Dagiti Nagturpos iti Gilead Nakaawatda iti Makatukay-rikna nga Instruksion
IDI Setiembre 9, 2006, nagraduar ti maika-121 a klase ti Watchtower Bible School of Gilead iti Watchtower Educational Center idiay Patterson, New York. Makapabileg dayta a programa.
Ni Geoffrey Jackson, kameng ti Bagi a Manarawidwid dagiti Saksi ni Jehova, rinugianna ti programa babaen ti panangabrasana kadagiti 56 nga agturpos ken kadagiti 6,366 a timmabuno manipud iti nadumaduma a paset ti daga. Inlawlawagna ti Salmo 86:11, nga agkuna: “Isuronak, O Jehova, maipapan iti dalanmo. Magnaakto iti kinapudnom. Pagkaykaysaem ti pusok nga agbuteng iti naganmo.” Intampok ni Kabsat Jackson ti tallo a punto a naipaganetget iti dayta a bersikulo. Kinunana: “Iti umuna a sentensia, instruksion; iti maikadua a sentensia, aplikasion; ken iti maikatlo a sentensia, pannakatignay. Nangnangruna a napateg kadakayo a misionero dagita tallo a banag inton mapankayo kadagiti teritoriayo.” Kalpasanna, inruanganna dagiti agsasaruno a palawag ken interbiu a nangipaganetget kadagita a tallo a banag.
Makapabileg nga Instruksion
Ni William Malenfant, kameng ti hedkuarter, inlawlawagna ti tema a “Ti Kasayaatan a Biag a Mabalin a Matagiragsak.” Intampokna ti ulidan ni Maria, ti kabsat ni Marta. Naminsan idi simmarungkar ni Jesus iti pagtaenganda, pinili ni Maria ti agtugaw iti sakaanan ni Jesus tapno umimdeng, ta dayta ti napateg kenkuana. Ni Jesus kinunana ken ni Marta: “Pinili ni Maria ti naimbag a bingay, ket saanto a maikkat kenkuana dayta.” (Lucas 10:38-42) “Panunotenyo laengen dayta,” kinuna ti nagpalawag. “Agnanayonto a malaglagip ni Maria ti panagtugawna iti sakaanan ni Jesus ken ti panagimdengna kadagiti nagsasayaat a naespirituan a kinapudno. Maigapu dayta iti umiso a pangngeddengna.” Kalpasan a kinomendaranna dagiti agturpos gapu kadagiti umiso a naespirituan a pangngeddengda, kinunana: “Gapu kadagita a pangngeddengyo, piniliyo ti kasayaatan a biag.”
Ni Anthony Morris, kameng ti Bagi a Manarawidwid, isu ti simmaruno a nangipalawag iti tema nga “Ikawesyo ni Apo Jesu-Kristo,” a naibatay iti Roma 13:14. Kasanotayo a mayaplikar dayta? “Ti ‘panangikawes ken ni Apo Jesu-Kristo’ ramanenna ti panangtulad kadagiti kababalin ti Apo.” Gapuna, masapul a tuladentayo ti ulidan ken pagannayasan ni Jesus. “Saan nga alusiisen dagiti tattao a nakalangen ni Jesus,” kinuna ti ispiker, “gapu ta pudno a maseknan kadakuada ni Jesus, ket mariknada dayta.” Kalpasanna, inlawlawag ti ispiker no kasano a nagun-od dagiti estudiante ti adu a pannakaammo kabayatan ti panageskuelada iti Gilead ‘tapno maawatanda ti kaakaba ken kaatiddog ken kangato ken kauneg’ ti kinapudno, kas kunaen ti Efeso 3:18. Ngem impalagipna kadakuada ti bersikulo 19, nga agkuna: “Ken tapno maammuanyo ti ayat ti Kristo a manglab-aw iti pannakaammo.” Indagadag ni Kabsat Morris kadagiti estudiante: “Bayat nga itultuloyyo ti personal a panagadalyo, utobenyo no kasano a matuladyo ti naayat a kinamanangngaasi ni Kristo ket iti kasta, ‘maikawesyo ni Apo Jesu-Kristo.’”
Pammakada a Balakad Dagiti Instruktor ti Gilead
Ni Wallace Liverance, instruktor ti Gilead, ti simmaruno a nagpalawag iti tema a naibatay iti Proverbio 4:7. Kinunana a nupay nakapatpateg ti nadiosan a sirib, masapul met a ‘gun-odentayo ti pannakaawat,’ ti panangusig kadagiti nagduduma a kinapudno sa kitaen ti panagnanaigda tapno matarusan ti kababagasda. Impakita ti ispiker a ti pananggun-od iti pannakaawat mangyeg iti rag-o. Kas pagarigan, idi kaaldawan ni Nehemias, dagiti Levita “inlawlawagda ti linteg” ken ‘nangipaayda iti pannakaawat.’ Gapuna, dagiti umili intultuloyda ti “dakkel a panagrag-o, ta naawatanda ti sasao a naipakaammo kadakuada.” (Nehemias 8:7, 8, 12) Ingngudo ni Kabsat Liverance: “Ti rag-o ket resulta ti pannakaawat iti Sao ti Dios nga impaltiing ti espiritu.”
