Trabaho​—Bendision Wenno Lunod?

“Iti maysa a tao awanen ti nasaysayaat ngem iti . . . ipakitana iti kararuana ti naimbag gapu iti napinget a panagtrabahona.”​—Eclesiastes 2:24.

“NABANNOG kalpasan ti agmalmalem a trabaho.” Iti nabiit pay a surbey, kasta ti panangdeskribir ti 1 iti kada 3 nga empleado mainaig iti masansan a mariknada. Saan a pagsiddaawan dayta iti pagtrabahuan a marigrigatan dagiti empleado; agtrabahoda iti napapaut ken mangyawidda iti obraenda​—ngem manmano laeng a mangapresiar dagiti amoda.

Sipud idi nangrugi ti nawadwad a produksion, marikna ti adu a trabahador a kasla awanen kaimudinganda iti maysa a dakkel a kompania. Masansan nga awan ti pammaregta ken wayawaya a mangaramid kadagiti bambanag. Siempre, mangapektar dayta iti panangmatmat dagiti tattao iti trabaho. Naglaka a mapaay ti personal nga interes iti trabaho. Mabalin a maguped ti tarigagay a mangpasayaat iti kinasigo iti trabaho. Dagiti kasta nga ibungana ti mabalin a mamataud iti pannakauma iti mismo a trabaho, a nalabit mamagbalin iti maysa a marurod iti trabahona.

Panangusig iti Panangmatmattayo

Mabalin a saantayo a kanayon a mabalbaliwan dagiti kasasaadtayo. Ngem saanka kadi nga umanamong a mabalintayo a balbaliwan ti panangmatmattayo? No mautobmo a naimpluensiaanka kadagiti negatibo a panangmatmat iti trabaho, makatulong no ikabilangam ti panangmatmat ken prinsipio ti Dios mainaig iti daytoy a topiko. (Eclesiastes 5:18) Adu ti naaddaan iti ragsak ken pannakapnek iti trabahoda idi inkabilanganda dagita.

Ti Dios ti Kangrunaan a Managobra. Ti Dios ket managobra. Nalabit a saantayo a napanunot dayta, ngem iti Biblia, kasta ti damo a panangyam-ammona iti bagina. Ti salaysay ti Genesis ket mangrugi iti panangparsua ni Jehova iti langlangit ken daga. (Genesis 1:1) Panunotem dagiti nadumaduma nga akem ti Dios idi rinugianna ti mangparsua​—diseniador, organisador, inheniero, artesano, espesialista iti materiales, mangimatmaton iti proyekto, kemiko, biologo, zoologo, programmer, linguista, ken dadduma pay.​—Proverbio 8:12, 22-31.

Ania ti kalidad ti trabaho ti Dios? Ti rekord ti Biblia dakamatenna a “nasayaat,” “nasayaat unay.” (Genesis 1:4, 31) Kinapudnona, ti nakaparsuaan “idekdeklarada ti dayag ti Dios,” ket rumbeng met nga idaydayawtayo ti Dios!​—Salmo 19:1; 148:1.

Ngem ti trabaho ti Dios saan a nagpatingga iti pannakaparsua ti pisikal a langlangit ken daga ken ti umuna a pagassawaan. Ti Anak ni Jehova, ni Jesu-Kristo, kinunana: “Ni Amak agtultuloy nga agar-aramid agingga ita.” (Juan 5:17) Wen, agtultuloy nga agtrabaho ni Jehova babaen ti panangipaayna iti kasapulan dagiti parparsuana, a tagtaginayonenna ti nakaparsuaan, ken is-ispalenna dagiti matalek nga agdaydayaw kenkuana. (Nehemias 9:6; Salmo 36:6; 145:15, 16) Us-usarenna pay dagiti tattao, dagiti ‘katrabahuan ti Dios,’ a tumulong iti panangaramid kadagiti dadduma a trabaho.​—1 Corinto 3:9.

