Nasarangetko Dagiti Pakarigatan Gapu iti Pammatik

Kas insalaysay ni Soledad Castillo

Sumagmamano a daras a gistay nalapunosak iti ladingit​—ngem naibturak dayta. Idi agtawenak iti 34, natay ti ing-ingungotek nga asawa. Innem a tawen kalpasanna, natay ni tatangko. Walo a bulan kalpasan dayta, naammuak nga adda di maagasan a sakit ti kakaisuna nga anakko.

SOLEDAD ti naganko, a kaipapananna “Ladingit.” Nupay kasta, diak pulos narikna a nabaybay-anak. No maipasangoak kadagiti rigat, ammok nga adda ni Jehova a Dios a ‘mangig-iggem iti imak isu a diak nagbuteng.’ (Isaias 41:13) Palubosandak a mangilawlawag no kasano a napagballigiak dagiti pakarigatan ken no kasano a nakatulong dagita tapno ad-adda a sumingedak ken Jehova.

Naragsak a Biag ken Manmano a Parikut

Nayanakak idiay Barcelona, Espania, idi Mayo 3, 1961. Maymaysaak nga anak da José ken Soledad. Idi agtawenak iti siam, naammuan ni nanangko ti kinapudno iti Sao ti Dios. Agbirbirok iti makapnek a sungbat kadagiti saludsodna maipapan iti relihion ngem dina nasarakan dayta iti relihionna. Maysa nga aldaw, simmarungkar ti dua a Saksi ni Jehova iti pagtaenganda ket sinungbatanda amin a saludsodna manipud iti Biblia. Sidadaan nga inawatna ti panagadal iti Biblia.

Di nagbayag, nagpabautisar ni nanangko kas Saksi ni Jehova, ket sumagmamano laeng a tawen kalpasanna, nagpabautisar met ni tatangko. Ni Eliana, a mangyad-adal ken nanangko, nadlawna nga interesadoak iti Sao ti Dios. Nupay ubingak pay, insingasingna a mayadalanak met iti Biblia. Agyamanak iti tulongna ken iti pammaregta ni nanangko ta nabautisaranak idi agtawenak iti 13.

Bayat ti kinatin-edyerko, masansan nga agkararagak ken Jehova​—nangruna no adda pangngeddeng nga aramidek. Kinapudnona, manmano dagiti parikutko idi agtutuboak pay. Adu ti gagayyemko iti kongregasion, ket nasingedak kadagiti dadakkelko. Idi 1982, nakiasawaak iti maysa a Saksi a ni Felipe. Agpada dagiti naespirituan a kalatmi.

Sinursuruanmi ti Anakmi nga Ayatenna ni Jehova

Lima a tawen kalpasanna, impasngayko ti maysa a nasalun-at a maladaga a lalaki a pinanagananmi iti Saúl. Naragsakankami ken Felipe a maaddaan iti anak. Namnamaenmi a dumakkel ni Saúl a nasalun-at, makaay-ayo nga ubing nga addaan iti panagayat iti Dios. Adu a panawen ti binusbosmi ken Felipe a nakikadua ken Saúl, nangisarita kenkuana iti maipapan ken Jehova, nagkakadua a mangan, nagpasiar iti parke, ken nakiay-ayam kenkuana. Kaay-ayo ni Felipe nga ikuyog ni Saúl a mangiranud kadagiti kinapudno ti Biblia iti sabsabali. Ubing pay idi sinuruan ni Felipe a mangasaba, mangitalmeg kadagiti kampanilia iti ruangan, ken mangitukon kadagiti polieto kadagiti tattao.

Nagsayaat ti epekto ti panagayat ken panangsanaymi ken Saúl. Idi agtawenen iti innem, kanayonen a sumurot kadakami a mangasaba. Pagay-ayatna ti dumngeg kadagiti estoria iti Biblia, ket segseggaanna ti panagadal ti pamiliami iti Biblia. Idi ageskuelan, nangrugin a mangaramid kadagiti desision a maibatay iti pannakaammona iti Biblia.

