Salsaludsod Dagiti Agbasbasa

Maipalubos kadi nga agpalawag ti Kristiano a ministro iti pumpon ti maysa a nagpakamatay?

Tunggal Kristiano a ministro ti mangikeddeng no ipalubos ti konsiensiana nga agpalawag iti pumpon ti tao nga agparang a nagpakamatay. No agaramid iti pangngeddeng, nasken nga utobenna dagiti sumaganad a saludsod: Ania ti panangmatmat ni Jehova iti panagpakamatay? Talaga kadi a daydi natay ti nangkettel iti biagna? Ti kadi depekto iti isip wenno emosion ti makagapu a nagpakamatay? Ania ti panangmatmat dagiti lumugar iti panagpakamatay?

Kas Kristiano, interesadotayo a mangammo iti panangmatmat ni Jehova iti panagpakamatay. Matmatan ni Jehova a napateg ken sagrado ti biag ti tao. (Genesis 9:5; Salmo 36:9) Ti inggagara a panangkettel iti biag ket panangpapatay iti mismo a bagi, ket ngarud saan a makaay-ayo dayta iti imatang ti Dios. (Exodo 20:13; 1 Juan 3:15) Dayta kadi ti panggapuan a saan nga agpalawag iti pamumpon ti nagpakamatay?

Usigenyo ti kaso ni Ari Saul ti Israel. Idi makitana a dina malasatan ti maudi a pannakigubatna kadagiti Filisteo, imbes a bay-anna dagiti kabusorna a mangparigat kenkuana, “innala ni Saul ti kampilan ket rinugmaanna dayta.” Idi makita dagiti Filisteo ti bangkayna, inlansada iti pader iti siudad ti Bet-san. Idi naammuanda ti inaramid dagiti Filisteo, dagiti agnanaed iti Jabes-galaad inikkatda ti bangkay, pinuoranda, sada innala dagiti tulangna ket intabonda. Nagayunarda pay ketdi iti pito nga aldaw, maysa a kaugalian ti panagleddaang dagiti Israelita. (1 Samuel 31:4, 8-13; Genesis 50:10) Idi a ni David, ti pinulotan ni Jehova, naammuanna ti inaramid dagiti taga Jabes-galaad, kinunana: “Benditonakayo koma ni Jehova, agsipud ta winatwatyo daytoy a naayat a kinamanangngaasi maipaay iti apoyo, ken Saul, ta isu intabonyo. Ket ita watwaten koma maipaay kadakayo ni Jehova ti naayat a kinamanangngaasi ken kinamapagpiaran.” (2 Samuel 2:5, 6) Awan ti naipaltiing a rekord a nakondenar dagiti agnanaed iti Jabes-galaad gapu iti panangaramidda iti maibilang a seremonia ti pumpon maipaay ken ni Ari Saul. Idiligyo dayta iti kaso dagidiay napaidaman iti pamumpon gapu iti basolda. (Jeremias 25:32, 33) Ti maysa a Kristiano a ministro mabalin nga utobenna ti salaysay maipapan ken ni Saul no agdesision mainaig iti panagpalawagna iti pumpon ti maysa a nagpakamatay.

Mabalin a kayat met nga usigen ti ministro ti panggep ti palawag iti pumpon. Saan a kas kadagiti tattao a mamati iti imortalidad ti kararua, dagiti Saksi ni Jehova saanda nga idauluan ti pumpon buyogen ti biddut a kapanunotan a ti natay ket napan iti sabali a lubong. Imbes a paboran ti natay, panggep ti palawag a maliwliwa dagiti agledleddaang ken mangasaba kadagiti timmabuno maipapan iti kasasaad dagiti natay. (Eclesiastes 9:5, 10; 2 Corinto 1:3-5) Sabali pay a napateg a rason iti panagpalawag iti pamumpon ket tapno matulongan dagiti amin a timmabuno a mangmennamenna iti kinaababa ti biag. (Eclesiastes 7:2) Agaplikar kadi dagitoy a panggep no agpalawag iti pumpon ti nagpakamatay?

Pudno, patien ti dadduma nga inggagara ti tao a kinettel ti biagna, a naan-anay nga ammona a basol dayta ken Jehova. Ngem kanayon kadi a mapaneknekan ti kasta a panangipapan? Mabalin ngata a nagdarasudos laeng ti nagpakamatay? Dadduma a nangpadas nga agpakamatay ti nagbaliw ti panunotda ket dida kinettel ti biagda. Kalpasan nga agpakamatay, saanen a makapagbabawi ti maysa a tao iti inaramidna.

Napateg met nga utoben a ti depekto ti isip wenno emosion ti pakaigapuan iti adu a kaso ti panagpakamatay. Dagitoy ti talaga a makuna a biktima ti panagpakamatay. Sigun iti sumagmamano nga estadista, 90 porsiento kadagiti agpakpakamatay ti addaan iti parikut iti mental, emosional, wenno naadiktoda iti droga. Pakawanen kadi ni Jehova ti panagpakamatay dagiti tao nga addaan iti kasta a mental a kasasaad? Saan a datayo ti mangibaga no ti natay ket nakaaramid iti di mapakawan a basol iti imatang ni Jehova. Ti maysa a Kristiano a ministro mabalin nga usigenna dagiti kasasaad ken medikal a nalikudan ti natay no pampanunotenna ti agpalawag iti pumpon ti nagpakamatay.

Adda pay maysa a banag nga usigen: Ania ti panangmatmat ti komunidad iti panagpakamatay ken ti ipapatay ti tao? Daytoy ti nangruna a panunoten dagiti panglakayen, a maseknan iti reputasion ti kongregasion dagiti Saksi ni Jehova iti dayta a lugar. Depende iti kaaduan a panangmatmat dagiti lumugar iti panagpakamatay, ken partikular iti daytoy a kaso ti panagpakamatay, mabalin nga ikeddeng dagiti panglakayen a saan nga isuda ti mangyurnos iti pumpon iti publiko wenno mangipaay iti palawag ti pumpon iti Kingdom Hall.

Ngem no makiddaw iti maysa a Kristiano a ministro a mangipaay iti palawag iti pumpon, mabalinna nga aramiden dayta kas maysa nga indibidual. No agpalawag, masapul a naannad a saan a mangipaay iti aniaman a pammasiguro no posible wenno saan ti panagungar. Agpannuray ken ni Jehova ti namnama ti natay, ket awan ti makaibaga no ti natay ket mapagungar wenno saan. Mabalin nga ipalawag ti ministro dagiti kinapudno nga isursuro ti Biblia maipapan iti ipapatay ken liwliwaenna dagiti agledleddaang.