Mabalin a bendision ti trabaho. Saan aya nga ibaga ti Biblia a maysa a lunod ti trabaho? Ti Genesis 3:17-19 agparang nga ipasimudaagna a ti Dios pinagbalinna a makapadagsen ti trabaho para kada Adan ken Eva kas panangdusana kadakuada gapu iti panagrebeldeda. Idi kinondenarna ti immuna a pagassawaan, kinuna ti Dios ken ni Adan: “Iti ling-et ta rupam mangankanto iti tinapay agingga nga agsublika iti daga.” Naan-anay kadi a panangkondenar dayta iti trabaho?

Saan. Imbes ketdi, gapu iti panagsukir da Adan ken Eva, saan nga insigida a natungpal ti pannakapalawa ti Paraiso nga Eden. Ti Dios inlunodna ti daga. Kasapulan ti panagling-et ken panagbannog ti tao tapno magun-odna ti pagbiagna manipud iti daga.​—Roma 8:20, 21.

Imbes a deskribirenna ti trabaho kas maysa a lunod, ipakita ti Biblia a maysa dayta a bendision a rumbeng nga ipateg. Kas nadakamat, ti Dios a mismo ket maysa a naanep a managobra. Yantangay pinarsuana dagiti tattao iti ladawanna, inikkan ida ni Jehova iti abilidad ken autoridad a mangaywan kadagiti parsuana ditoy daga. (Genesis 1:26, 28; 2:15) Ti naipaannong a trabaho ket naited sakbay nga impakaammo ti Dios dagiti sasao a nailanad iti Genesis 3:19. No ti trabaho ket maysa a lunod ken pagdaksan, saan koma a pulos nga iparegta ni Jehova ti panagtrabaho dagiti tattao. Adu idi ti trabahuen ni Noe ken ti pamiliana sakbay ken kalpasan ti Layus. Idi panawen dagiti Kristiano, naidagadag met kadagiti adalan ni Jesus nga agtrabahoda.​—1 Tesalonica 4:11.

Kaskasdi, ammotayo amin a makapadagsen ita dagiti trabaho. Dagiti pakasikoran, peggad, pannakauma, pannakapaay, kompetision, panangallilaw, ken kinaawan hustisia ket sumagmamano laeng kadagiti ‘sisiit ken kalkalunay’ a nainaig ita iti trabaho. Ngem saan a ti trabaho a mismo ti lunod. Iti Eclesiastes 3:13, ti Biblia awaganna ti trabaho ken dagiti bungana kas sagut manipud iti Dios.​—Kitaem ti kahon a “Panangdaer iti Pakasikoran a Nainaig iti Trabaho.”

Maipadayagmo ti Dios babaen ti trabahom. Nabayagen a mapadpadayawan ti kalidad ken kinaekselente ti trabaho. Ti kalidad ti maysa kadagiti kangrunaan nga aspeto iti panangmatmat ti Biblia iti trabaho. Ti Dios a mismo ket ekselente iti trabahona. Impaayannatayo kadagiti saguday ken abilidad, ket kayatna nga usarentayo dagita iti nasayaat a panggep. Kas pagarigan, bayat ti pannakaibangon ti tabernakulo iti nagkauna nga Israel, inikkan ni Jehova iti sirib, pannakaawat, ken pannakaammo dagiti tattao a kas kada Bezalel ken Oholiab, ket naaramidanda dagiti espesipiko nga artistiko ken praktikal a trabaho. (Exodo 31:1-11) Ipakita dayta nga adda naisangsangayan nga interes ti Dios iti panggep, kinasigo, disenio, ken dadduma pay a detalye ti trabahoda.

Dakkel ti pakainaigan daytoy iti panangmatmattayo kadagiti personal nga abilidad ken ugali iti trabaho. Tulongannatayo a mangmatmat kadagita kas sagsagut ti Dios, a saan a rumbeng a tagilag-anen. Gapuna, nabalakadan dagiti Kristiano nga aramidenda ti trabahoda a kasla ti Dios a mismo suksukimatenna ti magapgapuananda: “Aniaman ti ar-aramidenyo, aramidenyo dayta nga amin-kararua a kas maipaay ken Jehova, ket saan a maipaay iti tattao.” (Colosas 3:23) Nabilin dagiti adipen ti Dios nga agtrabahoda a siaanep, ket iti kasta mapagbalinda ti mensahe dagiti Kristiano nga ad-adda a makaay-ayo kadagiti katrabahuan ken kadagiti sabsabali.​—Kitaem ti kahon a “Panangyaplikar Kadagiti Prinsipio ti Biblia iti Pagtrabahuan.”

