Panangbirok iti Espiritualidad
ITI nalatak a Sermonna iti Bantay, kinuna ni Jesus: “Naragsak dagidiay sipapanunot iti naespirituan a kasapulanda.” (Mateo 5:3) Nalabit patiem dagita a sasao. Dagiti tattao iti amin a lugar bigbigenda a kasapulanda ti espiritualidad iti biagda ket patienda a naragsakda no masarakandan dayta. Ngem ania ti kaipapanan ti “espiritualidad”?
Sigun iti maysa a diksionario, ti espiritualidad ket “panagbalin a sipapanunot wenno manangipateg kadagiti narelihiosuan a prinsipio” ken “panagbalin a naespirituan.” Gapuna, kasla agpapada ti kaipapanan dagiti termino nga “espiritualidad,” “panagbalin a naespirituan,” wenno “naespirituan ti panagpampanunotna.” Usigem daytoy a panangidilig tapno nalaklakam a maawatan ti termino: Ti tao a nalaing iti komersio ket makuna a sipapanunot iti negosio. Umasping iti dayta, makuna a naespirituan ti panagpampanunot ti tao a mangipatpateg kadagiti naespirituan a prinsipio wenno naespirituan a bambanag.
Kasano ngarud a masarakan ti pudno nga espiritualidad? Nupay ibaga ti dandani amin a relihion nga ammoda no kasano a mapennek ti tao ti naespirituan a kasapulanna, dagiti annuroten nga ipaulogda ket kas met la iti kaadu dagiti relihion. Adda Protestante nga agkuna nga isu ket naisalakanen gapu iti itatabunona iti maysa a taripnongda. Marikna ti maysa a Katoliko nga isu ket naikaykaysa iti Dios no mapan makimisa. Agbirok iti pannakalawlawag ti maysa a Budista babaen ti panagutob. Ikagumaan ti maysa a Hindu a mawayawayaan manipud iti maulit-ulit a pannakaipasngay babaen ti panangpaidamna iti bagina. Amin kadi dagitoy ket maibilang a pudno nga espiritualidad?
Saan ti sungbat ti adu kadagitoy a saludsod. Kunaenda a ti laeng kasapulan ket “panamati uray di makimiembro,” kayatna a sawen, panamati iti maysa a dios uray saanen a makimiembro iti maysa a relihion. Patien ti dadduma a saan a ti pannakimiembro iti maysa a relihion ti makuna nga espiritualidad, no di ket ti tarigagay a magun-od ti kinatalingenngen ken maaddaan iti panggep ti biag. Kunada a dagidiay agbirbirok iti espiritualidad saan a masapul nga adda relihionda. Masapul laeng nga agpannurayda iti riknada tapno mapnek ti naespirituan a kasapulanda. Kinuna ti maysa a mannurat: “Ti pudno nga espiritualidad ket adda iti kaunggan ti kinatao ti maysa. Tuktukoyenna ti panagayatmo, panangawat ken pannakilangenmo iti lubong ken kadagiti tattao iti aglawlawmo. Saan a masarakan dayta iti maysa a relihion wenno iti panamati iti dadduma a pannursuro ti relihion.”
Nalawag nga agduduma ti kapanunotan dagiti tattao maipapan iti espiritualidad. Rinibu a libro ti agkuna a maisuroda no kasano a magun-od ti espiritualidad, ngem masansan a marikna dagiti agbasbasa a saan a mapnek ti naespirituan a kasapulanda ken mariroda. Ngem adda maysa a libro nga addaan kadagiti mapagtalkan a panangiwanwan maipapan kadagiti naespirituan a bambanag. Dayta ti libro a masiguradotayo nga impaltiing ti Dios. (2 Timoteo 3:16) Kitaentayo no ania ti kuna dayta a libro, ti Biblia, maipapan iti kaipapanan ti espiritualidad ken no ania ti pateg dayta.
[Picture Credit Line iti panid 2]
AKKUB: Ladawan: © Mark Hamblin/age fotostock