Umadanika iti Dios
“Ti Dios ti Amin a Liwliwa”
ADU a banag iti biag a kas iti panagsagaba, pannakaupay, ken panagmaymaysa ti mabalin a mangyeg iti ladingit ken uray iti kinaawan namnama. No kasta ti kasasaadmo, nalabit a mapanunotmo, ‘Adda ngata ti makatulong kaniak?’ Iti 2 Corinto 1:3, 4, ipatpatuldo ni apostol Pablo ti maysa a sigurado a gubuayan ti liwliwa—ni Jehova a Dios.
Iti bersikulo 3, naawagan ti Dios iti “Ama dagiti nadungngo nga asi.” Ania ti kaipapananna dayta? Ti Griego a sao a naipatarus a “dagiti nadungngo nga asi” ket mabalin a tukoyenna ti pannakipagrikna kadagiti agsagsagaba.a Kuna ti maysa a reperensia maipapan iti Biblia a daytoy a termino ket mabalin a maipatarus a “maasian” wenno “maseknan unay.” Ti Dios ket addaan iti “nadungngo nga asi” isu a magutugot nga agtignay. Saan aya a kayattayo ti umadani iti Dios no ammotayo a paset dayta ti personalidadna?
Ni Jehova ket tinukoy met ni Pablo kas “ti Dios ti amin a liwliwa.” Nagusar ditoy ni Pablo iti sao a mangiraman iti “ideya a panangliwliwa iti maysa nga addaan parikut wenno agladladingit ken iti ideya a panangipaay iti tulong wenno pammaregta.” Inlawlawag ti The Interpreter’s Bible: “Liwliwaentayo ti agsagsagaba no pabilgentayo a mangibtur iti saem a marikriknana.”
Mabalin nga iyimtuodmo, ‘Kasano ti panangliwliwa ken panangpabileg ti Dios kadatayo a mangibtur iti saem?’ Ti kangrunaan ket babaen ti Biblia a Saona ken ti kararag nga insagutna. Kuna kadatayo ni Pablo a ti Dios ket siaayat nga impaayna kadatayo ti Saona tapno “babaen ti liwliwa manipud iti Kasuratan maaddaantay koma iti namnama.” Kanayonanna, babaen ti naimpusuan a panagkararagtayo, mariknatayo “ti talna ti Dios a mangringbaw iti isuamin a panunot.”—Roma 15:4; Filipos 4:7.
Iti ania a liwliwaen ni Jehova dagiti adipenna? Kinuna ni Pablo a ti Dios ‘liwliwaennatayo iti amin a rigattayo.’ (2 Corinto 1:4) Aniaman ti mapaspasarantayo a rigat, tuok, wenno panagsagaba, maipaayannatayo ti Dios iti kasapulantayo a tured ken bileg tapno makapagibturtayo. Saan kadi a makaparegta dayta?
Ti magunggonaan iti panangliwliwa ti Dios ket saan laeng a daydiay liwliwaenna. Innayon ni Pablo a liwliwaennatayo ti Dios ‘tapno mabalinantayo a liwliwaen dagidiay adda iti aniaman a kita ti rigat babaen ti liwliwa a pinangliwliwa kadatayo ti Dios.’ Gapu ta naliwliwatayo iti rigattayo, ammotayo met ti makipagrikna iti sabsabali ken matignaytayo a tumulong kadagidiay agkasapulan.
Nupay ni Jehova “ti Dios ti amin a liwliwa,” saanna a kayat a sawen a pukawenna dagiti parikut wenno saem a sagsagabaentayo. Ngem daytoy ti masiguradotayo: No agpaliwliwatayo kenkuana, pabilgennatayo a mangibtur ken mapagballigiantayo ti aniaman a panagleddaang wenno parikut iti biag. Ti kasta a mannakipagrikna a Dios ket talaga a maikari a dayawen ken itan-oktayo.
[Footnote]
a Ti Dios ket naawagan iti “Ama dagiti nadungngo nga asi” gapu ta isu ti gubuayan ti asi ken paset dayta ti personalidadna.