Maitunos iti dayta, nasayaat no iyimtuodtayo kadagiti bagbagitayo no ania a kalidad ken kinaanep ti iparangarangtayo iti trabahotayo. Maay-ayo ngata ti Dios iti magapgapuanantayo? Naan-anay kadi a mapnektayo iti wagas ti panangitungpaltayo kadagiti naipaannong a trabahotayo? No saan, mabalintay pay a parang-ayen dayta.​—Proverbio 10:4; 22:29.

Timbengen ti trabaho babaen ti panagbalin a naespirituan. Nupay makomendaran ti kinagaget, adda pay ti sabali a napateg a banag a mangyeg iti pannakapnek iti trabaho ken iti biag: ti espiritualidad. Ni Ari Solomon, a nagtrabaho a siaanep ken tinagiragsakna ti amin a kinabaknang ken kinanam-ay a maitukon ti biag, kinunana: “Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.”​—Eclesiastes 12:13.

Nalawag, masapul nga ikabilangantayo ti pagayatan ti Dios iti amin nga aramidentayo. Agtartrabahotayo kadi maitunos iti pagayatanna, wenno agtartrabahotayo maibusor iti dayta? Ikagkagumaantayo kadi nga ay-aywen ti Dios, wenno ikagkagumaantayo nga ay-aywen ti bagitayo? No saantayo nga aramiden ti pagayatan ti Dios, sagabaentayonto ti saem ti kinaawan namnama, ladingit, ken kinakawaw.

Insingasing ni Steven Berglas kadagiti masiksikoran nga ehekutibo a ‘mangpanunotda kadagiti makagunggona nga aktibidad a pagduyosanda ket aramidenda dayta a paset ti biagda.’ Awanen ti aktibidad a nasaysayaat ngem ti panagserbi iti Daydiay nangipaay kadatayo kadagiti saguday ken abilidad a mangaramid iti napnuan kaipapanan a trabaho. Mangyeg iti pannakapnek ti panangaramidtayo iti trabaho a makaay-ayo iti Namarsua kadatayo. Para ken ni Jesus, ti trabaho nga impaannong kenkuana ni Jehova ket makapapigsa, makapnek, ken makapabang-ar a kas iti taraon. (Juan 4:34; 5:36) Kanayonanna, lagipem a ti Dios, ti Kangrunaan a Managobra, aw-awisennatayo nga agbalin kas ‘katrabahuanna.’​—1 Corinto 3:9.

No agdaydayawtayo iti Dios ken rumangrang-aytayo iti naespirituan, makabalantayo a mangitungpal iti makagunggona a trabaho ken annongen. Yantangay masansan nga adda pakarigatan, kinarikut, ken adu nga obligasion iti pagtrabahuan, ti rimmamut a pammati ken espiritualidadtayo ti makaipaay iti kasapulan unay a bileg bayat a pagreggetantayo ti agbalin a nasaysayaat nga empleado wenno amo. Iti sabali a bangir, dagiti pasamak iti biag iti daytoy nadangkes a lubong maalertonatayo kadagiti benneg ti biag a nasken a pangparang-ayantayo iti pammatitayo.​—1 Corinto 16:13, 14.

Inton ti Trabaho Agbalin a Bendision

Dagidiay sireregget nga agserserbi ita iti Dios manamnamada ti panawen inton isublina ti Paraiso ket mapno iti agkakasayaat a trabaho ti intero a daga. Ni Isaias, a maysa a propeta ni Jehova, impakpakaunana ti kasasaadto ti biag: “Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan. . . . Ti aramid dagiti bukodda nga ima usarento a naan-anay dagidiay pinilik.”​—Isaias 65:21-23.

