“Iti Intero a Daga Rimmuar ti Timekda”

“Mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu.”​—MATEO 28:19.

1, 2. (a) Ania ti imbilin ni Jesus kadagiti adalanna? (b) Apay a dakkel ti nagapuanan dagiti Kristiano idi umuna a siglo?

SAKBAY unay a nagpalangit, binilin ni Jesus dagiti adalanna. Kinunana kadakuada: “Mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu.” (Mateo 28:19) Anian a nagdakkel a trabaho dayta!

² Panunotenyo laengen! Idi Pentecostes 33 K.P., naiparukpok ti nasantuan nga espiritu kadagiti agarup 120 nga adalan ket rinugianda a tinungpal dayta a bilin babaen ti panangipakaammoda a ni Jesus ti naikari a Mesias a mangisalakan. (Aramid 2:1-36) Kasano a ti kasta kabassit a grupo madanonda ‘dagiti tattao iti amin a nasion’? Kasla imposible dayta iti tao, ngem “iti Dios amin a bambanag mabalin.” (Mateo 19:26) Dagiti nagkauna a Kristiano ket sinaranay ti nasantuan nga espiritu ni Jehova, ken saanda a nagpampamayan. (Zacarias 4:6; 2 Timoteo 4:2) Gapuna, iti sumagmamano laeng a dekada, naibaga ni apostol Pablo a naipakaammo ti naimbag a damag “iti isuamin a parsua nga adda iti baba ti langit.”​—Colosas 1:23.

3. Ania ti nangringbaw iti nasin-aw a Kristiano a “trigo”?

³ Nagtultuloy a nagsaknap ti pudno a panagdayaw iti dakkel a paset ti umuna a siglo. Nupay kasta, impakpakauna ni Jesus a mangimulanto ni Satanas “kadagiti dakes a ruot” a mangringbaw iti pudno a Kristiano a “trigo” iti adu a siglo agingga iti tiempo ti panagani. Nangrugi a natungpal dayta kalpasan a natay dagiti apostol.​—Mateo 13:24-39.

Napartak a Panagrang-ay Ita

4, 5. Nangrugi idi 1919, ania a trabaho ti intungpal dagiti napulotan a Kristiano, ket apay a dakkel a karit dayta?

⁴ Idi 1919, panawenen tapno mailasin ti nasin-aw a Kristiano a trigo manipud kadagiti dakes a ruot. Ammo dagiti napulotan a Kristiano a saan pay a nalpas ti dakkel a trabaho nga imbilin ni Jesus. Sititibker a patienda nga agbibiagdan “kadagiti maudi nga aldaw” ken silalagipda iti padto ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (2 Timoteo 3:1; Mateo 24:14) Wen, ammoda nga adu pay ti nasken nga iringpas a trabaho.

⁵ Kaskasdi, kas kadagiti adalan idi 33 K.P., naipasango iti dakkel a karit dagidi a napulotan a Kristiano. Sumagmamano laeng a ribu ti bilangda iti sumagmamano a pagilian. Kasanoda a maikasaba ti naimbag a damag “iti amin a mapagnaedan a daga”? Laglagipenyo a ti populasion ti lubong ket dimmakkel manipud iti nalabit 300 a milion idi panawen ti panagturay dagiti Cesar agingga iti dandani dua a bilion kalpasan ti umuna a sangalubongan a gubat. Ket iti maika-20 a siglo, agtultuloy pay ti napartak a panagrang-ay.

6. Kasano kasaknap ti naimbag a damag idi dekada 1930?

⁶ Kaskasdi, kas kadagiti kakabsatda idi umuna a siglo, dagiti napulotan nga adipen ni Jehova rinugianda nga imbanag dayta a trabaho buyogen ti naan-anay a panagtalek ken ni Jehova, ket adda ti espirituna kadakuada. Idi ngalay ti dekada 1930, agarup 56,000 nga ebanghelisador ti nangideklara iti kinapudno iti Biblia iti 115 a pagilian. Adu ngarud ti nagapuanan ngem adu pay ti nasken a mairingpas.

7. (a) Ania a baro a karit ti naipasango kadagiti napulotan a Kristiano? (b) Babaen ti tulong ti “sabsabali a karnero,” ania ti nagrang-ayan ti trabaho a panagurnong?

