Panangtarus iti Biblia—Mabalinmo a Tagiragsaken
NAGLAON ti Biblia kadagiti agkakapateg a kinapudno manipud iti Dios. Ipakaammona kadatayo ti maipapan iti panggep ti biag, ti puon ti panagsagaba ti tao, ken ti masanguanan ti sangatauan. Isurona kadatayo no kasano a sapulen ti kinaragsak, no kasano ti maaddaan kadagiti gagayyem, ken no kasano ti naballigi a panangrisut kadagiti parikut. Napatpateg pay, maadaltayo ti maipapan iti Namarsua ken nailangitan nga Amatayo, ni Jehova. Dayta a pannakaammo ti mamagbalin iti biagtayo a naragsak ken napnuan iti kaipapanan.
Ti pananggun-od iti pannakaammo maipapan iti Dios ket iyarig ti Biblia iti pannangan. Kinuna ni Jesus: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mateo 4:4; Hebreo 5:12-14) No kasano a kasapulan ti pannangan iti kada aldaw tapno agbiagtayo, kasapulan met ti regular a panangbasa iti Sao ti Dios tapno magunggonaantayo iti kari ti Dios a biag nga agnanayon.
Makaparagsak kadatayo ti pannangan gapu ta naparsuatayo a kasta ken gapu ta pennekenna ti napateg a kasapulantayo. Ngem addaantayo iti sabali pay a napateg a kasapulan a masapul a penkentayo no kayattayo ti agbalin a naragsak. Kinuna ni Jesus: “Naragsak dagidiay sipapanunot iti naespirituan a kasapulanda.” (Mateo 5:3) Posible ti agbalin a naragsak agsipud ta mabalin a mapennek dayta babaen ti panangtarus iti Sao ti Dios.
Pudno a saan a nalaka kadagiti dadduma ti panangtarus iti Biblia. Kas pagarigan, mabalin a kasapulam ti tulong tapno matarusam dagiti teksto maipapan kadagiti di pamiliar a kostumbre wenno teksto a nangusar kadagiti piguratibo nga ebkas. Adda met dagiti padto a naisurat iti simboliko a sasao a matarusan laeng babaen ti panangusig kadagiti dadduma a teksto iti Biblia a mainaig iti isu met laeng a topiko. (Daniel 7:1-7; Apocalipsis 13:1, 2) Uray pay kasta, talaga a mabalinmo a tarusan ti Biblia. Kasano a masiguradom dayta?
Mabalin a Tagiragsaken ti Amin
Ti Biblia isu ti Sao ti Dios. Impakaammo ti Dios ti pagayatanna babaen dayta. Mangipaay kadi ti Dios iti libro nga imposible a matarusan wenno dagidiay de adal laeng ti makatarus iti dayta? Saan. Imbes ketdi, nakonsiderar ni Jehova. Kinuna ni Kristo Jesus: “Siasino kadakayo ti ama a, no ti anakna dumawat iti ikan, nalabit iyawatnanto kenkuana ti maysa a serpiente imbes nga ikan? Wenno no dumawat met iti itlog, iyawatnanto kenkuana ti maysa a manggagama? Gapuna, no dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!” (Lucas 11:11-13) Gapuna, masiguradom a kabaelam a tarusan ti Biblia ken no sipapasnek nga agkiddawka iti Dios, ipaayna ti tulong a kasapulam tapno maawatam ti Saona. Kinapudnona, uray dagiti ubbing kabaelanda a tarusan dagiti pamunganayan a sursuro ti Biblia!—2 Timoteo 3:15.
Nupay kasapulan ti kinaanep tapno matarusantayo ti Biblia, nabileg ken makaparegta ti epektona kadatayo no aramidentayo dayta. Kalpasan a napagungar, nagparang ni Jesus iti dua kadagiti adalanna ket insaritana kadakuada ti maipapan kadagiti padto iti Biblia. Kuna ti salaysay ni Lucas: “Nangrugi ken Moises ken kadagiti amin a Mammadto imbuksilanna kadakuada ti bambanag maipapan iti bagina kadagiti amin a Kasuratan.” Ania ti resulta? Iti dayta a rabii, bayat a pinampanunotda ti naammuanda, kinuna dagiti adalan iti maysa ken maysa: “Saan kadi a rumayrayray ti pusota bayat nga agsasao idi kadata iti dalan, bayat a lukluktanna idi a naan-anay kadata dagiti Kasuratan?” (Lucas 24:13-32) Nakariknada iti ragsak idi matarusanda ti Sao ti Dios agsipud ta napabileg ti pammatida kadagiti karkari ti Dios ken nangipaay dayta kadakuada iti positibo a panangmatmat iti masanguanan.
Imbes a makapadagsen kadatayo, makapainteres ken makagunggona no matarusantayo ti Sao ti Dios, no kasano a makaparagsak ti pannangan iti makapasalun-at a taraon. Ania ti aramidem tapno magun-odmo ti kasta a pannakaawat? Ti sumaganad nga artikulo ipakitana kenka no kasano a matagiragsakmo “ti mismo a pannakaammo iti Dios.”—Proverbio 2:1-5.
[Ladawan iti panid 4]
Kas maysa a naayat nga ama, ipaay ni Jehova ti nasantuan nga espirituna tapno tumulong kadatayo a mangtarus iti Biblia