Nupay kasta, idi agtawen ni Saúl iti pito, dakkel ti nagbaliwan ti biag ti pamiliami. Nagimpeksion dagiti bara ni Felipe gapu iti virus. Inibturanna ti sakitna iti 11 a bulan, saan a makapagtrabaho ken masansan a nakaidda. Natay ti asawak idi agtawen iti 36.

Makasangitak pay laeng no malagipko dagiti narigat a tawen a napasaranmi. Naimatangak ti in-inut a panagkapsut ni lakayko gapu iti pannakidangadangna iti virus, ket awan ti maaramidak. Bayat dagita a tawen, kanayon a parparegtaek ni Felipe, nupay ammok a saanen a matungpal dagiti arapaap ken panggepmi iti biag. Ibasaak kadagiti artikulo a naibatay iti Biblia ket dagitoy ti mangpabileg kadakami no saankami a makatabuno kadagiti Nakristianuan a gimong. Idi natay ti asawak, mariknak ti dakkel a kinakawaw ti biagko.

Ngem tinulongannak ni Jehova. Kanayon a kiddawek nga ipaayannak iti espirituna. Nagyamanak kenkuana kadagiti naragsak a panagkaduami kenni Felipe ken iti namnama a makitakto manen inton panagungar. Kiniddawko iti Dios a tulongannak nga agbalin a naragsak gapu kadagiti pakalaglagipan nga imbati ni lakayko ken ikkannak iti sirib a mangpadakkel iti anakmi kas pudno a Kristiano. Nupay maladingitanak unay, naliwliwaak.

Tinulongandak met dagiti dadakkelko ken dagiti kakabsat iti kongregasion. Kaskasdi, inyadalak iti Biblia ni Saúl ken insurok kenkuana no kasano a pagserbian ni Jehova. Maysa a dati nga amok ti nangitukon kaniak iti nasayaat a trabaho iti opisina, ngem pinilik ti agtrabaho kas paradalus tapno ad-adu ti panawenko ken Saúl sa makaduak no agawiden manipud eskuelaan.

Maysa a teksto ti Biblia ti nangipalagip kaniak iti kinapateg ti naespirituan a panangsanay ken Saúl: “Sanayem ti ubing sigun iti dalan nga agpaay kenkuana; uray no lumakay saanto a sumiasi iti dayta.” (Proverbio 22:6) Ipanamnama kaniak daytoy a teksto a no aramidek ti amin a kabaelak a mangisuro ken Saúl kadagiti prinsipio ni Jehova, bendisionanna dagiti panagreggetko. Wen, masapul nga isakripisiok dagiti material a pagnam-ayan tapno ad-adu ti tiempok iti anakko, ket napatpateg daytoy kaniak ngem ti aniaman a material a pagimbagan.

Idi agtawen ni Saúl iti 14, natay ni tatangko. Dakkel ti epektona ken Saúl ti ipapatay ni lolona, ta naipalagip manen kenkuana ti saem ti ipapatay ni tatangna. Nakaipaay met ni tatangko iti nasayaat a pagwadan iti panagayat ken Jehova. Kalpasan ti ipapatay ni Tatang, nabigbig ni Saúl a gapu ta isu laeng ti lalaki iti pamilia, isun ti mangaywan kadakami ken lolana.

Pannakidangadang iti Leukemia

Walo a bulan kalpasan ti ipapatay ni tatangko, imbaga ti doktor ti pamiliami nga ipanko ni Saúl iti ospital iti lugarmi, ta agsagsagaba iti nakaro a pannakabannog. Kalpasan ti adu a panangeksamen, imbaga dagiti doktor nga adda leukemia ni Saúl.a

Bayat ti simmaganad a dua ket kagudua a tawen, kanayon a maospital ni Saúl bayat nga ib-ibturanna ti kanser ken ti chemotherapy, maysa a pamay-an ti panangagas dagiti doktor a manglaban iti kanser. Nakontrol ti kanser iti maysa ket kagudua a tawen gapu iti umuna nga innem a bulan a panangagas. Ngem nagsubli ti kanser, ket nagpa-chemotherapy manen ni Saúl isu a kimmapuy iti kasta unay. Apagbiit laeng a nalapdan ti kanser, ket saanen a kabaelan ni Saúl ti agpa-chemotherapy iti maikatlo a daras. Indedikaren ni Saul ti biagna iti Dios ken kayatnan ti agpabautisar kas maysa kadagiti Saksi ni Jehova, ngem natay kalpasan laeng nga agtawen iti 17.