⁷ Kalpasanna, maysa a baro a karit kadakuada no kasanoda a matarusan a naimbag ti kinasiasino ti “dakkel a bunggoy” a nadakamat iti Apocalipsis 7:9, a nangipanamnama nga addanto tumulong kadagiti nagaget a Kristiano. Maysa a di mabilang a bunggoy dagiti “sabsabali a karnero,” dagidiay manamati nga addaan iti naindagaan a namnama, ti nasken a maurnong “manipud kadagiti amin a nasion ken kadagiti tribu ken kadagiti ili ken kadagiti pagsasao.” (Juan 10:16) ‘Mangipaayda ken ni Jehova iti sagrado a panagserbi iti aldaw ken rabii.’ (Apocalipsis 7:15) Kaipapananna dayta a tumulongda iti trabaho a panangasaba ken panangisuro. (Isaias 61:5) Kas resultana, anian a ragsak dagiti napulotan a Kristiano a makakita iti iyaadu dagiti ebanghelisador manipud iti pinullo ribu agingga iti minilion. Iti tawen 2003, adda baro a kangatuan a bilang nga 6,429,351 a nakiraman iti panangasaba a trabaho​—a kaaduan kadakuada ti kameng ti dakkel a bunggoy.a Agyaman dagiti napulotan a Kristiano iti daytoy a tulong, ket agyaman met dagiti sabsabali a karnero gapu iti pribilehio a matulonganda dagiti napulotan a kakabsatda.​—Mateo 25:34-40.

8. Ania ti inaramid dagiti Saksi ni Jehova iti sidong ti nakaro a pannakasuot kabayatan ti maikadua a sangalubongan a gubat?

⁸ Idi nagminar manen ti klase trigo, nakaro a binusor ida ni Satanas. (Apocalipsis 12:17) Ania ti reaksionna idi mangrugi nga agparang ti dakkel a bunggoy? Nakaro ti pungtotna! Pagduaduaantay pay aya nga isu ti nangisungsong kadagiti sangalubongan a panangraut iti pudno a panagdayaw kabayatan ti maikadua a sangalubongan a gubat? Iti agsinnumbangir a dasig dagiti agdadangadang, naipasango dagiti Kristiano iti dakkel a pakarigatan. Adu a patpatgen a kakabsat a lallaki ken babbai ti nagsagaba iti nakaro a pakasuotan, natay ti dadduma gapu iti pammatida. Ngem inyaplikarda ti kinuna ti salmista: “Iti pannakikaykaysa iti Dios idaydayawkonto ti saona. Iti Dios inkabilko ti panagtalekko; saanakto nga agbuteng. Ania ti maaramidan kaniak ti lasag?” (Salmo 56:4; Mateo 10:28) Sangsangkamaysa a nagtalinaed a sititibker dagiti napulotan a Kristiano ken ti sabsabali a karnero babaen ti panangpabileg ti espiritu ni Jehova. (2 Corinto 4:7) Kas resultana, “rimmang-ay ti sao ti Dios.” (Aramid 6:7) Idi bimtak ti gubat idi 1939, adda nagreport a 72,475 a matalek a Kristiano a makipaspaset iti panangasaba. Ngem ti saan a kompleto a report idi 1945, ti tawen a nagpatingga ti gubat, ipalgakna nga adda 156,299 nga aktibo a Saksi a mangirakrakurak iti naimbag a damag. Anian a pannakaabak ni Satanas!

9. Aniada a baro nga eskuelaan ti naluktan kabayatan ti Gubat Sangalubongan II?

⁹ Nalawag nga uray nariribuk ti maikadua a sangalubongan a gubat, sigurado dagiti adipen ni Jehova a maibanag ti trabaho a panangasaba. Kinapudnona, idi 1943, kabayatan ti kangitingitan ti gubat, naluktan ti dua nga eskuelaan. Ti maysa, a maaw-awagan ita kas ti Teokratiko nga Eskuelaan ti Panagministro, ket maikonkondukta iti amin a kongregasion tapno mangsanay iti tunggal Saksi a mangasaba ken mangaramid kadagiti adalan. Ti maikadua, ti Watchtower Bible School of Gilead, ket nairanta a mangsanay kadagiti misionero a mangyadelantar iti trabaho a panangasaba kadagiti sabali a pagilian. Wen, idi nagpatingga ti gubat, nakasagana dagiti pudno a Kristiano para iti dakdakkel a trabaho.

