Salsaludsod Dagiti Agbasbasa

Dakes kadi ti agsugal uray bassit laeng a gatad ti kuarta ti nairaman?

Saan a detalyado ti panangilawlawag ti Sao ti Dios maipapan iti panagsugal, ngem umdasen ti linaonna a mangipakita nga amin a kita ti panagsugal ket saan a maitunos kadagiti prinsipio ti Biblia.a Kas pagarigan, pagaammo unay a ti panagsugal ket mangituggod iti kinaagum. Dayta laengen a kinapudno ket napateg nga usigen dagiti Kristiano, gapu ta kuna ti Biblia a “dagiti naagum” dida tawiden ti Pagarian ti Dios ken naidilig ti kinaagum iti idolatria.​—1 Corinto 6:9, 10; Colosas 3:5.

Mangituggod met ti panagsugal iti panangipasindayaw iti bagi ken di umiso nga espiritu ti kompetensia, ti dakkel a tarigagay a mangabak. Nangpakdaar ni apostol Pablo maibusor kadagita idi nagsurat: “Ditay koma agbalin a manangipasindayaw iti bagi, a mangsulsulbog iti panagsisinnalisal, nga agiinnapal iti maysa ken maysa.” (Galacia 5:26) Maysa pay, ti panagsugal iparegtana kadagiti dadduma ti panagpannuray iti gasat babaen ti an-anito. Usaren dagiti mannugal ti amin a kita ti an-anito, a mangnamnamada a dayta ti mangted kadakuada iti suerte. Ipalagipda kadatayo dagiti di matalek nga Israelita a “mangidasdasar iti lamisaan maipaay iti dios ti Naimbag a Gasat ken dagidiay mangpumpunno iti naggampor nga arak maipaay iti dios ti Keddeng.”​—Isaias 65:11.

Mabalin a kunaen ti dadduma a maysa laeng a panaglinglingay ti panangipusta iti bassit a kantidad ti kuarta bayat nga agay-ayam iti baraha wenno board game a kadua dagiti kabagian wenno nasinged a gagayyem. Pudno, ti agipusta iti bassit a kantidad ti kuarta mabalin a dina ibilang ti bagina a naagum, napasindayaw, mannakikompetensia, wenno managanito. Kaskasdi, ania ti epekto ti panagsugalna kadagidiay kaay-ayamna? Adu a nagbalin a mannugal ti nangrugi kadagiti babassit a pusta ‘kas paglinglingayan laeng.’ (Lucas 16:10) Ti maysa nga agparang a simple a paglinglingayan ket nagbanag a nakaro a pagdaksanda.

Nangnangruna a pudno dayta no nairaman dagiti ubbing. Adu nga ubbing ti maay-ayatan iti panangabak iti bassit a pusta isu a nagargarida nga agpusta iti dakdakkel a gatad. (1 Timoteo 6:10) Maysa a naunday a panagadal nga impablaak ti Arizona Council on Compulsive Gambling idiay Estados Unidos pinatalgedanna nga adu nga adikto iti panagsugal ti nangrugi idi ubbingda pay “babaen ti panagpusta kadagiti isport wenno ay-ayam iti baraha a kadua dagiti gagayyem wenno kabagianda.” Maysa pay a report ti nagkuna a “nangrugi dagiti ubbing nga agsugal iti pagtaenganda, masansan a babaen ti baraha a kadua ti pamilia ken gagayyemda.” Innayon ti report a “tallopulo a porsiento kadagiti ubbing a nagsugal ti nangrugi sakbay nga agedadda iti sangapulo ket maysa.” Tapno adda pagsugalda, adu a tin-edyer ti agaramid iti krimen wenno imoralidad, sigun iti panagadal ti Why Do People Gamble Too Much​—Pathological and Problem Gambling. Anian a nakalkaldaang a resulta ti maysa a banag a kasla awan peggadna idi damo!

Gapu ta agbibiagtayo iti lubong a napunno iti silo ken pannulisog, apay koma nga isarangtayo ti bagitayo iti sabali pay a kita ti silo? (Proverbio 27:12) Ti panagsugal​—adda man ti ubbing a siiimatang wenno awan, bassit man ti pusta wenno dakkel​—pagpeggadenna ti espiritualidad isu a masapul a liklikan dayta. Kadagiti Kristiano a magustuanda ti agay-ayam iti board game wenno baraha, nasaysayaat laengen no basta isuratda ti iskorda wenno agay-ayamda lattan uray awan ti iskorda. Dagiti masirib a Kristiano a maseknan iti espiritualidadda agraman iti espiritualidad dagiti gagayyem ken pamiliada liklikanda ti agsugal​—uray iti bassit laeng a gatad ti kuarta.

[Footnote]