Anian a maysanto a bendision ti trabaho! Babaen ti panangammo no ania ti pagayatan ti Dios agpaay kenka ken panagtignay maitunos iti dayta, maysakanto koma kadagidiay bendisionan ni Jehova ken kanayon a ‘makakita iti imbag iti isuamin a napinget a panagtrabahom.’​—Eclesiastes 3:13.

[Blurb iti panid 8]

Ti Dios ti Kangrunaan a Managobra: Genesis 1:1, 4, 31; Juan 5:17

[Blurb iti panid 8]

Mabalin a bendision ti trabaho: Genesis 1:28; 2:15; 1 Tesalonica 4:11

[Blurb iti panid 8]

Maipadayagmo ti Dios babaen ti trabahom: Exodo 31:1-11; Colosas 3:23

[Blurb iti panid 8]

Timbengen ti trabaho babaen ti panagbalin a naespirituan: Eclesiastes 12:13; 1 Corinto 3:9

[Kahon/Ladawan iti panid 6]

PANANGDAER ITI PAKASIKORAN A NAINAIG ITI TRABAHO

Dagiti eksperto iti medisina imbilangda ti pakasikoran iti trabaho kas maysa a peggad. Mangibunga dayta iti ulser ken panagleddaang ken mabalin a mangiturong pay iti panagpakamatay. Adda pangawag dagiti Hapones iti dayta​—karoshi, “ipapatay gapu iti nalabes a panagtrabaho.”

Adda dagiti nadumaduma a banag a nainaig iti trabaho a pakaigapuan ti panagsikor. Pakaibilangan dayta ti panagbaliw ti oras wenno kasasaad ti trabaho, parikut kadagiti superbisor, panagbaliw dagiti annongen wenno kita ti trabaho, panagretiro, ken pannakasesante. Gapu kadagita a pakasikoran, adda dagiti mangikagumaan a lumiklik babaen ti panagsapul iti sabali a trabaho wenno aglawlaw. Dadduma ti mangikagumaan a mangparmek iti kasta a panagsikor, ngem mariknada dayta iti dadduma a benneg ti biag, kaaduanna iti pamilia. Dadduma a tattao ti agsagaba pay ketdi iti emosional, nga agresulta iti panagleddaang ken pannakarikna iti kinaawan namnama.

Nakabalan a naan-anay dagiti Kristiano no kasanoda a daeran dagiti pakasikoran mainaig iti trabaho. Mangipapaay ti Biblia iti adu a pamunganayan a prinsipio a makatulong kadatayo iti tiempo ti pakarigatan ken mangyeg iti positibo nga epekto iti naespirituan ken emosional a salun-attayo. Kas pagarigan, kinuna ni Jesus: “Dikay pulos maringgoran maipapan iti sumaganad nga aldaw, ta ti sumaganad nga aldaw addaanto kadagiti bukodna a pakaringgoran. Umdasen iti tunggal aldaw ti bukodna a kinadakes.” Maiparparegta ditoy ti panangtaming iti agdama a parikut, saan nga iti parikut iti sumaganad nga aldaw. Iti kasta, maliklikantayo ti nalabes a pannakaringgor kadagiti parikuttayo, nga ad-adda laeng a mangpakaro iti pakarigatan.​—Mateo 6:25-34.

Napateg nga agpannuray dagiti Kristiano iti bileg ti Dios, saan nga iti bukodda. No marigrigatantayo ket kayattayon ti sumuko, maipaayannatayo ti Dios iti makin-uneg a talna ken rag-o, ken maikkannatayo iti sirib a mangdaer iti aniaman a pakarigatan. “Itultuloyyo a gun-oden ti pannakabalin iti Apo ken iti kinabileg ti pigsana,” insurat ni apostol Pablo.​—Efeso 6:10; Filipos 4:7.

