Malagipyo Pay?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Kasano a ni Jesus “ispalennanto daydiay napanglaw,” kas impadto ti Salmo 72:12?

Bayat ti panagturayna, matagiragsakto ti amin ti kinahustisia, awanton ti panagkunniber. Ti gubat ket masansan nga agbanag iti kinapanglaw, ngem ni Kristo ipaaynanto ti naan-anay a talna. Maasian kadagiti tattao isu a pagkaykaysaennanto amin ida, ken siguraduenna a nawadwadto ti taraon agpaay iti sangatauan. (Salmo 72:4-16)​—5/1, panid 7.

• Kas Kristiano, kasanotayo a maiparangarang ti ‘wayawayatayo nga agsao’? (1 Timoteo 3:13; Filemon 8; Hebreo 4:16)

Maaramidtayo dayta babaen ti naganetget ken situtured a panangasaba, panangisuro ken panangted a dagus iti epektibo a balakad, ken panangibukbok iti linaon ti pusotayo iti Dios babaen ti kararag buyogen ti panagtalek a denggen ken sungbatanna dayta.​—5/15, panid 14-16.

• Iti Mosaiko a Linteg, apay nga adda dagiti naikasigudan nga usar dagiti mabagbagi a namatmatan a ‘mangrugit’ iti maysa a tao?

Dagiti linteg mainaig iti kinarugit gapu iti panagruar ti semilia, panagkadawyan, ken panaganak intandudona ti kinadalus ken nasalun-at a panagbiag, impaganetgetna ti kinasagrado ti dara, ken impakitana ti kinapateg ti panangabbong kadagiti basol.​—6/1, panid 31.

• No kayat ti maysa a tao ti agbalin a naragsak, apay a nasayaat no usigenna ti libro a Salmo?

Ammo dagiti nangputar kadagiti Salmo a makaparagsak ti maaddaan iti nasayaat a relasion iti Dios. (Salmo 112:1) Ti relasion iti pada a tao, material nga ik-ikutan, ken personal a gapuanan saanna a maipaay ti kinaragsak nga itden ti panagbalin a paset “ti ili a ti Diosna isu ni Jehova.” (Salmo 144:15)​—6/15, panid 12.

• Ania a naisangsangayan a relasion ken ni Jehova ti tinagiragsak dagiti nagkauna nga Israelita?

Idi 1513 K.K.P., babaen ti maysa a tulag, nangipasdek ni Jehova iti maysa a baro a relasionna kadagiti Israelita. (Exodo 19:5, 6; 24:7) Kalpasanna, nayanak dagiti Israelita kas kameng ti pinili ti Dios a nasion a naidedikar kenkuana. Kaskasdi, masapul nga ikeddeng ti tunggal Israelita no kayatna ti agserbi iti Dios wenno saan.​—7/1, panid 21-2.

• Apay a rumbeng nga aramidentayo ti amin a bambanag nga “awan panagtantanabutob”? (Filipos 2:14)

Ipakita ti adu a pagarigan iti Kasuratan a ti panagtanabutob ket nangyeg iti dakkel a pannakadangran kadagiti adipen ti Dios. Gapuna, masapul a ditay tagtagilag-anen dagiti makadangran nga impluensiana ita. Adda pagannayasan ti imperpekto a tao nga agreklamo, isu a masapul a nasiputtayo iti aniaman a pagilasinan iti daytoy ket liklikantayo.​—7/15, panid 16-17.

• Kasanotay nga ammo a saan a basta kinasaririt ti tuktukoyen ti Proverbio 8:22-31?

Dayta a sirib ket ‘napataud,’ wenno naparsua, kas ti pamunganayan ti dalan ni Jehova. Sigud nga addan ti Dios ken kanayon a masirib; saan a naparsua ti siribna. Ti sirib a nadakamat iti Proverbio 8:22-31 ket adda iti denna ti Dios, kas “nasigo a managobra,” nga agaplikar iti espiritu a parsua, a nagbalin a Jesus ken sisisinged a nakipagtrabaho kenkuana iti panangparsua kadagiti amin a sabsabali pay a bambanag. (Colosas 1:17; Apocalipsis 3:14)​—8/1, panid 31.