10. Kasano karegta ti ili ni Jehova kabayatan ti 2003?

¹⁰ Ket anian a nagsayaat ti nagapuananda! Gapu ta nasanayda iti Teokratiko nga Eskuelaan ti Panagministro, aminda​—ubbing ken nataengan, nagannak ken annak, uray dagidiay nakapuy ti salun-atda​—nakiraman ken intultuloyda nga intungpal ti dakkel a trabaho nga imbilin ni Jesus. (Salmo 148:12, 13; Joel 2:28, 29) Idi tawen 2003, adda promedio kada bulan a 825,185 a nangipakita iti kinaganetget babaen ti panagpayunirda, temporario man wenno agtultuloy. Iti dayta met laeng a tawen, nangbusbos dagiti Saksi ni Jehova iti 1,234,796,477 nga oras a nangisarita iti naimbag a damag ti Pagarian. Sigurado a naay-ayo ni Jehova iti kinaregta ti ilina!

Kadagiti Ganggannaet a Teritoria

11, 12. Aniada a pagarigan ti mangipakita iti nasayaat a rekord dagiti misionero?

¹¹ Kadagiti naglabas a tawtawen, nagsayaat ti rekord dagiti nagturpos iti Gilead ken dagiti nabiit pay a nagturpos iti Ministerial Training School. Idiay Brazil, kas pagarigan, nababbaba ngem 400 ti bilang dagiti agibumbunannag idi simmangpet dagiti immuna a misionero idi 1945. Dagitoy ken dagiti simmaruno pay a misionero ti sireregta a nakipagtrabaho kadagiti kakabsat a taga Brazil, ket sibabaknang a binendisionan ni Jehova ti panagreggetda. Kadagidiay makalagip iti nagkauna nga al-aldaw, anian a makaparagsak a makitada ti inreport ti Brazil a baro a kangatuan a bilang nga 607,362 idi 2003!

¹² Usigenyo ti Japan. Sakbay ti maikadua a sangalubongan a gubat, agarup sangagasut ti mangikaskasaba iti Pagarian iti dayta a pagilian. Kabayatan ti gubat, nakissayan ti bilangda gapu iti nakaro a pannakaidadanes, ket iti arinunos ti gubat, sumagmamano laengen a Saksi ti nagtalinaed a nabileg iti naespirituan ken iti pisikal. (Proverbio 14:32) Dagidi a sumagmamano a nangsalimetmet iti kinatarnawda ti awan duadua a naragsakan idi 1949, idi inabrasada ti umuna a 13 a misionero a nagturpos iti Gilead, ket dagus nga inapresiar dagiti misionero ti kinabara ken kinamanagpadagus dagiti kakabsat a Hapon. Kalpasan ti nasurok a 50 a tawen, iti tawen 2003, nagreport ti Japan iti kangatuan a bilang a 217,508 nga agibumbunannag! Pudno a sibabaknang a binendisionan ni Jehova dagiti adipenna iti dayta a pagilian. Adda dagiti umasping a report manipud kadagiti adu a sabali pay a pagilian. Dagidiay makabael a mangasaba kadagiti sabali a pagilian dakkel ti naitulongda iti pannakaisaknap ti naimbag a damag. Gapuna idi 2003, naisaknap dayta iti 235 a pagilian, isla, ken teritoria iti intero a lubong. Wen, ti dakkel a bunggoy naggapuda “kadagiti amin a nasion.”

“Manipud Kadagiti Amin a . . . Tribu ken Kadagiti Ili ken Kadagiti Pagsasao”

13, 14. Iti ania a pamay-an nga impakita ni Jehova ti pateg ti panangikasaba iti naimbag a damag “kadagiti amin a . . . pagsasao”?

¹³ Ti umuna a naipadamag a milagro kalpasan ti pannakapulot dagiti adalan iti nasantuan nga espiritu idi Pentecostes 33 K.P. isu ti panagsaoda iti nadumaduma a lenguahe kadagiti naummong a bunggoy. Mabalin a dagiti amin nga agdengdengngeg kadakuada makapagsaoda iti maysa nga internasional a lenguahe, nalabit Griego. Kas “nadayaw a lallaki,” mabalin a maawatanda met dagiti Hebreo a sermon idiay templo. Ngem talaga a naala ti atensionda idi mangngegda ti naimbag a damag iti lenguahe a nakayanakanda.​—Aramid 2:5, 7-12.