Kamaudiananna, mabalin a mangyeg kadagiti nasayaat a resulta uray dagiti makapasikor a kasasaad. Dagiti pakasuotan matignaydatayo nga agkamang ken ni Jehova, a sapulentayo ken agpannuraytayo kenkuana. Matignaydatayo pay a mangitultuloy a mangpatanor iti Nakristianuan a personalidad ken iti abilidad nga agibtur iti sidong ti pakarigatan. Ibalakad kadatayo ni Pablo: “Agrag-otayo bayat nga addatayo kadagiti rigat, yantangay ammotayo a ti rigat mangpataud iti panagibtur; ti panagibtur, kalpasanna, maysa a naanamongan a kasasaad; ti naanamongan a kasasaad, kalpasanna, namnama.”​—Roma 5:3, 4.

Gapuna, uray ti panagsikor mabalin nga agserbi a pakatignayantayo a rumang-ay iti naespirituan imbes a pakaigapuan ti panagleddaang ken pannakapukaw ti namnama.

[Kahon/Ladawan iti panid 7]

PANANGYAPLIKAR KADAGITI PRINSIPIO TI BIBLIA ITI PAGTRABAHUAN

Ti kababalin ken kondukta ti maysa a Kristiano iti pagtrabahuan mapagbalinna a makaay-ayo ti mensahe ti Biblia kadagiti katrabahuan ken kadagiti sabsabali. Iti suratna ken ni Tito, binalakadan ni apostol Pablo dagidiay addaan iti kasasaad nga umasping kadagiti empleado nga “agpasakupda koma kadagiti makinkukua kadakuada iti amin a bambanag, ket ay-aywenda ida a naimbag, saan a makisubsubang, saan nga agtaktakaw, no di ket naan-anay a mangipakita iti naimbag a kinamapagtalkan, tapno maarkosanda ti sursuro ti Manangisalakantayo, ti Dios, iti amin a bambanag.”​—Tito 2:9, 10.

Kas pagarigan, usigenyo ti kinuna ti maysa a negosiante idi nagsurat iti sangalubongan a hedkuarter dagiti Saksi ni Jehova: “Nagsuratak ta kayatko ti agkiddaw iti pammalubos a mangala kadagiti Saksi ni Jehova kas masuelduan a trabahador. Kayatko nga alaen ida kas trabahador agsipud ta ammok a napudno, napasnek, ken mapagtalkanda, ken saandak a sauren. Dagiti laeng Saksi ni Jehova ti pagtalkak. Pangngaasiyo ta tulongandak.”

Ni Kyle ket maysa a Kristiano nga agtartrabaho kas maysa a resepsionista iti maysa a pribado nga eskuelaan. Gapu iti maysa a di panagkinnaawatan, maysa a katrabahuanna ti nagsao iti dakes kenkuana iti sango ti sumagmamano nga estudiante. “Masapul nga agannadak tapno saanko a maibabain ti nagan ni Jehova,” nalagip ni Kyle. Kadagiti simmaganad a lima nga aldaw, pinanunot ni Kyle no kasanona a mayaplikar dagiti prinsipio ti Biblia. Ti maysa kadagitoy ket masarakan iti Roma 12:18: “No mabalin, agingga a makapagpannuray kadakayo, makikappiakayo iti amin a tattao.” Pinatulodanna ti katrabahuanna iti mensahe babaen ti e-mail ket nagpadispensar iti dida panagkinnaawatan. Kiniddaw ni Kyle iti katrabahuanna nga agtungtongda kalpasan ti trabaho ket risutenda ti parikutda. Kalpasan ti panagpatangda, nakapampanunot met laeng ti katrabahuanna ken nabigbigna ti kinasirib ti pamay-an ni Kyle. Kinunana ken ni Kyle, “Adda la ketdi pakainaigan ti relihionmo iti daytoy” ket inarakupna idi nagpinnakadada. Ania ti nakuna ni Kyle? “Kasayaatan latta nga iyaplikartayo dagiti prinsipio ti Biblia.”

[Ladawan iti panid 4, 5]

Marikna ti adu a trabahador a kasla awanen kaimudinganda iti maysa a dakkel a kompania

[Credit Line]

Japan Information Center, Consulate General ti Japan idiay NY

[Picture Credit Line iti panid 8]

Globo: rinetrato ti NASA