Pakasaritaan ti Biag

Naragsak Daydiay ni Jehova ti Diosna

KAS INSALAYSAY NI TOM DIDUR

Naabanganen ti hall ti komunidad. Agarup 300 ti manamnama nga agasamblea idiay Porcupine Plain, Saskatchewan, Canada. Iti Mierkoles, nangrugi nga agniebe, ket iti Biernes interamente a naabbungotan iti niebe ti kapanagan. Bimmaba ti temperatura iti -40 degree Celsius. Duapulo ket walo dagiti timmabuno, agraman ti sumagmamano nga ubbing. Dayta ti damo nga itatabunok iti asamblea kas baro a manangaywan iti sirkito, ken maysaak a madandanagan nga agtawen iti 25. Sakbay nga ibagak ti napasamak, bay-anyo nga isalaysayko no kasano a natagiragsakko daytoy naisangsangayan a pribilehio iti panagserbi.

MAIKAPITOAK kadagiti walo nga agkakabsat, a bin-ig a lallaki. Ni Bill ti inauna, sa simmaruno da Metro, John, Fred, Mike, ken Alex. Nayanakak idi 1925, ket ni Wally ti buridek. Nagnaedkami iti asideg ti ili ti Ukraina, Manitoba, a sadiay adda bassit a talon dagiti dadakkelko, da Michael ken Anna Didur. Ti trabaho ni Tatang ket agmantener iti riles. Gapu ta narigat ti mangaywan iti dakkel a pamilia iti bassit a pagdagusan kadagiti naiputputong a lugar dagiti riles, nagtalinaedkami iti talon. Kaaduanna a mayadayo ni Tatang gapu iti trabahona, isu a ni Nanang ti nangaywan kadakami. Adda ti lawas wenno nasursurok pay a panawandakami ni Nanang tapno kaduaanna ni Tatang, ngem siniguradona nga ammomi ti agluto ken mangasikaso kadagiti trabaho iti pagtaengan. Kasta met, yantangay miembrokami ti Greek Catholic Church, sinanaynakami met ni Nanang a mangikabesa iti kararag ken makiraman iti dadduma a ritual.

Panangammo iti Kinapudno iti Biblia

Nariing ti tarigagayko a mangtarus iti Biblia bayat ti kinaagtutubok. Maysa a kaarrubami a Saksi ni Jehova ti regular a nangbisita iti pamiliami tapno agbasa iti sumagmamano a paset ti Biblia mainaig iti Pagarian ti Dios, Armagedon, ken dagiti bendision iti baro a lubong. Saan pulos nga interesado ni Nanang iti ibagbagana, ngem nagustuan da Mike ken Alex ti mensahe. Kinapudnona, bayat ti maikadua a gubat sangalubongan, ti naadalda ti nangtignay kadakuada nga agkedked nga agsoldado maibatay iti konsiensiada. Gapu iti dayta, nasentensiaan ni Mike a maibalud iti ababa a tiempo, bayat a naipan ni Alex iti kampo a pagtrabahuan idiay Ontario. Idi agangay, da Fred ken Wally inawatda met ti kinapudno. Ngem saan nga immawat dagiti tallo nga inauna a kakabsatko. Iti adu a tawen, binusor pay ketdi ni Nanang ti kinapudno ngem, idi agangay, nasdaawkami amin idi inkeddengna ti dumasig ken ni Jehova. Nabautisaran ni Nanang idi agtawen iti 83. Pimmusay idi agtawen iti 96. Inapresiar met ni Tatang ti kinapudno sakbay a pimmusay.

Idi agtawenak iti 17, napanak idiay Winnipeg tapno agsapul iti trabaho ken tapno makitimpuyog kadagidiay makatulong kaniak a mangadal iti Biblia. Maparparitan idi dagiti Saksi ni Jehova, ngem regular a maangay dagiti gimong. Maysa a pribado a balay ti nakaangayan ti damo a gimong a tinabunuak. Yantangay napadakkelak iti pammati ti Griego a Katoliko, karkarna dagiti damo a nangngegko. Ngem in-inut a naawatak no apay a di nainkasuratan ti urnos a pannakaiduma dagiti klero kadagiti parokianoda ken no apay a saan nga anamongan ti Dios ti panangbendision dagiti klero kadagiti gubat. (Isaias 2:4; Mateo 23:8-10; Roma 12:17, 18) Adayo nga ad-adda a praktikal ken rasonable ti agbiag iti Paraiso a daga ngem ti mapan iti adayo a lugar iti agnanayon.

