Nasarakak ti Pannakapnek iti Panagserbi iti Dios
KAS INSALAYSAY NI JOSHUA THONGOANA
Idi 1942, mariroak unay. Agad-adalak idi kadagiti literatura nga impablaak dagiti Seventh-Day Adventists ken literatura nga impablaak ti Watch Tower Society. Kas kadagiti Israelita idi ugma, “agalla-alla[ak] iti dua a panunot.”—1 Ar-ari 18:21.
PATPATULODANDAK idi dagiti Seventh-Day Adventists kadagiti leksion a naawagan “Voice of Prophecy” (Timek ti Padto). Kaay-ayok a sungbatan dagiti saludsodda, ket inkarida nga ikkandak ti napintas a sertipiko no maipasak ti amin nga eksaminko. Ngem nadlawko a pareho a manipud iti siudad ti Cape Town iti Sud Africa a maibusbuson ti “Voice of Prophecy” ken dagiti publikasion ti Watch Tower Society. Pinampanunotko: ‘Agam-ammo ngata dagitoy nga organisasion? Agtunos ngata dagiti sursuroda? No saan, siasino ti umiso?’
Tapno marisut daytoy a banag, nangipatulodak iti agpada a surat iti tunggal organisasion. Kas pangarigan, nagsuratak iti Watch Tower Society: “Am-ammoyo kadi dagiti tattao a nainaig iti ‘Voice of Prophecy,’ ket no am-ammoyo, aniat’ makunayo maipapan kadagiti sursuroda?” Idi agangay, naawatko dagiti sungbat manipud kadagitoy dua a grupo. Kinuna ti surat a naggapu iti Watch Tower Society nga adda ammoda maipapan iti “Voice of Prophecy” ngem inlawlawagda a dagiti sursurona, kas ti Trinidad ken ti panagsubli ni Kristo ditoy daga iti lasag, ket saan a nainkasuratan. Nairaman iti suratda dagiti kasuratan a mangpaneknek nga ulbod dagitoy a doktrina.—Juan 14:19, 28.
Ti sungbat manipud iti “Voice of Prophecy” basta kinunana laeng nga am-ammoda “dagiti tattao ti Watch Tower,” ngem saanda nga anamongan dagiti sursuroda. Awan intedda a rason. Isu a nagdesisionak iti pabor ti Watch Tower Society, ti legal nga ahensia nga us-usaren dagiti Saksi ni Jehova. Ita, kalpasan ti 50 a tawen a pannakaitimpuyogko kadagiti Saksi, maragsakanak unay ta umiso ti inaramidko a desision!
Narelihiusuan a Nalikudan
Nayanakak idi 1912 iti maysa nga away a maawagan Makanye, a dayaen ti ili ti Pietersburg iti Sud Africa. No maipapan iti relihion, kontrolado idi ti Iglesia Anglicana ti Makanye, isu a nagbalinak a kameng dayta nga iglesia. Idi agtawenak iti sangapulo, immakar ti pamiliami iti lugar a dominado ti Lutheran Berlin Mission Church, ket nagbalin dagiti dadakkelko a miembro dayta nga iglesia. Iti saan a nabayag mabalinkon ti agkomunion ken makiraman iti sangkapisi a tinapay ken sangkatilmon nga arak, ngem saanna a pinennek dagiti naespirituan a kasapulak.
Kalpasan ti walo a tawen a panageskuelak, pinagadalnak ni tatang idiay Kilnerton Training Institution, ket idi 1935, inawatko ti Third Year Teacher’s Certificate. Katrabahuak ti maysa a nalasbang a balasang a ni Caroline. Nagkasarkami, ket iti saan a nabayag nagpasngay ni Caroline iti babai a pinanagananmi iti Damaris. Kalpasan ti sumagmamano a tawen, nagbalinak a prinsipal ti Sehlale School iti away ti Mamatsha. Yantangay ti Dutch Reformed Church ti mangipatpataray iti eskuelaan, nagbalinkami a kameng dayta nga iglesia, a regular a pakikulkultuanmi. Inaramidmi daytoy agsipud ta dayta ti namnamaenda kadakami, ngem saannak nga inikkan iti pannakapnek.
