Report Dagiti Manangiwaragawag iti Pagarian
“Biddut ti Inawagam a Numero”
IDIAY Johannesburg, South Africa, nagsinnublat da Leslie ken Caroline a nangasaba babaen ti telepono. Inawaganda dagiti tattao nga agnanaed iti maysa a mabambantayan a purok dagiti retirado. Manmano dagiti sumungbat ken bassit dagiti interesado iti Nakristianuan a mensaheda, isu a naragsakan ni Caroline idi adda simmungbat a babai.
“Dakayo kadi ni Mrs. B—?” insaludsod ni Caroline.
“Ay, saan,” kuna ti nainggayyeman a timek, “Siak ni Mrs. G—. Biddut ti inawagam a numero.”
Idi nadlawna ti kinabara ti timekna, kinuna ni Caroline: “Bueno, palubosandak a mangilawlawag iti kayatko nga ibaga ken ni Mrs. B—.” Sana inlawlawag ti maipapan kadagiti bendision nga iyeg ti um-umayen a Pagarian ti Dios. Kalpasan a napagnumuan ti pannakaitulod ti broshur nga Ania ti Kalikaguman ti Dios Kadatayo?, insaludsod ni Mrs. G: “Wen gayam, ania ti relihionmo?”
“Saksi kami ni Jehova,” insungbat ni Caroline.
“Ay, saan, diak kayat dayta a relihion! Saanka a kayat a makita.”
“Ngem Mrs. G—,” impakaasi ni Caroline, “iti naglabas a 20 a minuto, inranudko ti kasayaatan a namnama kadakayo, nga inlawlawagko manipud iti Biblia no ania ti mabiiten nga aramiden ti Pagarian ti Dios para iti sangatauan. Naragsakankayo unay a dimngeg kadagitoy a banag—magagarankayo pay ketdi—ket kayatyo a maammuan ti ad-adu pay. Ania kadi a talaga ti ammoyo maipapan kadagiti Saksi ni Jehova? No masakitkayo, mapankayo kadi iti maysa a mekaniko? Ipalubosyo koma a siak ti mangilawlawag no ania ti patpatien dagiti Saksi ni Jehova?”
Kalpasan ti apagkanito a panagulimekna, simmungbat: “Panagkunak hustoka. Nasaysayaat no umayka. Ngem laglagipem, dinakto pulos makomberte!”
“Mrs. G—, pulos a saankayo a makomberte uray no kayatko koma,” insungbat ni Caroline. “Ni laeng Jehova ti makaaramid iti dayta.”
Nasayaat ti nagbanagan ti panangitulod iti broshur, ket immanamong ni Mrs. G—(Betty) a masarungkaran. Idi nagsubli ni Caroline, kinuna ni Betty nga imbagana kadagiti kalamisaanna a babbaket ti pannakisarsaritana kadagiti Saksi ni Jehova. “Apay nga inaramidmo dayta?” insaludsodda, a kayatda a pasardengen. “Dagita a tattao dida pay ketdi mamati ken Jesus!”
Dagus nga impalagip ni Caroline ken ni Betty ti kangrunaan a punto iti naudi a panagsaritada maipapan iti Pagarian ti Dios.
“Siasinonto ti agbalin nga Ari?” insaludsod ni Caroline.
“Ni Jesus, siempre,” insungbat ni Betty.
“Wen,” kinuna ni Caroline. Sana inlawlawag a mamati dagiti Saksi ni Jehova a ni Jesus ket Anak ti Dios, ngem saan a pumada iti Dios kas paset ti Trinidad.—Marcos 13:32; Lucas 22:42; Juan 14:28.
Kalpasan ti sumagmamano a panagbisita, nadlawna a masakit ni Betty nupay optimistiko ken naragsak. Kinapudnona, adda kanserna ket mabuteng a matay. “Tarigagayak nga idi pay la koma a naammuak dagitoy a banag ket namatiak a kas kadakayo,” impudnona. Liniwliwa ni Caroline babaen ti panangipakitana kadagiti kasuratan a mangiladawan iti ipapatay kas nasimbeng a pannaturog ket mabalin ti maysa ti bumangon inton panagungar. (Juan 11:11, 25) Dayta ti nangparegta unay ken ni Betty, nga ita ket regular nga agad-adal iti Biblia. Ngem ti kumapkapuy a salun-atna ti manglaplapped kenkuana a makigimong iti Kingdom Hall.
Kinuna ni Caroline: “Ammok nga iturturong dagiti anghel daytoy a trabaho. Ti numero ti telepono ni Betty ket ‘di ingagara a naawagak,’ ken panunotenyo, isu ket agtawen iti 89!”—Apocalipsis 14:6.