Panangmatmat ti Biblia

Maitunos Kadi ti An-anito iti Pannursuro ti Biblia?

MAKATAWEN a saan a nagbiahe ti maysa a periodista gapu ta kinuna ti maysa a mammadles nga isu ket matay babaen ti aksidente iti eroplano. Dagiti tattao iti amin a kita ti panagbiag, agraman dagiti politiko, negosiante, artista, atleta, ken dagiti estudiante iti kolehio, agpannurayda kadagiti an-anito. No agduaduada, mabannog, wenno madanaganda, patienda a dagiti inaanito nga aramid ti mangsalaknib wenno mangtulong kadakuada a mangragpat kadagiti kalatda.

Adu nga an-anito ti maipagarup a makaay-ayo wenno makatulong iti isip. Kinuna ti pimmusayen nga antropologo a ni Margaret Mead: “Ipakita ti panamati kadagiti an-anito a magagarantayo a matungpal dagiti tarigagaytayo wenno malapdan koma ti dakes. Adda pagimbaganna kadatayo dagiti an-anito uray saantayo a naan-anay a mamati kadagita.” Kaskasdi, dagiti agtarigagay a mangay-ayo iti Dios rumbeng nga isaludsodda iti bagida, ‘Maitunos kadi ti an-anito iti pannursuro ti Biblia?’

Ti Nagtaudan ti An-anito

Adu ti pagbutbutngan ti sangatauan​—kas koma iti panagbuteng iti ipapatay, kadagiti datdatlag, ken iti maaw-awagan a biag kalpasan ti ipapatay. Ni Satanas, ti rebelde a bumusbusor iti Dios, us-usarenna dagiti kinaulbod tapno matengngelna dagiti tattao babaen kadagiti kasta a pagbutbutngan. (Juan 8:44; Apocalipsis 12:9) Adu ti kakadua ni Satanas a mangikagkagumaan tapno mayadayo dagiti tattao iti Dios. Iti Biblia, naawagan ni Satanas kas “ti agturay kadagiti sairo.” (Mateo 12:24-27) Siasino dagiti sairo? Idi tiempo ni Noe, adu nga anghel ti nakikadua ken Satanas a nagrebelde iti Dios ket pinagbalinda ti bagbagida a sairo. Sipud idin, ikagkagumaanda nga impluensiaan ti isip dagiti tattao. Ti an-anito ti maysa kadagiti pamay-anda.​—Genesis 6:1, 2; Lucas 8:2, 30; Judas 6.

Ti an-anito ket naibatay iti maysa kadagiti kinaulbod nga isaksaknap ni Satanas, ti panamati nga adda sumina a kararua no matay ti tao tapno agtultuloy nga agbiag. Ngem kuna ti Biblia: “No maipapan kadagiti natay, saanda a pulos sipapanunot iti aniaman.” Kunana pay nga “awan ti aramid wenno uray gakat wenno uray pannakaammo wenno uray sirib” kalpasan ti ipapatay ti maysa a tao.​—Eclesiastes 9:5, 10.

Banag a “Nakarimrimon ken Jehova”

Pinili ti adu a tattao ti mamati ken Satanas. Ngem adu a tawen ti napalabasen, adda nalawag a bilin ti Dios kadagiti Israelita maipapan iti daytoy. Kuna ti Saona: “Awan koma ti masarakan kenka nga . . . asinoman a mangaramat iti panagpadles, maysa a managsalamangka wenno asinoman nga agsapul kadagiti partaan wenno maysa a mangkukulam, wenno maysa a mangkayaw iti sabsabali babaen ti pagilabeg wenno asinoman nga umuman iti mannakiuman iti espiritu wenno maysa a propesional a managipadles kadagiti pasamak wenno asinoman nga agimtuod iti natay. Ta isuamin nga agar-aramid kadagitoy a banag ket nakarimrimon ken Jehova.”​—Deuteronomio 18:10-12.

Nakalkaldaang ta saan nga impangag dagiti Israelita daytoy a pakdaar. Kas pagarigan, idi kaaldawan ni propeta Isaias, mamati ti dadduma a ti nawadwad nga apit ket agpannuray “iti dios ti Naimbag a Gasat”​—maysa nga inaanito a patpatien a nakalkaldaang ti nagbanaganna. Napukawda ti anamong ken pamendision ni Jehova.​—Isaias 65:11, 12.

Iti panawen dagiti Kristiano, saan a nagbalbaliw ti panangmatmat ni Jehova iti an-anito. Indagadag ni apostol Pablo kadagiti managanito iti siudad ti Listra nga ‘agbaw-ingda manipud kadagiti ubbaw a banag nga agturong iti sibibiag a Dios, a nangaramid iti langit ken iti daga ken iti baybay ken iti amin a bambanag nga adda kadakuada.’​—Aramid 14:15.

Panangtallikud iti An-anito

Adu dagiti inaanito nga aramid ket adda amin nagpapadaanda​—awan ti lohikal a nakaibatayanda. Gapu iti an-anito, matmatan dagiti tattao a saan a nasayaat ti nagbanaganda gapu ta dayta ti gasatda imbes a bigbigenda nga adda met nagkuranganda.

Makaparagsak ta adu ti nangtallikud kadagiti inaanito a patpatien. Kinuna ni Jesus: “Maammuanyonto ti kinapudno, ket ti kinapudno wayawayaannakayto.” (Juan 8:32) Kinuna ni Clementina, taga-Brazil a mammadles iti 25 a tawen: “Ti panagpadles laeng ti pagbirokak. Ngem insardengko dayta gapu iti kinapudno nga isursuro ti Biblia.” Kinapudnona, pabilgennatayo ti regular a panagadal iti Biblia ken ti napasnek a panagkararag ken Jehova a Dios. Maaddaantayo iti kalmado ken nasimbeng a panunot a tumulong tapno makaaramidtayo kadagiti nainsiriban a desision a mangiliklik kadatayo iti didigra ken panagdanag.​—Filipos 4:6, 7, 13.

Iyimtuod ti Biblia: “Ania ti pakiramanan ti lawag iti sipnget? Kanayonanna, ania ti pagtunosan ni Kristo ken ni Belial [wenno ni Satanas]?” Gapuna, dagiti pudno a Kristiano masapul nga adaywanda ti an-anito.​—2 Corinto 6:14-16.

NAPANUNOTYO KADIN?

◼ Imbes nga agtalekda iti Dios, siasino ti nagtalkan dagiti managanito nga Israelita idi kaaldawan ni Isaias?​—Isaias 65:11, 12.

◼ Ania ti indagadag ni apostol Pablo nga aramiden dagiti managanito idiay Listra?—Aramid 14:15.

◼ Maitunos kadi ti an-anito iti pannursuro ti Biblia?​—2 Corinto 6:14-16.

[Dagiti Ladawan iti panid 10]

Ti an-anito ipariknana kadagiti tattao a saanda a manungsungbat kadagiti aramidda