Yantangay kombinsidoak a daytoy ti kinapudno, nagdedikarak ken ni Jehova ket nabautisaranak idi 1942 idiay Winnipeg. Idi 1943, naisardeng ti panangiparit kadagiti Saksi ni Jehova idiay Canada, ket rimmang-ay ti trabaho a panangasaba. Ad-adda met a naipategko ti kinapudno iti Biblia. Naaddaanak iti pribilehio nga agserbi kas iti maawagan ita a panglakayen iti kongregasion kasta met ti pannakipaset kadagiti kampania a panagpalawag iti publiko ken mangasaba kadagiti di madandanon a teritoria. Ti itatabunok kadagiti dadakkel a kombension idiay Estados Unidos ti nangpabileg unay kaniak a rumang-ay iti naespirituan.

Panangpalawa iti Serbisiok ken ni Jehova

Idi 1950, nagpasalistaak kas payunir a ministro, ken idi Disiembre dayta a tawen, naawisak nga agserbi kas manangaywan iti sirkito. Iti sirkito nga asideg idiay Toronto, naikkanak iti gundaway a pormal a masanay babaen ken ni Charlie Hepworth, maysa nga aduan kapadasan ken nasungdo a kabsat. Naragsakanak met a nangbusbos iti maudi a lawas ti panagsanayko babaen ken ni kabsatko nga Alex, nga agserserbi idin kas manangaywan iti sirkito idiay Winnipeg.

Nakallalagip ti damo nga asamblea sirkito a nagserbiak, kas immunan a nadeskribir. Natural a pakaseknak unay ti resultana. Bueno, ti manangaywan iti distritomi, ni Kabsat Jack Nathan, tinulongannakami nga agbalin nga okupado ken naragsak. Impaaymi ti sumario ti programa ti asamblea a kaduami dagiti agpaset. Nagsisinnublatkami a nangisalaysay kadagiti kapadasan, nangensayo kadagiti presentasion a panagbalaybalay, panagsarungkar, ken panangidemostra no kasano ti mangyadal iti Biblia. Kinantami dagiti kanta ti Pagarian. Adu ti taraon. Adda kape ken kankanen iti nganngani kada dua nga oras. Adda dagiti naturog kadagiti bangko ken iti plataporma, bayat a dagiti dadduma naturogda iti suelo. Iti Domingo, kimmalma bassit ti bagyo isu nga adda 96 a timmabuno iti palawag publiko. Dayta a kapadasan insurona kaniak no kasano nga ibturan dagiti narigat a kasasaad.

Iti panagserbik kadagiti dadduma a sirkito, nakagtengak iti makin-amianan nga Alberta, British Columbia, ken iti Yukon Territory, ti makuna a pagilian a di malnekan ti init. Kasapulan ti panagibtur ken panagannad iti panagdaliasat iti lasonglasong nga Alaska Highway manipud Dawson Creek, British Columbia, agingga Whitehorse, Yukon (distansia a 1,477 a kilometro), ken kabayatan ti panangasaba iti dalan. Talaga a nangparigat dagiti panagreggaay ti niebe, dagiti nagalis a bakras ti bantay, ken ti narigat a makita a dalan gapu iti agpuypuyupoy a niebe.

