No Adda Matay nga Ay-ayatem
Idi Martes, Hulio 17, 2007, iti agarup alas siete ti rabii, adda pangpasahero nga eroplano a simmiasi iti runway ti kaokupaduan nga eropuerto ti Brazil iti sentro ti São Paulo. Binallasiwna ti maysa a haywey sa naidungpar iti maysa a bodega dagiti kargamento. Agarup 200 a tattao ti natay iti dayta nga aksidente.
NADESKRIBIR dayta kas ti kakaruan nga aksidente iti eroplano a napasamak idiay Brazil a dinto pulos malipatan dagidiay natayan iti ay-ayaten. Maysa ni Claudete kadagita a natayan. Madama nga agbuybuya iti TV idi naammuanna ti damag maipapan iti naidungpar nga eroplano. Ti anakna a ni Renato ket maysa kadagiti pasahero dayta nga eroplano. Agtawen laeng iti 26 ken planona pay ketdin ti agkasar iti Oktubre. Inkagumaan ni Claudete a kontaken ti anakna babaen iti selpon, ngem awan ti simmungbat. Naglusdoy ni Claudete ken nagsangit iti kasta unay.
Natay ti nobio ni Antje gapu iti nakaro nga aksidente iti lugan idi Enero 1986. Napalalo ti pannakaklaatna idi naammuanna ti damag. Kinunana: “Diak patien idi damo. Impagarupko a maysa laeng a dakes a tagtagainep dayta ket inton mariingak, maammuak a saan nga agpayso dayta. Agpigpigergerak ken naut-ot ti bagik a kas man la adda nangdanog iti rusokko.” Iti simmaganad a tallo a tawen, nagsagaba ni Antje iti depresion. Nupay nasurok a 20 a tawenen ti napalabas sipud idi napasamak ti aksidente, agpigerger pay laeng no malagipna dayta.
Kurang ti sasao a mangiladawan iti napalalo a pannakaklaat, di panamati, pannakabibineg ti rikna, ken kinaawan namnama a mabalin nga ibunga dagiti kasta a nakalkaldaang ken di inekspektar nga ipapatay. Ngem uray no ammomon nga asidegen a matay ti ay-ayatem a nalabit gapu iti nabayagen a sakit, kaskasdi nga agladingitka latta iti napalalo. Awan a pulos ti naan-anay a nakasagana iti ipapatay ti maysa nga ay-ayaten. Natay ti nanang ni Nanci idi 2002 kalpasan ti nabayag a panagsakitna. Ngem idi aldaw a natay ni nanangna, naimayeng ni Nanci a nagtugaw iti suelo ti ospital. Kasla awanen ti serserbi ti biagna. Lima a tawenen ti napalabas ngem kaskasdi nga agsangit no malagipna ni nanangna.
Kinuna ni Dr. Holly G. Prigerson: “Saan a pulos a malipatan dagiti tattao ti ipapatay ti ay-ayatenda, basta mairuamda laeng iti kaawanen ti ing-ingungotenda.” Inekspektarmo man wenno saan ti ipapatay ti maysa nga ay-ayatem, mabalin a pampanunotem: ‘Gagangay laeng aya ti agladingit? Kasano a mailiwliwagko ti ipapatay ti ay-ayatek? Addanto kadi tiempo nga agkitakami manen?’ Dagita a saludsod ken ti dadduma pay a mabalin nga iyim-imtuodmo ket masungbatan iti sumaganad nga artikulo.
[Picture Credit Line iti panid 3]
EVERTON DE FREITAS/AFP/Getty Images