Ti Panagbiag nga Impluensiado iti An-anito
ADDA nasabetmo apaman a rimmuarka iti balaymo. Naitibkolka iti bato. Aguni ti maysa a kita ti tumatayab iti rabii. Adda maulit-ulit a tagtagainepmo. Simple ken kadawyan dagita a pasamak para iti adu. Ngem dadduma a tattao iti Makinlaud nga Africa matmatanda dagitoy kas pagilasinan, partaan, wenno mensahe manipud iti lubong dagiti espiritu. Mabalin a nasayaat a gasat wenno kalamidad ti agur-uray, depende iti pagilasinan ken iti kaipapananna.
Siempre, saan laeng nga idiay Africa a nasaknap ti an-anito. Uray adun a tawen a nagbiagda iti kagimongan dagiti ateista, nakaskasdaaw ti bilang dagiti tattao idiay China ken kadagiti republika ti dati a Soviet Union a mamati pay laeng kadagiti an-anito. Kadagiti Makinlaud a pagilian, adu ti agkonsulta iti horoscope-da, kaamakda ti Biernes no agtinnag dayta iti maika-13 nga aldaw ti aniaman a bulan, ken liklikanda ti nangisit a pusa. Iti dadduma a tattao iti Adayo nga Amianan, mamatida a partaan ti gubat wenno angol no makakitada kadagiti karkarna a lawag iti amianan. Idiay India, mayakar ti AIDS babaen dagiti drayber ti trak a mamati a masapul a seksual a makidennada tapno mataginayon ti nalamiis a temperatura ti bagida bayat dagiti nadagaang nga aldaw. Idiay Japan, patien dagiti agtartrabaho iti usok a malas no sumrek ti maysa a babai iti usok a di pay nairingpas. Nasaknap met ti an-anito iti propesional nga isport. Maysa a managay-ayam iti volleyball ti agkuna nga agsasaruno ti panangabakda gapu iti panangisuotna iti nangisit a medias imbes a puraw. Adu pay ti kasta nga an-anito.
Sika ngay? Adda kadi nalimed, di mailawlawag a pagbutbutngam? Adda kadi mangim-impluensia kenka a maysa a “patpatien, wenno aramid nga awan met ti nalawag a lohikal a pakaigapuanna”? Ti sungbatmo ti mangibaga no ti biagmo ket im-impluensiaan ti an-anito, yantangay dayta ti kaipapanan ti sao nga “an-anito.”
No ti an-anito ti mangim-impluensia kadagiti desision ken inaldaw nga aktibidad ti maysa a tao, ipalpalubosna nga isu ket dominaran ti maysa a banag a dina maaw-awatan. Nainsiriban kadi dayta? Nasken kadi nga agpaimpluensiatayo kadagita a nalibeg ken posible a dakes a patpatien? Awan kadi ti pagdaksan ti an-anito wenno mamagpeggad ketdi?