Dakkel a Panagbalbaliw
Iti maysa a Domingo idi 1942, madama nga agsansanaykami kadagiti himno idiay simbaan idi nagparang iti ruangan ti maysa nga agkabanuag a pamudawen a lalaki a nakaiggem iti tallo a libro nga impablaak ti Watch Tower Society—Creation, Vindication, ken Preparation. Napanunotko a napintas la ketdi ti buya dagitoy a libro no maikabil iti estante ti librok, isu nga innalak dagitoy iti tallo a shilling. Idi agangay, naammuak a ti lalaki, ni Tienie Bezuidenhout, ket maysa kadagiti Saksi ni Jehova, ti kakaisuna iti lugarmi. Iti simmaruno nga isasarungkar ni Tienie, nangitugot iti ponograpo sana impangngeg dagiti sumagmamano a palawag ni Judge Rutherford. Nagustuak unay daydiay palawag nga “Snare and Racket,” (Silo ken Panaggamsaw) ngem saan a naragsakan ni Caroline ken ti adiek a babai a ni Priscilla, a makipagnanaed kadakami idi. Iti maikatlo nga isasarungkar ni Tienie, intedna kaniak ti ponograpo tapno maipangngegko dagiti rekord kadagiti gagayyemko.
Maysa nga aldaw inukagko dagiti binulong ti libro a Creation ket naisagudak iti kapitulo a “Sadino ti Ayan Dagiti Natay?” Inrugik ti nagbasa a ninamnamak ti makaadal maipapan kadagiti nararagsak a kapadasan dagiti pimmusay a kararua idiay langit. Ngem maisupadi iti ninamnamak, kinuna ti libro a dagiti natay addada kadagiti tanemda ken awan pulos ammoda. Naadaw dagiti teksto ti Biblia, kas ti Eclesiastes 9:5, 10, kas pammaneknek. Napauluan ti sabali pay a kapitulo iti “Panangriing Kadagiti Natay,” ket naisitar ti Juan 5:28, 29 kas pammaneknek nga awan puot dagiti natay no di ket agur-urayda iti panagungar. Rasonable ken makapnek daytoy.
Iti daydi a tiempo, idi 1942, nga insardengkon ti nagbasbasa iti “Voice of Prophecy” ket inrugik nga inranud kadagiti dadduma dagiti maad-adalko kadagiti publikasion ti Watch Tower Society. Maysa kadagiti immuna a nangipangag isu ni Judah Letsoalo a pagayamko ken kaklasek idiay Kilnerton Training Institution.
Dinaliasatmi ken Judah ti 51 a kilometro babaen ti bisikleta tapno dumar-aykami iti maysa nga asamblea dagiti Saksi nga Africano idiay Pietersburg. Kalpasanna, masansan nga umay idiay Mamatsha dagiti gagayyemko idiay Pietersburg tapno tulongandak a mangiparang ti mensahe ti Pagarian kadagiti kaarrubak. Idi agangay, iti maysa manen nga asamblea idiay Pietersburg, idi Disiembre 1944, nagpabautisarak kas simbolo ti dedikasionko ken Jehova.
Mangipangag ti Pamiliak ken Dagiti Sabsabali
Intultuloy da Caroline, Priscilla, ken ni balasangko a Damaris ti pannakitimpuyogda iti Dutch Reformed Church. Kalpasanna dimteng ti didigra. Impasngay ni Caroline ti maikadua nga anakmi—maysa a kasla nasalun-at a maladaga a lalaki a pinanagananmi iti Samuel. Ngem nagsakit a di napakadaan ket natay. Awan naipaay a liwliwa dagiti kapammatian ni Caroline, a kunkunada nga innala ti Dios ti anakmi idiay langit. Gapu iti nalaus a lidayna, di maliklikan ni Caroline ti agsaludsod: “Apay nga innala ti Dios ti anakmi?”
Idi nadamag dagiti Saksi idiay Pietersburg ti didigra a dimteng kadakami, immayda ket inikkandakami iti pudpudno a liwliwa a naibatay iti Sao ti Dios. Kinuna ni Caroline idi agangay: “Ti kinuna ti Biblia maipapan iti makagapu iti ipapatay, maipapan iti kasasaad dagiti natay, ken maipapan iti inanama iti panagungar ket rasonable, ket naliwliwaak iti kasta unay. Kayatko nga addaakto iti baro a lubong iti kasta maabrasakto ti anakko manipud iti tanem.”
Naglusulos ni Caroline iti simbaan, ket idi 1946, kaduana da Priscilla ken Judah a nagpabautisar. Di nagbayag kalpasan ti pannakabautisarna, pimmanaw ni Judah tapno irusatna ti trabaho a panangasaba iti maysa nga away a maawagan Mamahlola, ket agserserbi pay laeng kas amin-tiempo a payunir a ministro agpapan ita.
Idi pimmanaw ni Judah, siak laeng ti lalaki a nabati a mangaywan iti kongregasionmi, a napanaganan iti Boyne. Kalpasanna immakar ni Gracely Mahlatji iti teritoriami, ket idi agangay inasawana ni Priscilla. Linawas nga agsinnublatkami ken Gracely a mangipaay kadagiti palawag publiko iti Sepedi, ti lokal a pagsasao ti Africa. Tapno mabasa dagiti tao dagiti literatura ti Biblia, kiniddaw kaniak ti Sosiedad nga ipatarus dagiti literatura iti Sepedi. Nalaus ti ragsakko a makakita kadagiti tattao a magunggonaan manipud kadagitoy a literatura.