Masansan nga isingasing dagiti doktor ti panagpayalison iti dara tapno maep-ep ti ut-ot nga itden ti chemotherapy. Siempre, saan a makaagas ti panangyalison iti dara. Idi natakuatan dagiti doktor a leukemia ti sakit ni Saúl, inlawlawagmi nga agina a saanmi nga awaten ti panangyalison iti dara, ta kayatmi a tungpalen ti bilin ni Jehova nga ‘umadayo iti dara.’ (Aramid 15:10, 20) Uray awanak, adda dagiti gundaway a masapul a kombinsiren ni Saúl dagiti doktor a bukodna a desision ti saanna a panagpayalison iti dara. (Kitaenyo ti kahon iti panid 31.)

Kamaudiananna, mamatin dagiti doktor a nupay maysa nga agtutubo, nataenganen ti panagpampanunotna ken maawatanna ti epekto kenkuana ti sakitna. Rinaemda ti desisionmi ket saanda a nagusar iti dara, nupay kanayon a pilitendakami nga agpayalison. Maipagpannakkelko ni Saúl idi dengdenggek a nangilawlawag iti desisionna kadagiti doktor. Talaga a napatanorna ti nasinged a relasion ken Jehova.

Iti kombension distrito idiay Barcelona, nairuar ti libro a napauluan iti Umadanika ken Jehova, idi kalgaw a damo a natakuatan ti sakit ni Saúl. Dayta a nagpateg a libro ti nagbalin a kasla sinipete tapno makapagtalinaedkami a natibker yantangay dimi ammo no ania ti mapasamak kadakami iti masanguanan. Binasami a dua ti sumagmamano a pasetna bayat ti kaaddami iti ospital. Masansan a malagipmi dagiti linaonna bayat dagiti adu a narigat a panawen nga inibturanmi. Ti teksto iti Isaias 41:13, a nadakamat iti rugrugi dayta a libro, ket naaddaan iti naisangsangayan a kaipapanan kadakami. Kunana: “Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’”

Natignay ti Puso ti Dadduma Gapu iti Pammati ni Saúl

Dayawen dagiti doktor ken nars iti ospital iti Vall d’Hebrón ti nataengan a panagpampanunot ken kinapositibo ni Saúl. Isu ket impatpateg ti intero a grupo dagiti nangagas kenkuana. Adda sumagmamano nga ubbing a Saksi nga addaan iti leukemia nga inagasan idin ti kangrunaan a hematologo a mangtamtaming iti kanser ket impakitaanna ida iti panagraem ken dignidad. Nalagipna ti natibker a desision ni Saúl a mangsalimetmet iti pammatina, ti kinaturedna a nangsango iti ipapatay, ken ti naragsak a panangmatmatna iti biag. Imbaga ti grupo dagiti nars nga isu ti kasayaatan a pasiente nga inagasanda iti dayta a ward. Imbagada a saan nga agrekreklamo ken naragsak​—uray idi dandanin matay.

Maysa a sikologo ti nangibaga kaniak nga adu nga annak a naipasango iti kasta a makapapatay a sakit ti nauyong kadagiti doktor ken nagannak gapu iti ut-ot ken pannakaupay. Nadlawna a saan a kasta ni Saúl. Masmasdaaw a makakita ken Saúl a kalmado ken positibo. Daytoy ti nangted kadakami ken Saúl iti gundaway a mangiranud kenkuana iti patpatienmi.

