Ti Kadi Neutralidad Lapdanna ti Panangipakita iti Nakristianuan nga Ayat?

TI PANAGBALIN a Kristiano saanna laeng a ramanen ti panagbasa iti Biblia, panagkararag, ken panagkanta kadagiti himno iti Domingo. Ramanenna ti panagaramid kadagiti bambanag, agpaay iti Dios ken kadagiti tattao. Kuna ti Biblia: “Agayattayo koma, saan nga iti sao wenno babaen iti dila, no di ket iti aramid ken kinapudno.” (1 Juan 3:18) Addaan ni Jesus iti napasnek a pannakaseknan kadagiti sabsabali, ket tarigagayan dagiti Kristiano a tuladen. Imparegta ni apostol Pablo kadagiti pada a manamati a kanayon koma nga ‘aduanda ti aramiden iti trabaho ti Apo.’ (1 Corinto 15:58) Ngem ania ti trabaho ti Apo? Ramanenna kadi ti panangikagumaan a mangbaliw kadagiti pagannurotan ti gobierno para iti pagimbagan dagiti napanglaw ken mairurrurumen? Kasta kadi ti inaramid ni Jesus?

Nupay naidagadag ken ni Jesus a makinamin wenno dumasig iti politika, nagkedked a mangaramid iti dayta. Linaksidna ti tukon ni Satanas a panangituray kadagiti amin a pagarian iti lubong, liniklikanna ti makidiskutir maipapan iti panagbayad iti buis, ken inadaywanna ti organisado a grupo nga agtarigagay a mangaramid kenkuana kas ari. (Mateo 4:8-10; 22:17-21; Juan 6:15) Ngem ti panagbalinna a neutral ket saan a nakalapped kenkuana nga agtignay agpaay iti pagimbagan ti sabsabali.

Impamaysa ni Jesus dagiti banag a mangyeg iti manayon a pagimbagan ti sabsabali. Nupay ti panangpakanna iti lima ribu a tattao ken panangpaimbagna kadagiti masakit ket nangyeg iti temporario a bang-ar iti sumagmamano, ti sursurona ti nanglukat kadagiti agnanayon a bendision iti amin a tattao. Agdindinamag ni Jesus, saan a kas maysa nga organisador dagiti kampania a pangsaranay, no di ket kas “Mannursuro.” (Mateo 26:18; Marcos 5:35; Juan 11:28) Kinunana: “Maigapu itoy a nayanakak, ken maigapu itoy nga immayak iti lubong, tapno saksiak ti kinapudno.”​—Juan 18:37.

Panangikasaba iti Maysa a Banag a Nasaysayaat Ngem Politika

Ti kinapudno nga insuro ni Jesus ket saan a napolitikaan a teoria. Imbes ketdi, naisentro dayta iti Pagarian nga isu a mismo ti agturay kas Ari. (Lucas 4:43) Daytoy a Pagarian ket maysa a nailangitan a gobierno, a mangsukat iti amin a gobierno ti tao ken iyegna ti manayon a talna iti sangatauan. (Isaias 9:6, 7; 11:9; Daniel 2:44) Isu ngarud dayta ti kakaisuna a pudno a namnama ti sangatauan. Saan kadi nga ad-adda a panangipakita iti ayat ti mangipakaammo iti kasta a sigurado a namnama ngem ti panangparegta kadagiti tattao nga agtalekda iti tao a mangipaay iti natalged a masanguanan? Kuna ti Biblia: “Dikay ikabil ti panagtalekyo kadagiti natan-ok, wenno uray iti anak ti naindagaan a tao, a kenkuana awan pannakaisalakan. Ti espirituna pumanaw, isu agsubli iti dagana; iti dayta nga aldaw mapukaw dagiti panunotna. Naragsak daydiay a ti Dios ni Jacob ti katulonganna, a ti namnamana adda ken Jehova a Diosna.” (Salmo 146:3-5) Imbes ngarud nga ibaonna dagiti adalanna a mangikasaba iti nasaysayaat a panangorganisar kadagiti gobierno, insuro ida ni Jesus a mangikasaba iti “naimbag a damag ti pagarian.”​—Mateo 10:6, 7; 24:14.

Isu, ngarud, daytoy ti “trabaho ti Apo” a naibilin nga aramiden dagiti Kristiano a manangaskasaba. Yantangay dagiti iturayan ti Pagarian ti Dios maikalikagum nga ayatenda ti maysa ken maysa, agballigi ti Pagarian a mangikkat iti kinapanglaw babaen ti natimbeng a panangiwaras kadagiti ik-ikutan ti sangatauan. (Salmo 72:8, 12, 13) Naimbag a damag daytoy ket nasken nga ikasabatayo.

