Surat Manipud Nicaragua
“Inton Makadanonka Idiay Karayan Coco, Agpakannawanka”
“KASAPULAM ti de dual a lugan, pagguyod a makina, ken kanayonan a krudo. Saganaam ti pannakailumlom ti luganmo iti kapitakan. Inton makadanonka idiay karayan Coco, agpakannawanka.”
Makapaupay dayta nga imbaga ti padak a misionero. Kaskasdi, inkeddengko ti agbiahe iti agsapa ti Martes tapno tabunuak ti Nakristianuan nga asamblea idiay Wamblán, maysa a bassit nga ili iti makin-amianan a Nicaragua.
Idi agbannawag, rinugiakon ti agbiahe iti napalanas a Pan-American Highway babaen ti daan ngem nalagda a trakko. Idiay Jinotega, dimmalanak iti saan a sementado a kalsada nga aw-awagan dagiti lumugar iti feo, wenno naalas. Sakbay a nakaruarak iti dayta nga ili, adda nakitak a dua a tiendaan a nanaganan iti Milagro ti Dios ken Ti Panagungar.
Agkurbakurba ken sumang-at sumalog ti dalan. Imbumbuntogko ti nagmaneho tapno saanak a mairangkis. Nalabsak ti maysa nga atiddog a dan-aw iti tanap ti nangato a bantay a naabbungotan iti ulep. Iti naangep a lugar, nakitak dagiti kayo nga aduan iti orkidia ken lumot a maawagan iti Spanish moss.
Iti sumalog ken kurbado a dalan, dandanik nakadungpar ti sumungsungad a bus a tumartaray iti tengnga ti kalsada. Bayat a limmabas, nagipugso iti nangisit nga asuk ken nangiwarsi iti batbato dagiti pilidna. Ditoy Nicaragua, mabasa iti sango dagiti bus dagitoy a birngas dagiti agresibo a drayber: Konkistador, Manggagama, Beklat, wenno Mangnganup.
Idi agmatuon, addaakon iti Tanap ti Pantasma. Nalabsak ti maysa a balay a naaramid iti kayo nga addaan iti nadalus a paraangan. Ti buya ket kasla iti ladawan iti maysa a daan a libro: Adda lakay a nakatugaw iti bangko, adda aso a matmaturog iti sirok ti kayo, ken adda dua a kapon a baka a naisingkaw kadagiti sangolda ti maysa a kariton a kayo dagiti pilidna. Iti maysa a bassit nga ili, adda nakitak a dakkel a grupo dagiti estudiante a naggapu iti eskuelaan. Kolor baybay ti unipormeda isu a kasda la allon nga agtaptapliak iti aplaya bayat a magmagnada iti kalsada.
Dumagdagaang bayat nga umas-asidegak iti Wiwilí ket nakitak met laengen ti karayan Coco. Dayta a dakkel a karayan ket maysa a kangrunaan a paset ti ili gapu ta kanayon nga agay-ayus dayta. Maitunos iti naited a direksion, nagpakannawanak ket dinaliasatko ti napeggad a 37 a kilometro a kalsada nga agturong idiay Wamblán.
Bayat ti panagdaliasatko iti lasonglasong a kalsada, walo wenno siam a waig ti binallasiw ti trakko. Bayat a likliklikak dagiti lasong iti natapok a dalan, immatipukpok ti tapuk. Isu a “nanganak iti tapuk,” kas iti kunaen dagiti lumugar. Kamaudiananna, nakagtengak met laengen idiay Wamblán a destinasionko, ti lugar nga aduan iti kaykayo.
Kabigatanna, nupay 4:30 pay la ti parbangon, kasla nakariingen ti amin a tattao. Gapu iti awan sarday a panagtaraok dagiti kawitan, nariing ken bimmangonak saak napan iti kangrunaan a kalsada. Iti napariir a bantay, umayamuom ti tortilia a malutluto kadagiti urno.
Adu a pader ti napintaan kadagiti buya ti paraiso babaen ti maysa a lumugar a pintor. Dagiti tiendaan iti igid ti kalsada ket addaan kadagiti karatula dagiti softdrink. Adda met dagiti poster a mangipalagip kadagiti kari dagiti naudi a tallo a gobierno. Nakakitaak met kadagiti kasilias a naaramid iti galba ken semento.
Siak ti nangirugi iti saritaan babaen ti panangibagak iti Adiós, ti sao a pangkablaaw dagiti taga-Nicaragua. Naisem ken nainggayyeman dagiti umili iti pannakisaritada kaniak. Gapu iti arimpadek dagiti kabalio ken mulo, kasapulan a pigsaanmi ti agsao tapno agkikinnaawatankami.
Iti rabii ti Biernes, simmangpet dagiti pamilia para iti dua nga aldaw nga asamblea. Adda dagiti nagnagna, nagkabalio, ken naglugan iti trak. Dadduma nga ubbing a lallaki ken babbai a nakatsinelas iti plastik ti nagnagna iti innem nga oras. Situtured a binallasiwda dagiti karayan a namulaan kadagiti bomba ken dagiti nalinak a dandanum nga ayan dagiti alimatek. Adda dagiti naggapu iti adayo a komunidad a nagbalon iti bassit laeng a taraon—innapuy a nalaokan iti taba ti baboy. Ania ti immayanda amin?
Immayda tapno pabilgenda ti namnamada a nasaysayaat a masanguanan. Immayda tapno imdenganda ti pannakailawlawag ti linaon ti Biblia. Immayda tapno paragsakenda ti Dios.
Dimtengen ti Sabado. Iti pagasambleaan a naatepan iti galba, nasurok a 300 ti nagtugaw kadagiti bangko ken plastik a tugaw. Pinasuso dagiti inna dagiti maladagada. Mangngeg ti ganukgok dagiti baboy ken taraok dagiti kawitan iti asideg a pagtaraknan.
Dimmagaang, ket di nagbayag dandani dimin maanusan ti barana. Kaskasdi, sipapasnek a nagimdeng ti tallaong kadagiti naipaay a balakad ken panangiwanwan. Kinitada met iti Bibliada dagiti teksto a binasa ti ispiker, kinansionda dagiti kanta a naibatay kadagiti topiko ti Biblia, ken siraraem a nagimdengda kadagiti nangidaulo iti kararag.
Kalpasan dagiti sesion, nakikaduaak iti dadduma a nakiay-ayam iti kinnamatan kadagiti ubbing. Kalpasanna, rinepasomi dagiti innotar dagiti agtutubo. Impakitak kadakuada ti adda iti kompiuterko a ladladawan dagiti bituen ken galaksi. Umis-isem dagiti ubbing, ken naragsakan dagiti nagannakda.
Nagpatingga ti asamblea a dimi napupuotan, ket kasapulan nga agawiden ti tunggal maysa. Kabigatanna, pimmanawak a napnuan iti naragsak a pakalaglagipan ken nalapunos ti pusok iti ayat para kadagiti baro a gagayyemko. Naadalko kadakuada no kasano ti agbalin a kontento ken aguray iti Dios, ket determinadoak a mangtulad kadakuada.
[Dagiti Ladawan iti panid 17]
Adu a kilometro ti dinaliasat dagiti pamilia tapno tabunuanda ti asamblea idiay Wamblán