Mapagballigianyo ti Di Kinasigurado
“SIGURADO!” “Sierto dayta!” “Garantisado!” Awan duadua a namin-adun a nangngegyo dagiti kasta nga ebkas. Ngem iti inaldaw a panagbiagtayo, manmano dagiti masiguradotayo. Adu a banag ti ditay masinunuo iti biag, a masansan a panunotentayo no adda ngata aniaman a talaga a masiguradotayo. Ti panagduadua ken di kinasigurado ket agparang a paseten ti biag.
Di pagsiddaawan a tarigagayan ti kaaduan a tattao a maaddaanda ken ti pamiliada iti kinatalged ken kinaragsak. Siaanep nga agtrabahoda tapno magun-odda dagiti banag a patienda a mangparagsak ken mangted kadakuada iti kinatalged—kaaduanna a kuarta ken material a sansanikua. Nupay kasta, mabalin a giddato a madadael dagita nga ik-ikutan no agginggined, agbagyo, adda aksidente, wenno no mapasamak ti nakaro a krimen. Mabalin a kellaat a maapektaran ti biag gapu iti nakaro a sakit, diborsio, wenno pannakaikkat iti trabaho. Pudno, mabalin a saanmo a personal a mapasaran dagita. Kaskasdi, makaburibor ken makapadanag no ammom a mabalin nga adda dakes a mapasamak iti aniaman nga oras. Ngem saan laeng a dayta ti parikut.
Ti sao a di kinasigurado ket umarngi iti panagduadua. Maysa a diksionario ti nangdepinar iti “panagduadua” kas “di kinasigurado iti patpatien wenno kapanunotan a masansan a makalapped iti panagdesision.” Kanayonanna, sigun iti libro a Managing Your Mind, “ti di kinasigurado iti napateg a banag ket maysa a dakkel a makagapu iti panagsikor ken panagdanag.” Ti di malawlawagan a panagduadua ket mangitunda iti panagsikor, pannakapaay, ken unget. Wen, ti panangpampanunot iti posible wenno saan a posible a mapasamak madangranna ti mental ken pisikal a salun-attayo.
Kas resultana, sabali met ti agbalin a kapanunotan ti dadduma a tattao. Kasda la iti agtutubo a taga Brazil a nangikuna: “Apay a pakaseknam no anianto ti mapasamak? Ti agdama ti panunotem, ket inton bigatmo a panunoten ti masanguanan.” Ti kasta a panagpannuray iti makunkuna a gasat, ti “mangan ken uminumtayo” a kababalin, ket agbanag laeng iti pannakapaay, rigat, ken kamaudiananna, ipapatay. (1 Corinto 15:32) Adayo a nasaysayaat nga agtalektayo iti Namarsua, ni Jehova a Dios. Kuna ti Biblia maipapan kenkuana: “Awan ti panagbaliw ti pagturongan ti anniniwan.” (Santiago 1:17) No sukimatentayo ti Sao ti Dios, ti Biblia, makasaraktayo iti nasayaat a balakad ken pannakaiwanwan no kasanotayo a mapagballigian dagiti di kinasigurado iti biag. Matulongannatayo met a mangtarus no apay a nakaro ti di kinasigurado.
No Apay a Di Sigurado
Mangipaay ti Kasuratan iti realistiko a panangmatmat iti biag ken tulongannatayo a mangsukay iti umiso a panangmatmat mainaig iti panagbalbaliw ken kadagiti di sigurado a banag ken kasasaad. Nupay makaipaay iti kinatalged ti panagtitinnulong ti pamilia, sosial a kasasaad, kinalaing, karadkad, ken dadduma pay, ipakita ti Biblia a ditay manamnama nga agtultuloy dayta wenno namnamaen a mangiturong dayta iti “suerte” a biag. Kinuna ni masirib nga Ari Solomon: “Ti lumba awan kadagiti nasiglat, ti gubat awan met kadagidiay mannakabalin, ti taraon awan met kadagiti masirib, ti kinabaknang awan met kadagidiay mannakaawat, ti parabur awan met uray kadagidiay addaan pannakaammo.” Apay? “Agsipud ta ti tiempo ken ti di mapakpakadaan a pasamak mapagteng kadakuada amin.” Gapuna, impakdaar ni Solomon: “Kas kadagiti ikan a maal-ala iti dakes nga iket, ken kas kadagiti tumatayab a matiltiliw iti silo, kasta ti pannakasilo ti annak ti tattao iti makadidigra a tiempo, inton giddato nga umapay dayta kadakuada.”—Eclesiastes 9:11, 12.