Tapno sumayaat ti kampaniami a panagpalawag iti publiko, gimmatangkami iti maysa a ponograpo nga addaan iti dakkel a loudspeaker tapno maipangngeg dagiti palawag iti Biblia iti intero a teritoriami. Bimmulodkami iti maysa a karison a guyguyoden dagiti asno a pangilugananmi iti daytoy nadagsen nga aruaten iti sadinoman a papananmi. Gapuna, binirngasandakami dagiti kaarrubami iti “Tattao ti Simbaan a Guyguyoden ti Asno.”
Kabayatanna nagtultuloy a dimmakkel ti bassit a kongregasionmi. Idi agangay, nagbalin a Saksi ti dua a manangko ken dagiti assawada ket nagtalinaedda amin a matalek agingga iti ipapatayda. Kasta met, adu kadagiti kakabsat iti kongregasion ti Boyne (maawagan itan iti Mphogodiba) ti simrek iti amin-tiempo a trabaho a panagebanghelio, ket aduda pay laeng agingga ita. Itatta, addan dua a kongregasion iti daytoy naglawaan a lugar a nakaiwarasan dagiti purok, ket nasurok a 70 amin nga agibumbunannag ti aktibo iti trabaho a panangasaba.
Baro a Karera
Idi 1949, insardengko ti nangisuro idiay eskuelaan ket nagbalinak a regular payunir a ministro. Ti umuna a trabahok isu ti isasarungkar kadagiti nangisit a mannalon nga agnanaed kadagiti talon a kukua dagiti puraw idiay Vaalwater sadi Transvaal. Kinanunongan dagiti dadduma nga akinkukua kadagiti talon ti kaad-adaptar a sistema nga apartheid ket impatangkenda a rumbeng a bigbigen dagiti nangisit a natantan-ok dagiti puraw ngem isuda ket rumbeng a pagserbianda dagiti puraw nga appoda. Isu nga idi kinasabaak dagiti nangisit a trabahador, impapan dagiti dadduma a puraw a maysaak a manangaskasaba ti di panagpasakop. Inakusarandak pay ketdi dagiti dadduma a Komunistaak ket pinangtaandak a paltogan.
Inreportko ti situasion iti sanga nga opisina ti Watch Tower Society, ket iti saan a nabayag naiyakarak iti sabali a destino iti maysa nga away a maawagan Duiwelskloof. Agarup iti daytoy a tiempo insardeng metten ni baketko ti nangisuro ket kinaduaannak iti payunir a serbisio. Maysa a malem idi 1950, iti panagawidmi manipud idiay tay-ak ti serbisio nasangpetanmi ti maysa a dakkel a sobre a naggapu iti Sosiedad. Iti pannakaklaatmi naglaon dayta iti imbitasion para kaniak nga agsanay kas agdaldaliasat a manangaywan. Tallo a tawen a binisitami dagiti kongregasion iti Sud Africa, ket kalpasanna idi 1953 naibaonkami idiay Lesotho, maysa a pagilian a nalakub iti tengnga ti Sud Africa.
Panagserbi Idiay Lesotho ken Botswana
Idi inrugimi ti agserbi idiay Lesotho, adu dagiti sayangguseng a dagiti ganggannaet ti masansan a puntiriada a papatayen kas paset iti ritualda. Madanagankami ken baket, ngem ti panagayatmi kadagiti kakabsat a Sotho ken ti kinamanagpadagusda ti nangiwaksi iti kakasta a buteng idi agangay.
Iti panagserbik kadagiti kongregasion iti Kabambantayan ti Maluti idiay Lesotho, masansan nga agluganak iti eroplano, nga ibatik ni baketko kadagiti kapatagan a pangituloyanna nga agpayunir agingga iti panagsublik. Siaanus a kinuyogdak dagiti gagayyem kadagiti nadumaduma a kongregasion tapno saanak a mayaw-awan iti kabambantayan.
Iti naminsan imbagada kaniak a tapno madanon ti sumaruno a kongregasion, masapul nga agsakaykami iti kabalio a bumallasiw iti Orange River. Impatalgedda kaniak a naamo ti kabaliok ngem pinagannaddak a no napegges unay ti karayan, masansan a madi a pasakayan dagiti kabalio. Madanaganak agsipud ta saanak a nalaing nga agkabalio wenno aglangoy. Di nagbayag addakamin iti karayan, ket pagat’ silia ti kaadalem ti danum. Kasta unay ti amakko ta naibbatak ti rienda ket kimpetak iti buok ti kabalio. Anian a pannakabang-arko idi nakasagpatkami a sitatalged iti ballasiw ti karayan!
