Talaga Kadi nga Adda ti Diablo

ANIA ti kapanunotanyo maipapan iti Diablo? Ibilangyo kadi ti Diablo kas pudpudno a persona a mangsulsulisog kadagiti tattao nga agaramid iti dakes, wenno irepresentarna laeng ti kinadakes? Rumbeng kadi a pagbutngan ti Diablo, wenno mamatmatan laeng kas parparbo wenno mitolohia? Ti kadi termino a “diablo” tumukoy iti maysa a di masinunuo a makadadael a puersa iti uniberso? Mabalin kadi a dayta a termino isimbolona laeng dagiti kinadakes kadagiti tattao, kas ibaga dagiti moderno a teologo?

Di pagduaduaan nga agduduma ti kapanunotan dagiti tattao maipapan iti kinasiasino ti Diablo. Panunotenyo laengen ti kinarigat ti panangammo iti pudno a kinasiasino ti maysa a nalaing a manglimlimo nangnangruna no isu ket determinado a mangilimed iti pudno a kinasiasinona! Kasta ti panangdeskribir ti Biblia iti Diablo. Iti panangtukoyna ken ni Satanas, kunana: “Ni Satanas a mismo pagbalbalinenna ti bagina a kasla anghel ti lawag.” (2 Corinto 11:14) Nakadakdakes ti Diablo, ngem agpammarang a naimbag tapno mayaw-awanna dagiti sabsabali. No mapapatina dagiti tattao nga awan ti Diablo, ad-adda a maitungpalna ti panggepna.

Siasino ngarud a talaga ti Diablo? Kaano ken kasano a timmaud? Kasano ti panangimpluensiana ita iti sangatauan? Adda kadi aniaman a maaramidtayo tapno masarangettayo dayta nga impluensia? Ipakaammo ti Biblia ti pudno a pakasaritaan ti Diablo manipud mismo a nangrugianna ken mangipaay kadagiti umiso a sungbat kadagita a saludsod.

[Ladawan iti panid 3]

Nagrigat la ketdi a bigbigen ti maysa a determinado a mangilimed iti pudno kinasiasinona!