Apay nga Aramidem No Ania ti Umiso?
NAMINSAN a kinuna ti maysa a de adal a lalaki: “Ta adda kaniak ti pannakabael nga agtarigagay, ngem awan ti pannakabael nga agaramid iti nasayaat. Ta ti naimbag a kayatko diak aramiden, no di ket ti dakes a diak kayat isu ti an-annurotek.” Apay a marigatan daytoy a lalaki nga agaramid iti naimbag a tarigagayanna? Inlawlawagna: “Masarakak, ngarud, daytoy a linteg iti kasasaadko: a no kayatko nga aramiden ti umiso, ti dakes ti adda kaniak. Pudno a pagragsakak ti linteg ti Dios maitunos iti kinatao nga adda iti unegko, ngem makitak iti kamkamengko ti sabali a linteg a makigubgubat iti linteg ti panunotko ken mangiturturong kaniak a kautibo iti linteg ti basol nga adda iti kamkamengko.”—Roma 7:18, 19, 21-23.
Dagitoy a sasao ni apostol Pablo, a nailanad dandani 2,000 a tawenen ti napalabas, ilawlawagna no apay a marigatan dagiti imperpekto a tattao nga agaramid iti umiso. Masapul ti kinatibker iti moral tapno maannurot ti nalinteg a prinsipio nangruna iti sidong ti pakasuotan. Isu a rumbeng nga imtuodentayo ti bagitayo, Ania ti kapatgan a rason nga aramidek ti umiso?
Usigem ti ibaga dagiti Kasuratan maipapan iti masanguanan ti nalinteg a tao. Iti Salmo 37:37, 38, kastoy ti mabasatayo: “Siputam daydiay awan pakababalawanna ket agtalinaedka a sikikita iti daydiay napalungdo, ta ti masanguanan dayta a tao natalnanto. Ngem dagiti met laeng managsalungasing sigurado a matalipuposto a sangsangkamaysa; ti masanguanan ti nadangkes a tattao pudno a magessatto.” Ibaga kadatayo ti Proverbio 2:21, 22: “Dagiti napalungdo isuda ti agtaengto iti daga, ket dagiti awan pakababalawanna isuda ti mateddanto iti dayta. No maipapan kadagiti nadangkes, magessatdanto iti mismo a daga; ket no maipapan kadagiti nagulib, maalat-atdanto iti dayta.”
Nupay dagitoy a karkari ken dagiti dadduma a masarakan iti Biblia maparegtadatayo nga agaramid iti makaay-ayo iti Dios, saan a dagitoy ti kangrunaan a rason nga agaramidtayo iti umiso. Ti rason ket mainaig iti maysa nga isyu a nakairamanan ti amin nga intelihente a parsua. Isalaysay ti sumaganad nga artikulo no ania dayta nga isyu ken no kasano a maapektarannatayo.