Dagiti Lugar a Pagdayawan—Kasapulantayo Kadi?
‘Napusek dagiti pasilio ken kalsada ti basilika bayat nga agturong iti santuario ti rinibu a namaris ti kawesda a peregrino manipud iti nadumaduma a paset ti pagilian, dagiti grupo dagiti Indian a mangtultulad iti nalabit nagkauna a sala dagiti Español a nabuyogan iti tambor, ken dagiti debotado nga agparparigat a mangipagna kadagiti tumengda.’
KASTA ti panangiladawan ti periodiko nga El Economista iti nagadu a nagaaripuno a tao idi Disiembre 2001. Iti daydi a kanito, mapattapatta a tallo a milion a tao ti bimmisita iti basilika iti Siudad ti Mexico tapno ipakita ti pammatida iti Virgin of Guadalupe. Rinibu a bisita ti nakayawan met iti dadduma a pasdek ti relihion, kas iti St. Peter’s Basilica idiay Roma.
Gapu iti tarigagayda nga agdayaw iti Dios, adu dagiti mangipateg unay kadagiti narelihiosuan a pasdek. “Para kaniak, mariknak nga asidegak iti Dios no addaak iti simbaan,” kuna ni Maria a taga Brazil. “Maysa dayta a nasantuan a lugar. Patiek a madalusan ti kararuak no mapanak iti simbaan ken maysa a basol ti saan a makimisa ken agkompesar kada Domingo.” Insalaysay ni Consuelo a taga Mexico: “Magutugot ti riknak no addaak iti simbaan; tagipatgek unay dayta. Kasla addaak idiay langit bayat ti kaaddak sadiay.”
Nupay ipatpateg ti dadduma dagiti simbaan, addada agduadua no kasapulan dagitoy a lugar a pagdayawan. Maipapan iti bassit a bilang dagiti makimismisa, kuna ni Peter Sibert, maysa a Katoliko a padi idiay Inglatera: “Pilien [ti tattao] dagiti paset ti relihion a kayatda. Katoliko ti adu a nataengan ken agbibiagda a maitunos iti pammatida—ngem saan a kasta ti kinarelihioso dagiti naub-ubing a tattao.” Kuna ti Daily Telegraph idiay Londres idi Nobiembre 20, 1998: “Sipud 1979, mapattapatta a 1,500 a simbaan ti nagserra idiay Inglatera no idilig iti 495 a simbaan a naglukat ken 150 a naibangon.”
Idi 1997, impadamag ti periodiko a Süddeutsche Zeitung idiay Munich, Alemania: “Dagiti simbaan ket nagbalin a pagsinean ken apartment: Saan a makimismisa dagiti manamati, nabaliwan ti pakausaran dagiti lugar a pagdayawan. . . . Mapaspasamak metten idiay Alemania ti gagangay a mapaspasamak idiay Netherlands wenno idiay Inglatera.” Innayon ti periodiko: “Makasarak ti maysa iti agarup 30 wenno 40 a dakkel a panangilako iti simbaan idiay Alemania iti naudi a sumagmamano a tawen.”
Talaga kadi a kasapulan dagiti narelihiosuan a pasdek iti panagdayaw iti Dios? Nadakamat kadi iti Kasuratan dagiti basilika ken nalabor a simbaan? Ania dagiti kita ti pasdek a nainaig iti panagdayaw iti pudno ken sibibiag a Dios? Ania ti masursurotayo kadagitoy maipapan iti panagkasapulan kadagiti lugar a pagdayawan ken no ania ti nasken a maangay kadagita?