Report Dagiti Manangiwaragawag iti Pagarian

Panangasaba Kadagiti Tattao iti Pagtrabahuanda

ANIA ti nagpapadaan da apostol Mateo, Pedro, Andres, Santiago, ken Juan? Addada amin iti pagtrabahuanda idi kinasabaan ida ni Jesus. Agkalkalap da Pedro, Andres, Santiago, ken Juan idi iyawis kadakuada ni Jesus: “Surotendak.” Adda ni Mateo iti pagsingiran iti buis idi naawis nga agbalin nga adalan ni Jesus.​—Mateo 4:18-21; 9:9.

Mabalin a nabunga ti panangasaba kadagiti tattao iti pagtrabahuanda. Ammo dayta dagiti Saksi ni Jehova idiay Japan isu nga itay nabiit, sangsangkamaysa nga inkagumaanda ti nakiraman iti kasta nga aspeto ti ministerio. Ania dagiti resulta? Iti las-ud ti sumagmamano a bulan, rinibu ti nasarungkaran, ket agarup 250 ti narugian a mayadalan iti Biblia. Imutektekanyo dagiti sumaganad a kapadasan.

Maysa nga amin-tiempo a ministro idiay Tokyo ti nakisarita iti manedyer ti restawran a nakasao ti maysa a Saksi 30 a tawenen ti napalabas. Nupay awan unay idi ti naawatanna kadagiti nangngegna kas maysa nga estudiante, naginteres daytoy a manedyer iti ibagbaga ti Biblia. Natukay manen ti interesna ket nakipagadal iti Biblia iti tulong ti libro a Pannakaammo a Mangiturong iti Biag nga Agnanayon.a Malaksid iti dayta, inrugina ti personal a programa a panagbasa iti Biblia iti kada rabii sakbay a maturog.

Adda special pioneer a ministro a simmarungkar iti maysa nga opisina ket nagtelepono iti manedyer. Nupay dina nakasao ti manedyer, inyimtuod ti agkabannuag a babai a simmungbat iti telepono, “Kayatdak kadi a kasao?” Kalpasan ti ababa a panagsarita iti telepono, rimmuar ti babai ket kinunana a kayatna ti agbasa iti Biblia. Inkari ti special pioneer nga ikkannanto iti Biblia iti panagsublina ket rinugianna nga inyadalan iti Biblia, iti maysa nga asideg a parke sakbay ti panagtrabaho ti babai iti agsapa.

Iti sabali nga opisina, nakita ti maysa a lalaki a ti katrabahuanna immawat kadagiti magasin a Pagwanawanan ken Agriingkayo! ngem dagus nga imbellengna dagitoy apaman a nakapanaw ti Saksi a nangipaima. Idi nagawid ti lalaki, imbagana iti Saksi nga asawana ti napasamak ket inkomentona a rumbeng a dimngeg koma ti katrabahuanna uray apagbiit laeng. Nangngeg ti anakna a babai ti imbagana, ket insalaysayna daytoy iti maysa a lalaki a Saksi a mangaskasaba iti dayta a lugar ti negosio. Dagus a simmarungkar ti Saksi iti opisina ti lalaki ket nairugi a mayadalan iti Biblia. Di nagbayag, regularen a tumabtabuno ti lalaki kadagiti gimong iti Domingo.

Nangyeg kadagiti sabali pay a pagimbagan ti panangasaba kadagiti tattao iti pagtrabahuanda. Adu nga agibumbunannag idiay Japan ti nagbalin a nasigo iti panagsarungkar kadagiti paglakuan, paktoria, ken opisina. Kanayonanna, babaen daytoy a pamay-an ti panangasaba, nakasarita ken nayadalan manen ti adu a di aktibo. Nakasaysayaat dagiti resulta. Itay nabiit, maysa a kongregasion iti sentro ti Tokyo ti nakaireport iti 108 a panagadal iti Biblia, nasurok a doble a bilang no idilig iti report iti naglabas a tawen.

[Footnote]