Ita, organisado dagiti Saksi ni Jehova a mangitungpal iti daytoy a “trabaho ti Apo” iti 235 a pagilian. Maitunos iti bilin ni Jesus, pagraemanda ti amin a gobierno. (Mateo 22:21) Ngem pagtulnoganda met dagitoy a sasaona kadagiti adalanna: “Saankayo a paset ti lubong, no di ket pinilikayo manipud iti lubong.”​—Juan 15:19.

Dadduma a manangitandudo iti politika ti nagbalbaliw kalpasan ti naannad a panagadalda iti Biblia. Maysa nga Italiano a politiko a kameng ti Catholic Action, maysa nga organisasion nga imatmatonan ti simbaan, ti nagkuna: “Nagbalinak a politiko, nga impapanko a ti maysa a tao nasken nga aktibo a tumulong iti napolitikaan ken sosial a panagrang-ay ti kagimongan.” Kalpasan a naglusulos kas mayor ti siudad tapno ikasabana ti Pagarian ti Dios kas maysa kadagiti Saksi ni Jehova, inlawlawagna no apay a mapaay dagiti panangikagumaan dagiti politiko. “Dakes ti agdama a kasasaad ti lubong, saan a gapu ta di nagregget dagiti naimbag a tattao a mangpasayaat iti kasasaad ti kagimongan, no di ket gapu ta nadangkes ti kaaduan.”

Ti panangliklik iti politika tapno maikasaba ti kakaisuna a pudno a namnama ti sangatauan saanna a lapdan dagiti pudno a Kristiano a tumulong iti sabsabali kadagiti praktikal a pamay-an. Dagidiay natulonganda nga agpasakup iti Pagarian ti Dios nasursuroda nga iwaksi dagiti makadadael a kababalin, raemen ti autoridad, pasayaaten ti biag ti pamiliada, ken maaddaan iti natimbeng a panangmatmat iti material a kinabaknang. Kangrunaanna, dagiti Saksi ni Jehova tumulongda kadagiti tattao a mangtagiragsak iti nasinged a relasion iti Dios.

Dagiti mangikaskasaba iti Pagarian ti Dios makagunggonada iti komunidad a pagnanaedanda. Ngem napatpateg iti dayta, isuroda dagiti tattao nga agtalek iti maysa a gobierno a pudno ken mangyeg iti manayon a talna kadagiti amin nga agayat iti Dios. Kas resulta ti neutral a takderda, nawaya dagiti Kristiano a mangipaay iti manayon ken praktikal a tulong ita.

[Kahon/Ladawan iti panid 7]

Politiko a Nagbalin a Manangikasaba iti Pagarian ti Dios

Idi ubing pay ni Átila, dagiti papadi iti simbaanda idiay Belém, Brazil, insuroda kenkuana ti liberation theology (gannuat a mangiparparegta iti panagtignay ti simbaan tapno maparmek ti sosial, napolitikaan, ken ekonomiko a panangirurumen). Pagragsakanna a denggen a maruk-atanto ti sangatauan manipud iti panangirurumen. Nakitimpuyog ni Átila iti maysa nga aktibista a grupo, a nakasursuruanna a mangorganisar kadagiti martsa protesta ken kampania para iti pannakabalbaliw dagiti pagannurotan ti gobierno.

Ngem pagragsakan met ni Átila nga isuro dagiti annak dagiti aktibista, nga usarenna ti naited kenkuana a libro a Panagimdeng iti Naindaklan a Mannursuro.a Dayta a libro isurona ti naimbag a kababalin ken panagtulnog kadagiti autoridad. Daytoy ti namagpanunot ken ni Átila no apay a dagiti sumupsuporta iti liberation theology saanda a sursuroten dagiti nangato a moral a pagalagadan ni Jesus ken no apay a ti dadduma malipatanda dagiti mairurrurumen a tattao no addadan iti turay. Immikkat ni Átila kas aktibista. Idi agangay, nadanon dagiti Saksi ni Jehova iti pagtaenganna ket kinasabaanda maipapan iti Pagarian ti Dios. Di nagbayag, nakipagadal iti Biblia ket lumawlawag kenkuana no ania ti pudno a solusion ti pannakairurumen ti sangatauan.

Kabayatan dayta, timmabuno ni Átila iti seminar dagiti Katoliko maipapan iti relihion ken politika. “Dagitoy a dua ket agsinnumbangir a paset ti maymaysa a sinsilio,” inlawlawag dagiti instruktor. Nakigimong met iti Kingdom Hall. Anian a naiduma ti napaliiwna! Awan ti agsigarilio, aginum iti arak, wenno naalas a panagangaw. Inkeddengna a makiraman kadakuada iti trabahoda a panangasaba, ket di nagbayag, nagpabautisar. Ita, nabatad kenkuana no apay a saan a ti liberation theology ti pudpudno a solusion dagiti parikut dagiti napanglaw.

[Footnote]

[Dagiti Ladawan iti panid 6]

Ti neutral a takder dagiti Kristiano a ministro ket saan a lapped iti panangtulongda kadagiti sabsabali