Nasdaawak a nakakita no kasano ti iseserrek ti kinapudno iti Adayo nga Amianan. Naminsan, inasitganmi ken ni Walter Lewkowicz ti maysa a nanumo a bassit a kabin iti asideg ti Lower Post, British Columbia, iti Alaska Highway nga asideg iti beddeng ti Yukon Territory. Ammomi nga adda agnanaed iti kabin agsipud ta adda agkurkuridemdem a silaw nga aggapgapu iti bassit a tawa. Agarup alas nuebe iti rabii idi agtuktokkami iti ridaw. Immunegkami agsipud ta adda nagpukkaw a sumrekkami. Nasorpresakami a makakita iti maysa a lakay a nakaidda iti doble a katre nga agbasbasa iti Pagwanawanan a magasin! Kinapudnona, nabarbaro ti magasinna ngem iti ituktukonmi. Inlawlawagna a maaw-awatna dayta babaen ti koreo. Awan pay kopiami iti kaudian a magasin yantangay walo nga aldawen nga awankami iti kongregasion. Inyam-ammo ti lakay ti bagina kas ni Fred Berg, ken nupay sumagmamano a tawenen nga addaan iti suskripsion, daytoy ti damo a panangbisita kenkuana dagiti Saksi ni Jehova. Pinadagusnakami ni Fred iti dayta a rabii. Inranudmi kenkuana dagiti adu a Nainkasuratan a kinapudno ken inyurnosmi a sarungkaran dagiti Saksi a kanayon a lumablabas iti dayta a lugar.

Iti sumagmamano a tawen, nagserbiak iti tallo a babassit a sirkito, manipud iti Grande Prairie, Alberta, iti daya agingga iti Kodiak, Alaska, iti laud, nga addaan iti distansia a nasurok a 3,500 a kilometro.

Iti naisangsangayan a pamay-an, naammuak a kadagiti naiputputong a lugar, ken iti sadinoman, agpaay iti isuamin ti di kaikarian a kinamanangngaasi ni Jehova ken ti espiritu ti Dios tignayenna dagiti isip ken puso dagidiay siuumiso nga agannayas iti agnanayon a biag. Maysa kadagitoy ni Henry Lepine manipud Dawson City, Yukon, a maawagan ita iti Dawson. Agnanaed ni Henry iti naiputputong a lugar. Kinapudnona, nasurok nga 60 a tawen a saan a pimmampanaw iti pagminasan iti balitok. Ngem ti espiritu ni Jehova tinignayna daytoy agtawen iti 84 a lakay tapno agdaliasat iti nasurok a 1,600 a kilometro nga agturong idiay Anchorage tapno tumabuno iti asamblea sirkito, nupay saan pulos a nakatabuno iti gimong iti kongregasion. Nagustuanna ti programa ken maragsakan unay iti timpuyog. Idi nagsubli iti Dawson City, nagtalinaed ni Henry a matalek agingga iti ipapatayna. Pagsiddaawan dagiti makaam-ammo ken ni Henry no ania ti nangtignay iti daytoy a lakay nga agdaliasat iti kasta kaadayo. Gapu ta kayatda nga ammuen, sumagmamano pay a lallakay ti nangawat iti kinapudno. Isu nga iti saan a direkta a pamay-an, napaneknekan ni Henry ti kinapudno.

Nagun-odak ti Di Kaikarian a Kinamanangngaasi ni Jehova

Idi 1955, naragsakanak a nakaawat iti imbitasion nga agatender iti maika-26 a klase ti Watchtower Bible School of Gilead. Daytoy a panagsanay pinabilegna ti pammatik ken tinulongannak nga umadani ken ni Jehova. Idi nagturposak, naibaonak tapno itultuloyko ti agserbi a kas manangaywan iti sirkito idiay Canada.

Iti agarup makatawen, nagserbiak iti probinsia ti Ontario. Sa naibaonak manen nga agserbi iti nangayed nga Amianan. Nalawag pay iti panunotko dagiti natural a buya dagiti kangrunaan a kalsada, dagiti rumimatrimat a danaw ken kabambantayan a naabbungotan iti niebe dagiti tapawda. Iti kalgaw, makaay-ayo dagiti tanap ken kapanagan a naadornuan kadagiti namaris a balang a sabsabong. Napariir ken nadalus ti danum. Iti natural a naedda, natalna nga agdakdakiwas dagiti oso, lobo, moose, ugsa, ken dadduma pay nga atap nga animal.