Nadakamat met ni Jesu-Kristo nga addanto ti maysa a kaputotan a makarikna iti nakaro a panagdanag ken kinaawan iti kinatalged. Iti nalawag a sasao, kinunana: “Addanto dagiti pagilasinan iti init ken bulan ken kadagiti bituen, ket iti daga tuok dagiti nasion, a saanda nga ammo ti ruaran gapu iti panagdaranudor ti baybay ken ti panagkiburna, bayat a mataltalimudaw dagiti tattao gapu iti buteng ken panangpadpadaan iti bambanag nga um-umay iti mapagnaedan a daga; ta mapagkintayegto dagiti pannakabalin ti langlangit.” Kaskasdi, impatuldo ni Jesus ti makaparegta a banag para kadagiti nasingpet-panagpuspusoda a tattao iti agdama: “Inton makitayo a mapaspasamak dagitoy a banag, ammuenyo a ti pagarian ti Dios asidegen.” (Lucas 21:25, 26, 31) Kasta met, imbes a mabutengtayo gapu ta ditay masigurado ti masanguanan, addaantayo iti pammati iti Dios a tumulong kadatayo a mangnamnama iti nakasaysayaat, natalged a masanguanan iti laksid ti nalawag a kinaawan iti kinasigurado iti lubong ita.
‘Addaan iti Naan-anay a Pammasiguro iti Namnama’
Nupay ditay masigurado ti tunggal banag a mangngeg, mabasa, wenno makitatayo, addaantayo iti umiso a rason nga agtalek iti Namarsua. Saan laeng nga isu Daydiay Katan-okan no di ket maysa a naayat nga Ama a maseknan kadagiti annakna ditoy daga. Maipapan iti sasaona, kinuna ti Dios: “Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”—Isaias 55:11.
Ni Jesu-Kristo insurona ti kinapudno manipud iti Dios, ket adu a dimngeg kenkuana ti nangawat iti dayta buyogen ti kombiksion ken panagtalek. Kas pagarigan, maysa a grupo dagiti nasingpet-panagpuspusoda a Samaritano ti nagkuna iti babai nga immuna a dimngeg ken ni Jesus: “Saankamin a mamati laeng gapu iti saom; ta dakami a mismo nangngegmi ket ammomi a daytoy a tao sigurado nga isu ti manangisalakan ti lubong.” (Juan 4:42) Kasta met ita, nupay agbibiagtayo iti tiempo nga awan ti kinatalged, siguradotayo iti patpatientayo.
No maipapan iti narelihiosuan a patpatien, adu dagiti umanamong iti kapanunotan a nasken a patien lattan ti maysa a banag, imbes nga ikagumaan a tarusan. Ngem saan a kasta ti kapanunotan ti mannurat ti Biblia a ni Lucas. Talaga a nagsukimat ken nangipaay iti umiso nga impormasion tapno dagiti sabsabali ‘naan-anay a maammuanda ti kinapudno ti bambanag’ nga insuratna. (Lucas 1:4) Yantangay nalabit a madanagan dagiti kapamilia ken gagayyemtayo a ditay kapammatian di la ket ta agsagabatayo iti pannakaupay ken pannakapaay, napateg nga ammotayo nga idepensa ti pammatitayo. (1 Pedro 3:15) Matulongantayo dagiti sabsabali nga agtalek iti Dios no ammotayo ti umiso a rason ti patpatientayo. Kastoy ti panangdeskribir ti Biblia ken ni Jehova: “Ti Bato, naan-anay ti aramidna, ta amin a daldalanna kinahustisia. Maysa a Dios ti kinamatalek, a kenkuana awan ti di kinahustisia; isu nalinteg ken napalungdo.”—Deuteronomio 32:4.