Malagipko pay no kasano a di inggagara a natulongan ni Saúl ti maysa a Saksi iti kongregasionmi. Innem a tawenen nga agsagsagaba iti depresion ken saan a nakatulong dagiti agasna. Adu a rabii a binantayanna ni Saúl idiay ospital. Imbagana nga apresiarenna ti kababalin ni Saúl a nangsaranget iti leukemia. Nadlawna a nupay nakapuy ni Saúl, inkagumaanna a pinaregta dagiti bisitana. “Ti ulidan ni Saúl ti nangted kaniak iti tured a mangandur iti depresion,” kinuna daytoy a Saksi.

Tallo a tawenen ti napalabas sipud idi natay ni Saúl. Siempre, malmaldaanganak pay laeng. Nakapuyak, ngem inikkannak ti Dios iti “pannakabalin a nalablabes ngem ti gagangay.” (2 Corinto 4:7) Nasursurok nga adda nasayaat nga epekto ti uray nasaem ken karirigatan a kapadasan. Ti panangdaerko iti ipapatay ti asawak, tatangko, ken anakko ti nakatulong kaniak nga agbalin a nakonsiderasion ken mannakaawat kadagiti agsagsagaba. Kangrunaanna, nagbalinak a nasingsinged ken Jehova. Mabalinko a sanguen ti masanguanan nga awanan buteng agsipud ta tultulongannak ti nailangitan nga Amak. Arigna a kibkibinennak.

[Footnote]

[Kahon/Ladawan iti panid 31]

NAPANUNOTYO KADIN?

Nalabit nangngegyon a saan nga agpayalison iti dara dagiti Saksi ni Jehova. Napanunotyo kadin no apay?

Masansan a di maawatan dagiti tattao daytoy a Nainkasuratan a takderda. No dadduma, ipagarupda a pagkedkedan dagiti Saksi ni Jehova ti amin a kita ti panangagas wenno saanda nga ipatpateg ti biagda. Saan nga agpayso dayta. Kayat dagiti Saksi ni Jehova ti kasayaatan a pamay-an ti pannakaagas a magun-odan para kadakuada ken ti pamiliada. Nupay kasta, agpaagasda iti pamay-an a saan nga agusar iti dara. Apay?

Gapu ta naibatay ti desisionda iti napateg a linteg nga inted ti Dios iti sangatauan. Kalpasan la unay ti Layus idi kaaldawan ni Noe, impalubos ti Dios iti sangakabbalayan ni Noe a manganda iti lasag dagiti animal. Ngem adda imparit ti Dios: Saanda a kanen ti dara. (Genesis 9:3, 4) Nagtaud ken Noe ti amin a tao, isu nga agaplikar daytoy a linteg iti intero a sangatauan. Saan a pulos a nagbalbaliw dayta. Kalpasan ti walo a siglo, pinatalgedan manen ti Dios dayta a linteg iti nasion ti Israel, nga inlawlawagna a sagrado ti dara, a mangirepresentar iti kararua, wenno iti biag a mismo. (Levitico 17:14) Nasurok a 1,500 a tawen kalpasanna, imbilin dagiti apostol kadagiti amin a Kristiano nga ‘itultuloyda ti umadayo iti dara.’​—Aramid 15:29.

Iti panangmatmat dagiti Saksi ni Jehova, saanda nga ad-adaywan ti dara no iserrekda met dayta iti bagida babaen ti panagpayalison. Gapuna, pilienda dagiti pamay-an ti panangagas nga awan ti mausar a dara. Masansan nga agbanag dayta a Nainkasuratan a takder iti de kalidad a pamay-an ti pannakaagas. Awan duadua a dayta ti makagapu no apay nga adu a tattao a saan a Saksi ni Jehova ti agkiddaw met iti pannakaagas a saan nga agusar iti dara.

[Ladawan iti panid 29]

Kaduak ti lakayko a ni Felipe ken ti anakmi a ni Saúl

[Ladawan iti panid 29]

Dagiti dadakkelko a da José ken Soledad

[Ladawan iti panid 30]

Ni Saúl, maysa a bulan sakbay ti ipapatayna