“Ti Gubat a Mamagpatingga iti Amin a Gubat”
‘Ikarik kadakayo a daytoy ti kaudian a gubat—ti gubat a mamagpatingga iti amin a gubat.’—WOODROW WILSON, PRESIDENTE TI ESTADOS UNIDOS (1913-21).
DAYTA ti ninamnama ti maysa a pangulo iti lubong idi agpatingga ti Gubat Sangalubongan I, agarup 90 a tawenen ti napalabas. Nakaro unay dayta a sangalubongan a gubat. Kayat a patien dagiti nangabak iti gubat a manayon dagiti pagimbagan ti adu a sakripisioda. Ngem dagiti natauan a gubat ket manmano a mangsolbar kadagiti parikut, nangruna kadagiti nauneg ti pannakairamutna a parikut maipapan iti gubat a mismo.
Agarup 20 a tawen kalpasan dayta a dinadarasudos a kari ni Presidente Wilson, bimtak ti maikadua a gubat sangalubongan. Ad-adu nga amang ti natay ken nadadael ngem iti umuna a gubat sangalubongan. Iti dua a dekada nga irarang-ay ti teknolohia, ad-adda a limmaing ti sangatauan a mangikisap iti adu a biag. Bayat ti panagpatingga ti maikadua a gubat sangalubongan, naamiris dagiti panguluen iti lubong a dakdakkel manen ti posibilidad a tumaud ti sabali pay a gubat.
Idi 1945, kastoy ti kinuna ni Douglas MacArthur, a maysa a heneral iti Estados Unidos: “Itan ti kaudian a gundawaytayo a mamagpatingga iti gubat. No ditay mangpartuat iti daddadakkel ken nasaysayaat a sistema, bumtak ti Armagedon.”
Ammo ni Heneral MacArthur ti naaramidan ti dua a bomba atomika idiay Nagasaki ken Hiroshima bayat dagiti maudi nga aldaw ti maikadua a gubat sangalubongan. Ti nakaro a pannakadadael dagita a dua a siudad idiay Japan ti namkuatanna a mangted iti baro a kayulogan ti sao nga “Armagedon”—maysa nga umap-apuy ken naan-anay a pannakadadael gapu iti nuklear a gubat a mabalin a mangpukaw iti sibilisasion ti planetatayo.
Agtultuloy a pagdandanagan ti sangatauan ti posibilidad a mapasamak ti nuklear a gubat. Idi dekada 1960, dagiti kabibilgan a turay iti lubong ket nakapanunot iti estratehia a pinanagananda iti “mutually assured destruction.” Kalatda ti maaddaan kadagiti umdas a missile wenno pamay-an a mangpabettak kadagita tapno masierto ti pannakadadael ti 25 a porsiento iti populasion dagiti sibilian ti kabusorda a nasion. Kalatda pay a dadaelen ti 50 a porsiento a bileg ti industria ti aniaman a nasion a nangirugi iti gubat. Manmano ti naliwliwa iti dayta nga estratehia nga agpaay iti panangtaginayon iti sangalubongan a talna.
Ita, umad-adu latta dagiti nuklear nga igam ken agtultuloy ti pannakapapatay ti nagadu a tattao gapu kadagiti gubat iti nadumaduma a rehion. Pangta pay laeng iti sangatauan ti posibilidad a bumtak ti nuklear a gubat. Nupay il-iliwen dagiti tattao ti panagpatingga ti gubat, manmano ti mamati a ti gubat wenno aniaman pay a namilitariaan wenno napolitikaan nga estratehia ti makaragpat iti dayta a kalat.
Nupay kasta, deskribiren ti Biblia ti maysa a naisangsangayan a gubat a mamagpatingga iti amin a gubat. Awaganna dayta a gubat kas “Armageddon”—ti mismo a sao a masansan nga inaig dagiti tattao iti nuklear a gubat. Kasano a ti Armagedon ti napaypayso a makaiyeg iti panagpatingga ti gubat? Dayta a saludsod ket masungbatan iti sumaganad nga artikulo.
[Picture Credit Line iti panid 3]
DTRA Photo
[Picture Credit Line iti panid 4]
Nagasaki, Japan, 1945: Rinetrato ti USAF