¹⁴ Uray ita, adu a lenguahe ti maus-usar iti panangasaba. Naipadto a ti dakkel a bunggoy aggapuda saan laeng a kadagiti nasion no di pay ket “kadagiti tribu ken kadagiti ili ken kadagiti pagsasao.” Maitunos iti dayta, impakpakauna ni Jehova babaen ken Zacarias: “Sangapulo a lallaki manipud kadagiti amin a pagsasao ti nasnasion kumpetdanto, wen, pudno a kumpetdanto iti pandiling ti maysa a lalaki a Judio, a kunkunada: ‘Kumuyogkaminto kadakayo, ta nangngegmi a ti Dios adda kadakayo.’” (Zacarias 8:23) Nupay awanen kadagiti Saksi ni Jehova ti sagut a makapagsao iti nadumaduma a lenguahe, ammoda a napateg ti panangisuro kadagiti tattao iti lenguahe a maawatanda.

15, 16. Ania ti inaramid dagiti misionero tapno mapagballigianda ti karit ti panangasaba kadagiti lokal a pagsasao?

¹⁵ Pudno, adda ita ti sumagmamano a nasaknap a maus-usar a lenguahe, kas iti Ingles, Pranses, ken Espaniol. Ngem kadagidiay pimmanaw iti lugar a nakayanakanda tapno agserbi kadagiti sabali a pagilian, inkagumaanda nga inadal dagiti lokal a pagsasao tapno maikasabada ti naimbag a damag kadagidiay “siuumiso nga agannayas iti agnanayon a biag.” (Aramid 13:48) Mabalin a narigat dayta. Idi a dagiti kakabsat iti pagilian ti Tuvalu idiay Sud Pacifico kinasapulanda dagiti publikasion a naipatarus iti pagsasaoda, maysa kadagiti misionero ti nangawat iti dayta a karit. Gapu ta awan idi ti magun-od a diksionario, rinugianna ti nagaramid iti glosario dagiti Tuvaluan a sasao. Idi agangay, naipablaak iti Tuvaluan ti libro a Mabalinyo ti Agbiag nga Agnanayon iti Paraiso a Daga.b Idi simmangpet dagiti misionero idiay Curaçao, awan dagiti literatura ti Biblia ken diksionario iti pagsasao a Papiamento. Nadumaduma pay idi ti kapanunotan no kasano a maisurat dayta a lenguahe. Kaskasdi, iti uneg ti dua a tawen kalpasan a simmangpet dagiti immuna a misionero, naipablaak iti dayta a lenguahe ti umuna a naibatay-Biblia a Nakristianuan a polieto. Ita, ti Papiamento ti maysa kadagiti 133 a lenguahe a pakaipabpablaakan Ti Pagwanawanan a kagiddan ti Ingles.

¹⁶ Idiay Namibia, dagiti immuna a misionero awan ti masarakanda a lumugar a Saksi a mabalin a tumulong kadakuada iti panagipatarus. Kanayonanna, ti lokal a pagsasao a Nama ket kurang kadagiti bokabulario para kadagiti gagangay a konsepto, kas iti sao a “perpekto.” Kuna ti maysa a misionero: “Tapno makaipatarusak, nagpatulongak kadagiti mannursuro iti eskuelaan nga agad-adal iti Biblia. Gapu ta bassit pay ti pannakaammoda iti kinapudno, masapul idi a makidiskusionak kadakuada tapno masiguradok nga umiso ti tunggal sasao nga usarek.” Kaskasdi, naipatarus met laeng ti polieto a Biag iti Baro a Lubong iti uppat a pagsasao ti Namibia. Ita, regular a maipabpablaak Ti Pagwanawanan iti pagsasao a Kwanyama ken Ndonga.

17, 18. Aniada a karit ti nataming idiay Mexico ken iti dadduma a pagilian?

¹⁷ Idiay Mexico, Espaniol ti kangrunaan a lenguaheda. Ngem sakbay a dimteng dagiti Espaniol, adu a lenguahe ti maus-usar, ket dadduma kadagita ti maus-usar agingga ita. Gapuna, ti literatura dagiti Saksi ni Jehova ket maipabpablaak ita iti pito a pagsasao ti Mexico ken uray iti Mexican Sign Language. Ti Maya a Ministerio ti Pagarian ti damo a regular a maipabpablaak a publikasion iti lenguahe dagiti Americano nga Indian. Kinapudnona, sumagmamano a ribu a Maya, Aztec, ken dadduma pay ti karaman kadagiti 572,530 nga agibumbunannag iti Pagarian idiay Mexico.

