Malagipyo Pay?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Ania ti mangipakita nga adda kakabsat ni Jesus a lallaki ken babbai?

Kasta ti kuna ti Biblia iti Mateo 13:55, 56 ken Marcos 6:3. Ti Griego a sao (adelphos) kadagitoy a bersikulo ket nausar a mangtukoy iti “kita ti pisikal wenno legal a relasion [ken] awanen sabali a tuktukoyenna no di ti kabsat iti lasag wenno kabsat iti ama wenno ina.” (The Catholic Biblical Quarterly, Enero 1992)​—12/15, panid 3.

• Ania ti nalawag a nagbaliwan ti kita ti gubat, ken ania ti masansan a ramut dayta?

Iti naglabas a tawtawen, gerra sibil ti kangrunaan a nangdidigra iti sangatauan​—gubgubat iti nagbaetan dagiti bunggoy iti maysa a pagilian. Dagitoy ket resulta dagiti guranggura dagiti etniko a grupo ken tribu, panangidumduma iti relihion, kinaawan hustisia, ken napolitikaan a riribuk. Ti sabali pay a makagapu ket ti kinaagum iti bileg ken kuarta.​—1/1, panid 3-4.

• Apay nga ammotayo a saan a pinanggep ni Jesus nga ikabesa wenno sao por sao nga uliten dagiti Kristiano ti modelo a kararag?

Impasdek ni Jesus daytoy a modelo a kararag iti Sermonna iti Bantay. Agarup 18 a bulan kalpasanna, inulitna ti anag ti immuna a bilinna maipapan iti kararag. (Mateo 6:9-13; Lucas 11:1-4) Nakadkadlaw ta saanna nga inulit dayta a sao por sao, a mangipasimudaag a saanna nga isursuro a maulit-ulit a mayebkas ti naikabesa a kararag.​—2/1, panid 8.

• Kalpasan ti Layus, naggapuan ti bulong ti olibo nga inyeg ti kalapati iti daong?

Saantay nga ammo ti kaapgad wenno temperatura ti danum ti layus. Ngem pagaammo nga agsaringit manen ti kayo nga olibo uray kalpasan a mapukan. Isu a mabalin nga adda kaykayo a nagtalinaed a sibibiag iti uneg ti danum ket namataud manen kadagiti bulong kalpasan nga immes-es ti danum.​—2/15, panid 31.

• Bayat ti gerra sibil idiay Nigeria, kasano nga immawat iti naespirituan a taraon dagiti Saksi ni Jehova iti dayta a lugar idinto ta nabarikadaan ti Biafra?

Maysa nga empleado ti gobierno ti naikkan iti akem idiay Europa ken maysa ti naibaon iti pagdisuan ti eroplano idiay Biafra. Agpadada a Saksi. Inawatda ti napeggad a trabaho a panangidanon iti naespirituan a taraon idiay Biafra, a nakagunggonaan ti adu a kakabsat agingga a nagpatingga ti gubat idi 1970.​—3/1, panid 27.

• Ania ti naaramidan ti Kappia ti Westphalia, ken kasano a nairaman ti relihion?

Ti Repormasion biningaybingayna ti Nasantuan nga Imperio ti Roma iti tallo a pammati​—Katoliko, Luterano, ken Calvinista. Nabuangay idi rugrugi ti maika-17 a siglo ti Protestant Union ken Catholic League. Kalpasanna, nangrugi ti narelihiosuan a dangadang idiay Bohemia ket nagramaram kas internasional a panagsasalisal ti pannakabalin. Dagiti Katoliko ken Protestante nga agtuturay naglalabananda ti napolitikaan a kinatan-ok ken komersial a pagbaknangan. Kamaudiananna, maysa a saritaan agpaay iti kappia ti naangay idiay Westphalia a probinsia ti Alemania. Kalpasan ti nganngani lima a tawen, napirmaan ti Treaty of Westphalia idi 1648, a namagpatingga iti Tallopulo a Tawen a Gubat ken nangtanda iti panangrugi ti moderno a Europa kas maysa a kontinente dagiti independente nga estado.​—3/15, panid 20-3.

• Ania ti kaipapanan ti marka, wenno nagan, ti “atap nga animal”​—ti numero 666?

Nadakamat daytoy a marka iti Apocalipsis 13:16-18. Ti animal ket tukoyenna ti turay ti tao, ken ti marka ti animal a “numero ti tao” ipasimudaagna a dagiti gobierno iparangarangda ti imperpekto a natauan a kasasaad. Ti napagdadagup nga 6 ken 60 ken 600 ipamatmatna ti nakaro a kinaimperpektona iti panangmatmat ti Dios. Dagidiay addaan iti kasta a marka ket raraemenda ti napolitikaan nga Estado buyogen ti panagdayaw, wenno dayta ti pagtaltalkanda a mangisalakan.​—4/1, panid 4-7.