Dagiti Pisikal a Depekto Awan Pilpilienna
NI Christian, nga agnanaed iti maysa a pagilian ti Africa, ket intalaw dagiti soldado a mangpilpilit kenkuana nga agbalin a soldado, ngem di immannugot gapu iti sinanay-Biblia a konsiensiana. Impan ngarud dagiti soldado iti maysa a kampo militar a sadiay kinabkabilda iti uppat nga aldaw, ket maysa kadakuada ti nangpaltog iti sakana. Naikagumaan ni Christian ti mapan iti ospital, ngem masapul a maputed ti sakana manipud iti tumeng. Iti sabali a pagilian ti Africa, uray dagiti ubbing naputed dagiti sakada babaen dagiti armado a rebelde. Ken idiay Cambodia agingga idiay Balkan, idiay Afghanistan agingga Angola, agtultuloy ti pannakapukol ken pannakabaldado dagiti ubbing ken nataengan gapu iti panagbettak dagiti naimula a bomba.
Pakaigapuan met iti pisikal a depekto dagiti aksidente ken sakit, kas iti diabetes, ken uray pay dagiti sabidong iti aglawlaw. Kas pagarigan, kadagiti agkakabangibang a lugar iti maysa a siudad idiay Makindaya a Europa, adu nga ubbing ti nayanak a pukol ti maysa kadagiti imada. Agingga la iti siko ti takiagda. Ipakita ti pammaneknek a maigapu daytoy iti genetiko a pannakadangran gapu iti kemikal a polusion. Kompleto ti takiag ken saka ti adu a tattao ngem addaanda iti pisikal a depekto gapu iti pannakaparalisa wenno dadduma pay a sabali a makagapu. Pudno nga awan pilpilienna dagiti pisikal a depekto.
Aniaman ti makagapu, mangdudog iti rikna dagiti pisikal a depekto. Naputed ti kannigid a gurong ni Junior idi agtawen iti 20. Kinunana idi agangay: “Adu ti pakaburiborak. Sinangsangitak ti kinapudno a dinto maisubli ti sakak. Diak idi ammo ti aramidek. Nariribukanak.” Ngem idi agangay, dakkel ti nagbalbaliwan ti panangmatmat ni Junior. Rinugianna nga adalen ti Biblia ket nasursurona dagiti banag a saan laeng a nangtulong kenkuana nga aganus no di ket nakaipaay met kenkuana iti naisangsangayan a namnama—maysa a naragsak a masanguanan ditoy daga. No addaankayo iti pisikal a depekto, kayatyo kadi ti maaddaan iti kasta a namnama?
No kasta, pangngaasiyo ngarud ta basaenyo ti sumaganad nga artikulo. Paregtaendakayo a mangbasa kadagiti Nainkasuratan a reperensia iti Bibliayo tapno maammuanyo a mismo no ania ti aramidento ti Namarsua agpaay kadagidiay mangadal iti panggepna ken agbiag a maitunos iti dayta.