Ti Argumento Maipapan iti Trabaho
“Agtrabaho—Agtrabaho! Nakaay-ayat unay a maammuan nga adda latta dagiti mabalintayo nga aramiden.”—Katherine Mansfield, autor (1888-1923).
UMANAMONGKA kadi iti dayta nga idealistiko a panangmatmat iti trabaho? Ania ti panangmatmatmo iti trabaho? Matmatam kadi ti trabaho a kasla maysa a nawatiwat, nasipnget nga usok a naiballaet iti tunggal ngudo ti lawas a panagaliwaksay? Wenno dandani agbalinen a maysa nga adiksion kenka ti trabaho?
Iti kaaduan a tattao, trabaho ti kangrunaan a mangibus iti panawenda. Mabalin nga agpannuray iti trabaho ti kita ti pagnaedan ken estilo ti biagtayo. Manipud iti panagkabannuag agingga iti panagretiro, ti trabaho ti kakaisuna a kalat a mangdomdominar iti biag ti adu. Dadduma kadatayo ti mapnek unay iti trabahotayo. Adda dagidiay mangrukod iti kinapateg ti trabaho depende iti kadakkel ti sueldo wenno iti katan-okna, bayat nga adda met dagiti mangmatmat iti trabaho kas pagpalabasan laeng iti panawen wenno banag a mangsayang pay ketdi iti tiempo.
Adda dagidiay agtrabaho tapno agbiagda ken dagidiay agbiag tapno agtrabahoda; dadduma ti matay gapu iti kita ti trabahoda. Kas pagarigan, sigun iti nabiit pay a report ti United Nations, ti trabaho ti ad-adda a pakaigapuan iti ut-ot ken ipapatay “ngem kadagiti gubat wenno droga ken panagabuso iti arak.” Iti komentona iti dayta, impadamag ti The Guardian a pagiwarnak iti London: “Nasurok a dua a milion ti matmatay iti tinawen gapu kadagiti aksidente wenno sakit a gapuanan ti trabaho . . . Ti tapok, kemikal, arimbangaw ken radiasion ket pakaigapuan ti kanser, sakit ti puso, ken istrok.” Ti panagtrabaho dagiti ubbing ken ti inkapilitan a panagtrabaho ket dua laeng kadagiti nalaad a kasasaad ti trabaho ita.
Kanayonanna, adda pay inawagan ti sikologo a ni Steven Berglas a “napeggad a panagsikor.” Dineskribirna ti napinget a trabahador a nakaragpat iti nangato a karera ngem agsagsagaba iti “nakaro a danag, dukot, kinaawan namnama wenno leddaang a maigapu iti pannakariknana nga isu ket naigameren iti trabaho, wenno iti karera, a saanna a maliklikan ken saan a makaipaay kenkuana iti bang-ar.”
Ti Nagdumaan ti Kinagaget ken ti Pannakaigamer iti Trabaho
Iti lubong nga adu ti agtartrabaho iti adu nga oras, nasken a mapagdumatayo no siasino ti makuna a nagaget ken no siasino ti makuna a naigamer iti trabaho. Adu a naigamer iti trabaho ti mangmatmat iti pagtrabahuan kas maysa a natalged a lugar iti napeggad, agbaliwbaliw a lubong; dagiti nagaget mariknada a ti trabaho ket maysa a napateg ken no dadduma makapnek nga obligasion. Dagiti naigamer iti trabaho ipalubosda a dominaran ti trabaho ti amin a dadduma nga aspeto ti biag; dagiti nagaget ammoda no kaano nga isardengda ti trabahoda, no kaano nga ibaw-ingda ti atensionda, ken addada no marambakan ti anibersario ti kasarda. Dagiti naigamer iti trabaho makariknada iti pannakapnek iti nalabes a panagtrabahoda ken dayta ti mangtigtignay kadakuada; saan a kasta ti panagrikna dagiti nagaget.
Ti moderno a kagimongan dida mapagduma ti kinagaget ken pannakaigamer iti trabaho gapu ta maitantandudo ti nalabes a panagtrabaho. Gapu iti kaadda dagiti modem, cellphone, ken pager, agbalin a pagtrabahuan uray ti pagtaengan. Gapu ta mabalin ti agtrabaho iti aniaman a lugar ken oras, adda dagidiay mangigaed nga agtrabaho nga uray la pakadangrananda.
Ania ti inaramid ti dadduma gapu iti kasta a makadangran a kababalin? Naammuan dagiti sosiologo a dagiti nalabes ti panagtrabaho ken panagsiksikorda a tattao ti addaan iti pagannayasan a mangiserrek iti espiritualidad iti pagtrabahuanda ket inayonda ti relihion iti propesionda. Ti San Francisco Examiner impadamagna a “nakaskasdaaw ita ti pannakaisinggalut ti espiritualidad iti trabaho.”
Mainaig iti Silicon Valley, ti lugar ti narang-ay a teknolohia idiay Estados Unidos, kinuna ti nabiit pay a report: “Bayat nga umad-adu dagiti bakante a paradaan kadagiti pagtrabahuan gapu iti agtultuloy a panagkissay kadagiti empleado, umil-ilet met itan dagiti paradaan kadagiti pakaang-angayan dagiti panagadal iti Biblia iti rabii.” Aniaman ti kaipapanan dayta, adu iti sangalubongan ti nakapaneknek a ti Biblia ket addaan iti positibo nga impluensia iti panangmatmatda iti trabaho, nga agresulta iti natimtimbeng a panagbiag.
Kasano a matulongannatayo ti Biblia a maaddaan iti natimbeng a panangmatmat iti trabaho? Adda kadi dagiti aniaman a Nainkasuratan a prinsipio a makatulong kadatayo a mangsango a sibaballigi kadagiti pakarigatan iti pagtrabahuan ita? Mausig dagitoy a saludsod iti sumaganad nga artikulo.