Ngem adda dagiti pakarigatan idiay Alaska​—saan laeng a dagiti agbaliwbaliw a paniempo no di pay ket dagiti adayo a luglugar. Ti pagserserbiak a sirkito ket addaan iti kalawa a 3,200 a kilometro manipud daya agingga iti laud. Awan idi ti probision a lugan para kadagiti manangaywan iti sirkito. Dagiti lumugar a kakabsat nagboluntarioda a mangilugan kaniak manipud iti maysa a kongregasion a mapan iti sabali a kongregasion. Ngem no dadduma, kasapulan a makiluganak kadagiti biahero wenno turista.

Adda kasta a napasamak kaniak iti paset ti Alaska Highway iti nagbaetan ti Tok Junction, Alaska, ken Mile 1202, wenno ti lugar ti Scotty Creek. Adda agarup 160 a kilometro a distansia iti nagbaetan dagiti opisina ti aduana kadagitoy a dua a lugar. Limmabasak iti opisina ti aduana ti Estados Unidos idiay Tok ken nagluganak iti agarup 50 a kilometro. Kalpasanna, awan ti limmabas a lugan, ket nagnaak iti agarup sangapulo nga oras, iti distansia a nasurok nga 40 a kilometro. Naammuak idi agangay, a di nagbayag kalpasan a limmabasak iti lugar ti aduana, nagsardeng amin dagiti lugan iti dayta a highway gapu iti panagreggaay ti niebe iti saan nga adayo iti lugar ti aduana. Iti tengnga ti rabii, bimmaba ti temperatura iti agarup -23 degree Celsius, ket agarup 80 a kilometro pay ti kaadayok manipud iti kaasitgan a paglinongan. Kasapulak unay ti paglinongan a mabalinko a paginanaan.

Bayat nga agpilpilayak, nakitak ti maysa a nabaybay-an a lugan iti kalsada, a medio nagaburan iti niebe. Napanunotko a no makastrekak ken mayiddak, malasatak ti nalam-ek a rabii. Naikagumaak nga ikkaten ti niebe a nangserra iti ruangan tapno makastrekak, ngem anian ta naan-anay a nalalatan ti uneg a ti laengen metal ti nabatbati. Ngem makaparagsak ta saan nga adayo iti dalan, nakasarakak iti kabin nga awan linaonna. Narigatanak a simrek iti uneg ti kabin ken nagsindi iti apuy, ngem idi agangay, nakainanaak met laeng iti sumagmamano nga oras. Iti kabigatanna, naipamuspusak ti makilugan agingga iti sumaganad a pagdagusan, a sadiay nakaalaak iti ad-adu a taraon ken natamingko dagiti nasugat a ramayko.

Inyeg ni Jehova ti Panagrang-ay iti Amianan

Makaparegta unay ti damo a panagbisitak idiay Fairbanks. Naballigi ti ministeriomi, ken agarup 50 ti timmabuno iti palawag publiko iti Domingo. Nagtataripnongkami iti bassit a pagtaengan dagiti misionero a pagnanaedan da Vernor ken Lorraine Davis. Iti kosina, kuarto, ken pasilio, adda dagiti mangyal-allingag kadagiti uloda tapno mangngegda ti palawag. Gapu iti kaadu dagiti immay nagdengngeg iti palawag, ammomi a patalgeden ti Kingdom Hall ti panangasaba a trabaho idiay Fairbanks. Isu a babaen ti tulong ni Jehova, nakagatangkami iti dakkel a pasdek, maysa a dati a pagsasalaan, ken inyakarmi dayta a pasdek iti nasayaat a lugar. Adda naipasok a bomba ti danum, ken naikabil dagiti pagdigusan ken pagpapudot a kagawaan. Iti uneg ti makatawen a trabaho, addan maaramat a Kingdom Hall idiay Fairbanks. Kalpasan a naaramid ti kosina, nausar ti pasdek a pakaangayan ti kombension distrito idi 1958, a tinabunuan ti 330 a tattao.

