ikkatenna ti impluensiana.​—Hebreo 2:14; Apocalipsis 20:1-3.

Ammo ni Satanas a mismo a mabilbilangen dagiti aldawna kas agturay iti lubong. Gapuna, sipipinget nga us-usarenna ti amin a pamay-an a mamagruker kadagiti tattao agingga nga awanen ti namnamada nga agbalbaliw, kas iti inaramidna sakbay ti Layus idi kaaldawan ni Noe. (Genesis 6:1-5; Judas 6) Kuna ti Apocalipsis 12:12: “Asi pay ti daga ken ti baybay, agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.” Ipakita ti padto ti Biblia ken dagiti pasamak iti lubong nga agbibiagtayon iti arinunos daytoy ‘ababa a periodo ti tiempo.’ (2 Timoteo 3:1-5) Asidegen a mabang-arantayo.

Maysa a Gobierno a Mangyeg iti Kinaragsak

Ti maikatlo a rason no apay nga inidian ni Jesus ti politika ket gapu ta ammona nga iti naituding a tiempo iti masanguanan, ipasdek ti Dios ti maysa a nailangitan a gobierno a mangituray iti intero a daga. Daytoy a gobierno ket inawagan ti Biblia a Pagarian ti Dios, ket daytoy ti kangrunaan nga insuro ni Jesus. (Lucas 4:43; Apocalipsis 11:15) Insuro ni Jesus dagiti adalanna nga ikararagda ti iyaay dayta a Pagarian, agsipud ta sa la ‘maaramid ti pagayatan ti Dios ditoy daga a kas sadi langit’ inton agturay dayta. (Mateo 6:9, 10) Nalabit nga isaludsodyo, ‘No iturayan daytoy a Pagarian ti intero a daga, anianto ti mapasamak kadagiti gobierno ti tao?’

Masarakan ti sungbat iti Daniel 2:44: “Iti kaaldawan dagidiay nga ar-ari [nga agturturay iti panungpalan ti agdama a sistema] mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy [impasdek ti tao] a pagarian, ket dayta agtalinaedto agingga kadagiti tiempo a di nakedngan.” Apay a masapul a ‘rumeken’ ti Pagarian ti Dios dagiti turay ditoy daga? Agsipud ta ipilpilit dagitoy a taginayonen ti panagbiag nga agbukbukod a maibusor iti Dios, nga insungsong ni Satanas idiay minuyongan ti Eden. Malaksid a laplapdanda ti kasayaatan para iti sangatauan, dagidiay mangikagkagumaan a mangtaginayon iti dayta nga espiritu pagbalinenda ti bagbagida a kabusor ti Namarsua. (Salmo 2:6-12; Apocalipsis 16:14, 16) Gapuna, masapul nga isaludsodtay iti bagbagitayo, ‘Dumasdasigtayo kadi wenno bumusbusor iti turay ti Dios?’

Makinturay ti Pilienyo?

Tapno matulongan dagiti tattao a maaddaan iti umiso a pangngeddeng maipapan iti panagturay, binilin ni Jesus dagiti adalanna nga ikasabada ti “naimbag a damag ti pagarian . . . iti intero a mapagnaedan a daga maipaay a pangsaksi kadagiti amin a nasion” sakbay nga umay ti panungpalan ti agdama a sistema. (Mateo 24:14) Siasino ita dagiti agdindinamag iti sangalubongan a mangikaskasaba iti Pagarian ti Dios? Dagiti Saksi ni Jehova. Kinapudnona, nabayagen nga adda iti parupa daytoy a magasin dagiti sasao a “Mangibumbunannag iti Pagarian ni Jehova.” Agarup innem a milionen a Saksi iti nasurok a 230 a pagilian ti tumultulong kadagiti tattao a gumun-od iti umiso a pannakaammo maipapan iti dayta a Pagarian.a

Dagiti Bendision Para Kadagiti Iturayan ti Pagarian

Kanayon a nagtignay ni Jesus sigun iti wagas ti Dios. Gapuna, imbes nga aramidenna ti kaykayatna ken padasenna a suportaran ken pasayaaten ti adda idi a sistema dagiti bambanag babaen ti napolitikaan a pamay-an, inggaedna nga intandudo dagiti banag a mainaig iti Pagarian ti Dios​—ti kakaisuna a solusion dagiti parikut iti lubong. Gapu iti kinasungdona, nagunggonaan iti nadayag a trono idiay langit kas ti mismo nga Ari iti dayta a Pagarian. Anian a nagsayaat a gunggona gapu iti panagpasakupna iti Dios!​—Daniel 7:13, 14.

Adda nagsayaat a gunggona a tagiragsaken dagiti minilion ita a tumultulad ken Jesus iti panangyun-una iti Pagarian ken iti panagpasakup iti pagayatan ti Dios​—ti pribilehio nga agbalin nga iturayan ti Pagarian ti Dios ditoy daga. (Mateo 6:33) Iti sidong ti naayat a panangiturayna, agin-inutto nga agbalinda a perpekto, nga addaanda iti namnama nga agbiag nga agnanayon. (Apocalipsis 21:3, 4) Kuna ti 1 Juan 2:17: “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.” Yantangay awanton ni Satanas ken dagiti pasurotna ken mapagbalinto ti daga a maysa a sangalubongan a paraiso nga awan ti mamagsisina a nasionalismo, rinuker a sistema iti komersio, ken ulbod a relihion, anian a makaparagsakto unay ti agtalinaed nga agnanayon ditoy daga!​—Salmo 37:29; 72:16.

Wen, ti Pagarian ti Dios ti napaypayso a tulbek iti pudno a naragsak a lubong, ket maitutop a maawagan a naimbag a damag ti mensahe a mangipakpakaammo iti dayta. No saanyo pay nga inaramid, apay a dikay umimdeng iti daytoy a naimbag a damag nga idanon dagiti Saksi ni Jehova iti sumaganad nga isasarungkarda iti pagtaenganyo?

[Footnote]

[Dagiti Ladawan iti panid 5]

Paneknekan ti historia a saan a makapagturay ti tao a sibaballigi no awan ti Dios

[Ladawan iti panid 5]

Yantangay iturturayanna ti agdama a “sistema ti bambanag,” maitukon ni Satanas ken Jesus “dagiti amin a pagarian ti lubong”

[Dagiti Ladawan iti panid 7]

Insuro ni Jesus nga agbalinto ti lubong a nagsayaat a lugar iti sidong ti Pagarian ti Dios