“Siasino a Talaga ti Kabusormo?” ti tema nga inlawlawag ni Mark Noumair, instruktor met laeng ti Gilead. Kadagiti gubat, adu a soldado ti di inggagara a matay babaen iti armas dagiti mismo a kakaduada. “Komusta met ti gubat a pakidangdangadangantayo?” inyimtuodna. “No saantayo nga agannad, mabalin a marirotayo no siasino a talaga ti kabusortayo ket nalabit a madangrantayo dagiti mismo a kakaduatayo.” Mabalin a ti imon ti mangriro kadagiti dadduma. Dayta ti makagapu a pinanggep ni Ari Saul a papatayen ni David, ti padana nga agdaydayaw, idinto ta dagiti Filisteo ti talaga a kabusorda. (1 Samuel 18:7-9; 23:27, 28) Intuloy ti ispiker: “Kasano no adu ti paglaingan ti kaduayo a misionero? Dangranyo kadi ti padayo a soldado babaen ti panangbabalaw kadakuada, wenno sipapakumbaba ketdi a bigbigentayo a talaga a nalalaingda ngem datayo iti dadduma a pamay-an? No dagiti pagkurangan ti sabsabali ti kitkitaentayo, mabalin a dayta ketdi ti mangriro kadatayo no siasino a talaga ti kabusortayo. Makidangadangtayo iti daydiay talaga a kabusortayo, ni Satanas.”
Makaparagsak a Kapkapadasan ken Makaisuro nga Interbiu
Ni Lawrence Bowen, instruktor iti Gilead, imparangna ti simmaruno a paset nga “Aramidenyo ti Trabaho ti Maysa nga Ebanghelisador,” a pakairamanan dagiti interbiu ken kapadasan. Inlawlawagna nga iti footnote ti 2 Timoteo 4:5 iti Reference Bible, kunana nga aramidenyo ti trabaho “ti maysa a misionero.” Innayon ti ispiker: “Maitutop dayta, yantangay ti kangrunaan a trabaho dagiti misionero a nasanay iti Gilead isu ti panangirakurakda iti naimbag a damag, kas inaramid daytoy a klase iti sadinoman a nakasarakanda kadagiti tattao.” Naidemostra ti sumagmamano a makaparagsak a kapadasan dagiti estudiante.
Simmaruno ti dua a paset nga imparang da Michael Burnett ken Scott Shoffner, agpada a kameng ti pamilia ti Bethel. Ininterbiuda dagiti miembro ti Komite ti Sanga manipud Australia, Barbados, Korea, ken Uganda. Ti komento dagiti miembro ti komite ipakitana no kasano kadakkel ti panangikagumaan a mangipaay iti kasapulan dagiti misionero, agraman ti panangipaay iti maitutop a pagtaengan ken pannakaaywan ti salun-atda. Impaganetget dagiti miembro ti komite a dagiti misionero a nagballigi isu dagidiay sidadaan a nakibagay kadagiti kasasaad ti lugar.
Makaparegta ken Mamagtignay a Pangserra a Palawag
Ti kangrunaan a palawag iti programa isu ti “Agbutengkayo iti Dios ket Idayawyo,” nga impaay ni John E. Barr, nabayagen a kameng ti Bagi a Manarawidwid. Inlawlawagna ti Apocalipsis 14:6, 7, nga agkuna: “Nakakitaak iti sabali pay nga anghel nga agtaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnanaed iti daga, ken iti tunggal nasion ken tribu ken pagsasao ken ili, a kunkunana iti natbag a timek: ‘Agbutengkayo iti Dios ket idayawyo, agsipud ta dimtengen ti oras ti panangukomna.’”
Indagadag ni Kabsat Barr kadagiti estudiante nga ipapusoda ti tallo a banag maipapan iti dayta nga anghel. Umuna, masapul nga iwaragawagna ti agnanayon a naimbag a damag—ti madaman a panagturay ni Kristo iti Pagarian buyogen ti naan-anay nga autoridad. Kinuna ti ispiker: “Naan-anay a mamatitayo nga isu ket naitrono idi 1914. Gapuna, masapul a maipakaammo daytoy a naimbag a damag iti intero a daga.” Maikadua, kinuna ti anghel: “Agbutengkayo iti Dios.” Inlawlawag ti ispiker a dagiti agturpos masapul a tulonganda dagiti iyad-adalanda iti Biblia a mangparayray iti panagraem iti Dios tapno dida aramiden dagiti saan a makaay-ayo kenkuana. Maikatlo, imbilin ti anghel: ‘Idaydayawyo ti Dios.’ Naidagadag kadagiti estudiante: “Diyo liplipatan nga agserserbitayo tapno maidaydayaw ti Dios, saan ket a datayo.” Kalpasanna, iti panangilawlawagna maipapan ‘iti oras ti panangukom,’ kinuna ni Kabsat Barr: “Nagbassiten ti tiempo a nabati ket dumtengen ti maudi a panangukom. Adu pay a tattao kadagiti teritoriatayo ti masapul a makangngeg iti naimbag a damag sakbay a maladaw ti amin.”
Bayat a sipapanunot kadagitoy a sasao ti 56 nga agturpos, nayawat kadakuada ti diplomada ken naibaonda kadagiti nadumaduma a paset ti daga. Napalalo ti pannakatukay ti rikna dagiti nagturpos ken dagiti timmabuno gapu kadagiti makaparegta a balakad a nangngegda iti dayta a makaparagsak nga aldaw.
[Kahon iti panid 17]
ESTADISTIKA TI KLASE
Bilang dagiti pagilian a nairepresentar: 6
Bilang dagiti pagilian a pakaibaonan: 25
Bilang dagiti estudiante: 56
Promedio nga edad: 35.1
Promedio a tawen iti kinapudno: 18.3
Promedio a tawen iti amin-tiempo a ministerio: 13.9
[Ladawan iti panid 18]
Ti Maika-121 a Klase a Nagturpos iti Watchtower Bible School of Gilead
Iti listaan ditoy baba, nanumeruan dagiti intar manipud iti sango nga agpalikud, ken nailista dagiti nagan manipud iti kannigid nga agpakannawan iti kada intar.
(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.