Idi kalgaw ti 1960, nagbiaheak a nagturong iti sangalubongan a hedkuarter dagiti Saksi ni Jehova idiay New York tapno tumabuno iti kurso a panangsanay kadagiti agdaldaliasat a manangaywan iti Estados Unidos ken Canada. Bayat ti kaaddak sadiay, ni Kabsat Nathan Knorr ken dadduma a manangaywan a kakabsat ininterbiudak maipapan iti posibilidad a panaglukat ti sanga nga opisina idiay Alaska. Sumagmamano a bulan kalpasanna, naragsakankami a nakangngeg a mangrugi iti Setiembre 1, 1961, maibangon ti sanga nga opisina idiay Alaska. Natudokan ni Kabsat Andrew K. Wagner a mangiwanwan kadagiti trabaho ti sanga nga opisina. Nagserbida nga agassawa idiay Brooklyn iti 20 a tawen ken addaanda met iti kapadasan kas agdaldaliasat a manangaywan. Ti pannakaibangon ti sanga nga opisina ti Alaska ket maapresiar nga urnos, agsipud ta saanen a kanayon nga agbiahe ti manangaywan iti sirkito, ken ad-adda a maipamaysana nga asikasuen dagiti espesipiko a kasapulan dagiti kongregasion ken naiputputong a teritoria.

Ti kalgaw idi 1962 ket naragsak a tiempo idiay Amianan. Naidedikar ti sanga nga opisina ti Alaska, ken adda kombension distrito a naangay idiay Juneau, Alaska. Naibangon dagiti baro a Kingdom Hall idiay Juneau ken Whitehorse, Yukon, ken nabuangay met ti sumagmamano a naiputputong a grupo.

Panagsubli Idiay Canada

Iti adu a tawen, nakisinnuratak ken ni Margareta Petras a taga Canada. Ni Reta, kas palayawna, ket nangrugi a nagpayunir idi 1947, nagturpos iti Gilead idi 1955, ken agpaypayunir idi iti makindaya a Canada. Inaremko, ket sinungbatannak. Nagkasarkami idiay Whitehorse idi Pebrero 1963. Iti otonio dayta a tawen, naibaonak nga agserbi kas manangaywan iti sirkito iti makinlaud a Canada, ket naragsakkami a nagserbi sadiay iti simmaganad a 25 a tawen.

Gapu ta kimmapuy ti salun-atko, naibaonkami idi 1988 tapno agserbi a kas special pioneer idiay Winnipeg, Manitoba. Karaman iti annongenmi ti panangaywan iti Assembly Hall iti agarup lima a tawen. Agingga a posible, makipaspasetkami latta iti naragsak a trabaho a panagaramid iti adalan. Iti trabaho iti sirkito, nakairugikami iti adu a panagadal iti Biblia nga ituloy nga ikondukta dagiti dadduma. Ita, babaen ti di kaikarian a kinamanangngaasi ni Jehova, dakami a mismo ti mangyadal ket addaankami iti kanayonan a ragsak a makita dagiti estudiante a rumang-ay agingga nga agdedikar ken agpabautisarda.

Kombinsidoak a ti panagserbi ken ni Jehova isu ti kasayaatan a wagas ti panagbiag. Napnuan kaipapanan ken makapnek, ken pabaraenna ti panagayatmi ken ni Jehova iti kada aldaw. Daytoy ti mangyeg kadakami iti pudno a ragsak. Aniaman ti teokratiko nga annongenmi, wenno sadinoman ti pakaibaonanmi, umanamongkami iti salmista a nagkuna: “Naragsak ti ili a ti Diosna isu ni Jehova!”​—Salmo 144:15.

[Ladawan iti panid 24, 25]

Ti panagbisitak iti sirkito

[Ladawan iti panid 25]

Ti panangbisita ken ni Henry Lepine idiay Dawson City. Addaak iti kannigid

[Ladawan iti panid 26]

Ti damo a Kingdom Hall idiay Anchorage

[Ladawan iti panid 26]

Dakami ken ni Reta, idi 1998