Report Dagiti Manangiwaragawag iti Pagarian
Dagiti Naragsak a Resulta ti Panaganus ken Panagregget
IMPAKPAKAUNA ni Jesu-Kristo a kadagiti maudi nga aldaw “ti ayat ti ad-adu lumamiis.” Kas resulta, iti adu a paset ti lubong ita, ti kaaduan a tattao awan ti interesda iti naimbag a damag ti Pagarian. Addada pay ketdi manglais iti relihion.—Mateo 24:12, 14. Agpapan pay kasta, babaen ti pammati ken panaganus, dagiti agibumbunannag iti Pagarian sibaballigi a sangsanguenda ti karit, kas ipakita ti sumaganad a kapadasan idiay Czech Republic.
Nakarikep ti ridaw bayat a nakitungtong ti dua a Saksi iti maysa a babai. Kalpasan ti sumagmamano a kanito, naglukat bassit ti ridaw ket maysa nga ima ti nangawat iti Pagwanawanan ken Agriingkayo! a magasin nga ituktukon dagiti Saksi. “Pagyamanan,” kuna ti babai, sana inrikep ti ridaw. “Agsublikamto ngata?” napanunot dagiti Saksi. Nagsubli ti maysa kadakuada, maysa a payunir, wenno amin-tiempo a ministro. Kaskasdi, naulit ti napasamak, ket nagtultuloy dayta iti makatawen.
Idi napanunotna a nasken a balbaliwanna ti pamay-anna, nagkararag ti payunir ken ni Jehova tapno matulongan. Idi nangipaima manen iti magasin, nainggayyeman nga inyimtuodna iti babai: “Komusta ka? Komusta ti panangbasam kadagiti magasin?” Idi damo, saan nga agun-uni ti babai, ngem kalpasan ti sumagmamano pay a panagbisita, nagbalin a nainggayyeman ti babai. Naminsan, inlukatna ti ridaw, ngem saan a nagpaut ti saritaan.
Gapu ta agkedked ti babai a makitungtong a rupanrupa, inkeddeng ti payunir a suratan tapno ilawlawagna dagiti maar-aramid a panagbisita ken tapno mangitukon iti panagadal iti Biblia iti pagtaengan. Kamaudiananna, kalpasan ti maysa ket kagudua a tawen a naanus a panagregget, nagballigi ti payunir a nangirugi iti panagadal iti Biblia iti bumalay. Nasorpresa ngem naparegta idi kunaen ti babai kenkuana: “Namatiak iti Dios sipud idi inrugim ti mangyeg kadagiti magasin.”
Wen, ti panaganus ken panagregget mangyeg kadagiti naragsak a resulta iti trabaho a panangikasaba iti Pagarian ken panagaramid iti adalan.—Mateo 28:19, 20.