¹⁸ Iti di pay nabayag, minilion ti nagbakuit kadagiti sabali a pagilian, wenno immakarda gapu iti rigat ti biag. Kas resultana, adu a pagilian ita ti addaan iti dakkel a populasion a ganggannaet ti pagsasaoda. Sinango dagiti Saksi ni Jehova dayta a karit. Idiay Italia, kas pagarigan, adda 22 a lenguahe iti nagduduma a kongregasion ken grupo, malaksid pay iti pagsasao ti Italia. Tapno makasabaan dagiti kakabsat dagidiay ganggannaet ti pagsasaoda, nayurnos dagiti klase a mangisuro iti 16 a lenguahe, agraman ti Italian Sign Language. Iti adu a sabali pay a pagilian, kasta met laeng ti ar-aramiden dagiti Saksi ni Jehova tapno makasaritada ti dakkel a populasion dagiti imigrante. Wen, babaen ti tulong ni Jehova, pudno a ti dakkel a bunggoy aggapuda manipud iti adu a pagsasao.

“Iti Intero a Daga”

19, 20. Ania a sasao ni Pablo ti matungtungpal ita iti naisangsangayan a pamay-an? Ilawlawagyo.

¹⁹ Idi umuna a siglo, insurat ni apostol Pablo: “Napaayda aya a dimngeg? Ay ket, iti kinapudnona, ‘iti intero a daga rimmuar ti timekda, ket agingga kadagiti ungto ti mapagnaedan a daga ti sasaoda.’” (Roma 10:18) No natungpal dayta idi umuna a siglo, ad-adda pay ita! Minilion​—nalabit ita pay laeng a kastoy kaadu​—ti agkunkuna: “Bendituekto ni Jehova iti amin a tiempo; patinayon a ti pakaidaydayawanna addanto iti ngiwatko.”​—Salmo 34:1.

²⁰ Maysa pay, saan a gimminad ti trabaho. Agtultuloy a ngumatngato ti bilang dagiti agibumbunannag iti Pagarian. Umad-adu ti oras a mabusbusbos iti panangasaba. Minilion a panagsarungkar ken ginasut a ribu a panangyadal iti Biblia ti maikonkondukta. Adu pay ti mangipakpakita iti interes. Itay napan a tawen, maysa a baro a kangatuan a bilang a 16,097,622 ti timmabuno iti Pananglaglagip iti ipapatay ni Jesus. Nalawag, adu pay ti nasken nga iringpas. Sapay koma ta tuladentayo ti natibker a kinasungdo dagiti kakabsattayo a nangibtur iti nakaro a pannakaidadanes. Ken sapay koma ta tuladentayo ti kinaregta dagiti amin a kakabsattayo a nagserbi ken ni Jehova sipud idi 1919. Itultuloy koma nga ipangag ti amin ti kanta ti salmista: “Tunggal agang-anges a banag​—idaydayawna koma ni Jah. Idaydayawyo ni Jah!”​—Salmo 150:6.

[Footnotes]

Mailawlawagyo Kadi?

• Ania a trabaho ti intungpal dagiti kakabsat idi 1919, ken apay a makakarit dayta?

• Siasino dagiti naurnong a mangsuporta iti trabaho a panangasaba?

• Ania a rekord ti impasdek dagiti misionero ken dadduma nga agserserbi kadagiti sabali a pagilian?

• Adda kadi ammoyo a pagarigan a mangipakita a bembendisionan ni Jehova ti trabaho ti ilina ita?

[Tsart iti panid 18-21]

REPORT TI 2003 A TAWEN SERBISIO DAGITI SAKSI NI JEHOVA ITI SANGALUBONGAN

(Kitaem ti bound volume)

[Dagiti Ladawan iti panid 14, 15]

Nupay nariribuk ti maikadua a sangalubongan a gubat, agtalek dagiti Kristiano a maikasaba ti naimbag a damag

[Credit Line]

Panagbettak: retrato ti U.S. Navy; dadduma: retrato ti U.S. Coast Guard

[Dagiti Ladawan iti panid 16, 17]

Aggapu ti dakkel a bunggoy manipud iti amin a tribu ken pagsasao