Saanak a nakaturog iti karabiianna agsipud ta naut-ot unay ti bagik gapu iti panagsakayko iti kabalio. Ngem awan aniamanna agsipud ta inapresiar iti kasta unay dagiti kakabsat ti ibibisitami. Idi rinugiak ti trabaho kas manangaywan ti sirkito idiay Lesotho, adda kangatuan a bilang a 113 nga agibumbunannag. Itatta, dimmakkel dayta a bilang iti 1,649.
Idi 1956 naibaonkami idiay Bechuanaland Protectorate, a maawagan itan iti Botswana. Nalawlawa nga adayo ti Botswana, ket nawatwatiwat ti daliasatenmi tapno madanon dagiti amin nga agibumbunannag. Tren ti paglugananmi no kua, ket no dadduma trak nga awan linongna. Awan dagiti tugaw, isu nga agdalupisakkami lattan a kadua dagiti bagahemi. Masansan a sumangpetkami iti destinomi a nakataptapuk ken nabannog unay. Kanayon a pasangbayendakami dagiti Kristiano a kakabsattayo, ket mainanaankami a makakita iti naragsak a langlangada.
Iti daydi a tiempo, maiparit dagiti publikasion ti Sosiedad idiay Botswana, isu a nakaan-annad ti panangasabami iti balbalay, a dikam mangus-usar iti literatura ti Sosiedad. Iti naminsan nasiputandakami a mangaskasaba iti away ti Maphashalala ket inarestodakami. Ti Biblia ti pinangidepensami, nga imbasami ti Mateo 28:19, 20 a nakaibatayan ti trabahomi. Nupay dinayawdakami dagiti dadduma a mammagbaga, imbilin ti hepe ti pannakasaplit dagiti lokal a Saksi. Kalpasanna, iti pakasdaawanmi, impakpakaasi ti maysa a klero iti hepe a baybay-an ken pakawanennakamin. Immannugot ti hepe, ket imbulosdakami.
Iti laksid ti panangidadanes ken panangiparit iti literaturatayo, nagtultuloy a rimmang-ay ti trabaho ti Pagarian. Idi simmangpetak idiay Botswana, adda kangatuan a bilang a 154 nga agibumbunannag. Tallo a tawen kalpasanna idi naikkat ti pannakaiparit, dimmakkel dayta a bilang iti 192. Itatta, adda 777 a Saksi ni Jehova a mangaskasaba iti dayta a daga.
Panangisuro ken Panangipatarus
Idi agangay, nagserbiak kas instruktor iti Kingdom Ministry School para kadagiti Kristiano a panglakayen. Iti saan a nabayag tinagiragsakko ti pribilehio nga agbalin nga instruktor iti Pioneer Service School. Pasaray agserbikami nga agassawa iti sanga ti Sud Africa. Kadagita a gundaway tumulongak iti panangipatarus, ket iti kusina ti pagtrabahuan ni Caroline.
Maysa nga aldaw idi 1969, inasitgannak ti manangaywan ti sanga, ni Frans Muller, ket kinunana: “Kabsat Thongoana, umaykayo nga agassawa idiay opisinak.” Sadiay inlawlawagna a karamankami kadagidiay napili a tumabuno iti 1969 “Talna Ditoy Daga” a Kumbension idiay Londres. Tinagiragsakmi ti naayat a panangsangaili dagiti kakabsattayo idiay Inglatera ken Scotland, ket daytoy ti nangparayray unay iti panangipategmi iti sangalubongan a panagkakabsat.
Iti napalabas nga uppat a dekada, pudno a maysa a nasungdo a kadua ni Caroline iti karerami a kas amin-tiempo nga ebanghelisador. Pinagranudanmi dagiti ragsak ken ladingit. Nupay dua kadagiti annakmi ti natay, dimmakkel ti balasangmi, ni Damaris, a maysa a nasayaat a Saksi ken timmulong met iti trabaho a panangipatarus iti sanga ti Sud Africa.
Saannakamin a palubosan ti salun-atmi a makiraman iti trabaho a panagdaliasat, isu nga agserserbikami kas espesial payunir iti napalabas a sumagmamano a tawenen iti maysa a kongregasion idiay Seshego, maysa nga ili ti Africa nga asideg iti Pietersburg. Agserserbiak kas mangidaulo a manangaywan. Kunaen ti Biblia nga “iti sanguanan [ni Jehova] adda ti naan-anay a rag-o,” ket pudno a nasarakak ti rag-o ken pannakapnek iti panagserbi iti Dios iti makin-abagatan nga Africa.—Salmo 16:11.
[Ladawan iti panid 26]
Panangasaba iti ili ti Seshego, Sud Africa