Usigenyo dayta naudi a sasao: “Isu nalinteg ken napalungdo.” Kasano a masiguradotayo a pudno dayta? Naan-anay a kombinsido ni apostol Pedro iti dayta a kinapudno. Imbagana iti maysa a Romano nga opisial ken iti pamiliana: “Iti kinapudnona makitak a ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Nakuna dayta ni Pedro agsipud ta nasaksianna no kasano a ti Dios a mismo inturongna dagiti bambanag a nagresulta iti pananganamongna iti maysa a pamilia dagiti Gentil, a dati a mamatmatan a narugit ken di makaay-ayo. Kas ken ni Pedro, makombinsirtayo met iti di panangidumduma ken kinalinteg ti Dios no masaksiantayo a mismo ti “maysa a dakkel a bunggoy” dagiti tattao—nga agdagup iti innem a milion—manipud iti nasurok a 230 a pagilian iti intero a lubong, a nangiwaksi iti dati a panagbiagda ket magmagnada iti dana ti kinalinteg.—Apocalipsis 7:9; Isaias 2:2-4.
Kas pudno a Kristiano, kayattayo ti agbalin a napakumbaba ken rasonable, saan ket a panatiko wenno dogmatiko. Kaskasdi, saantay a pagduaduaan ti patpatientayo ken ti namnamaentayo iti masanguanan. Kadagiti Kristiano idi umuna a siglo, kinuna ni apostol Pablo: “Tarigagayanmi a tunggal maysa kadakayo mangipakita iti isu met laeng a kinagaget tapno maaddaan iti naan-anay a pammasiguro iti namnama agingga iti panungpalan.” (Hebreo 6:11) Uray ti naimbag a damag manipud iti Biblia impaayannatayo iti “naan-anay a pammasiguro iti namnama.” Dayta a namnama, a sititibker a naibatay iti Sao ti Dios, “saan a mangiturong iti pannakaupay,” kas inlawlawag ni Pablo.—Roma 5:5.
Kanayonanna, naan-anay a kombinsidotayo a ti panangisuro kadagiti sabsabali maipapan iti naimbag a damag manipud iti Biblia ipaayanna ida iti kinatalged iti naespirituan, ken uray iti emosional ken pisikal. Kas ken ni Pablo, maibagatayo met: “Ti naimbag a damag nga ikaskasabami saan a dimteng kadakayo buyogen ti sasao laeng no di ket kasta met a buyogen ti pannakabalin ken buyogen ti nasantuan nga espiritu ken nabileg a panamati.”—1 Tesalonica 1:5.
Dagiti Agdama a Bendision a Resulta ti Natalged nga Espiritualidad
Nupay saantayo a namnamaen ti naan-anay a kinatalged iti biag ita, adda dagiti banag a maaramidtayo a tumulong kadatayo a maaddaan iti relatibo a natalged a biag. Kas pagarigan, ti regular a pannakigimong iti kongregasion Kristiano mangyeg iti kinatalged agsipud ta maisuro kadatayo dagiti umiso ken nasayaat a prinsipio ken galad. Insurat ni Pablo: “Ibilinmo kadagidiay babaknang itoy agdama a sistema ti bambanag a saanda koma a napalangguad, ken isadagda ti namnamada, saan nga iti pagduaduaan a kinabaknang, no di ket iti Dios, a sibabaknang a mangipaay kadatayo iti amin a bambanag a pagragsakantayo.” (1 Timoteo 6:17) Babaen ti pannakaisuroda nga agtalek ken ni Jehova saan ket a kadagiti aglabas a material a bambanag wenno ragragsak, adu dagiti nakaliklik iti pakaringgoran ken pannakapaay a sagsagabaenda idi.—Mateo 6:19-21.
Iti kongregasion, tagiragsakentayo met ti nabara a panagkakabsat, a tumulong ken sumuporta kadatayo iti adu a pamay-an. Naminsan iti ministeriona, da apostol Pablo ken dagiti kakaduana nga agdaldaliasat nakariknada iti ‘nakaro a pannakapadagsen’ ken ‘saan a pannakasigurado uray iti biagda.’ Nakasarakan ni Pablo iti tulong ken bang-ar? Siempre, saan a nagpangadua iti panagtalekna iti Dios. Nupay kasta, pinaregta ken liniwliwa dagiti padana a Kristiano, nga immay timmulong kenkuana. (2 Corinto 1:8, 9; 7:5-7) Ita, no dumteng dagiti natural a didigra wenno dadduma a kalamidad, kanayon a dagiti kakabsattayo a Kristiano ti umuna nga umay mangipaay iti kasapulan a material ken naespirituan a tulong kadagiti pada a Kristiano ken uray kadagiti sabsabali.
Ti sabali pay a makatulong tapno ditay malapunos kadagiti di kinasigurado iti biag isu ti panagkararag. Kanayon a mabalintay ti umadani iti naayat a nailangitan nga Amatayo no adda dagiti di ninamnama a pakarigatan. “Ni Jehova agbalinto a natalged a kamang maipaay iti asinoman a nailupitlupit, natalged a kamang kadagiti tiempo ti riribuk.” (Salmo 9:9) Dagiti imperpekto a nagannak mabalin a saanda a kanayon a masalakniban dagiti annakda. Nupay kasta, sidadaan ti Dios a tumulong kadatayo a mangdaer kadagiti pakadanagan ken rikna ti kinaawan talged. No ipalladawtayo ken ni Jehova dagiti pakadanagantayo babaen ti kararag, masiguradotayo a kabaelanna ti “mangaramid a nawadwadwad unay a lab-awanna ti amin a bambanag a dawaten wenno panunotentayo.”—Efeso 3:20.
Regular kadi ti panagkararagyo iti Dios? Kombinsidokayo kadi a denggen ti Dios dagiti kararagyo? “Imbaga ni nanangko a nasken nga agkararagak iti Dios,” kinuna ti maysa a balasitang idiay São Paulo. “Ngem inyimtuodko iti bagik: ‘Apay a makisaoak iti diak am-ammo?’ Nupay kasta, tinulongannak ti Proverbio 18:10 a mangtarus a kasapulantayo ti tulong ti Dios ket nasken ngarud nga agkararagtayo kenkuana.” Kinuna dayta a teksto: “Ti nagan ni Jehova ket napigsa a torre. Iti dayta nga agtaray ti nalinteg ket maipaayan iti salaknib.” Kinapudnona, kasanotayo a masukay ti panagtalek ken panagkompiansa ken ni Jehova no saantay nga iyugali ti makitungtong kenkuana? Tapno mabendisionantayo iti naespirituan a kinatalged, kasapulan nga iyugalitayo ti inaldaw a naimpusuan a panagkararag. Kinuna ni Jesus: “Ngarud, agtalinaedkayo a siririing iti isuamin a tiempo nga umar-ararawkayo tapno makapagballigikayo iti pananglisi kadagitoy amin a banag a naikeddeng a mapasamak, ken iti panagtakder iti sanguanan ti Anak ti tao.”—Lucas 21:36.
Ti maysa a banag a masiguradotayo isu ti namnamatayo iti Pagarian ti Dios. Imutektekanyo ti ibaga ti Daniel 2:44: “Mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.” Natalged ken masiguradotayo dayta a namnama. Masansan a mapaay dagiti kari ti tao, ngem kanayon a makapagtalektayo iti sao ni Jehova. Imbes a di mapagpannurayan, ti Dios ket maysa a dakkel a bato a mabalintayo a pagsadagan. Mariknatayo ti kas iti narikna ni David, a nagkuna: “Ti Diosko isu ti batok. Agkamangakto kenkuana, kalasagko ken sara ti pannakaisalakanko, natalged a kamangko, ken disso a pagkamangak, Manangisalakanko; manipud kinaranggas isalakannak.”—2 Samuel 22:3.
Ti nadakamat a libro a Managing Your Mind kunana pay: “Bayat a pampanunoten ti maysa a tao ti maipapan kadagiti dakes a banag a mabalin a mapasamak, ad-adda a pumayso dagita iti panunotna, ket ad-addan a dinanto ammo no kasano a daeran dagita.” No kasta, apay a bay-antayo a madagsenantayo kadagiti pakaringgoran ken di kinasigurado iti daytoy a lubong? Imbes a kasta, agtalekkayo, saan a kadagiti di sigurado a banag iti daytoy a lubong, no di ket kadagiti sigurado a kari ti Dios. Babaen ti panangsalimetmet iti natibker a pammatitayo kadagiti di mapaay a kari ni Jehova, addaantayo kadagitoy a pammatalged: “Awan asinoman a mangisaad iti pammatina kenkuana ti maupayto.”—Roma 10:11.
[Blurb iti panid 29]
Ti Sao ti Dios patalgedanna dagiti masanguanan a bendision agpaay iti sangatauan
[Blurb iti panid 30]
“Awan asinoman a mangisaad iti pammatina kenkuana ti maupayto”
[Ladawan iti panid 31]
Ti naimbag a damag ti Pagarian mangyeg iti kinatalged kadagiti tattao