Tulong Kadagiti Biktima ti Bagyo Idiay Myanmar

IDI Mayo 2, 2008, ti Bagyo a Nargis dinalapusna ti Myanmar, a nangdadael iti pagilian ken alisto a nagdinamag iti intero a lubong. Dandani 140,000 ti naipadamag a natay wenno mapukpukaw kalpasan ti kellaat a pannakalayus ti rehion ti Irrawaddy Delta gapu iti bagyo.

Nakaskasdaaw ta awan ti nadangran kadagiti adu a Saksi ni Jehova iti dayta a lugar. Ti maysa a dakkel a rason ket ti panagkamangda kadagiti natibker ti pannakaibangonna a Kingdom Hall. Iti maysa a lugar, 20 a Saksi ken 80 a dadduma pay a pumurok ti 9 nga oras a nakatugaw iti atep ti Kingdom Hall bayat a ngimmato ti danum iti 5 a metro. Nakalasatda amin. Ngem nakalkaldaang ta natay ti 300 a dadduma pay a pumurok. Iti adu a purok, ti laeng Kingdom Hall ti nagtalinaed a sitatakder a pasdek.

Dua nga aldaw kalpasan ti bagyo, ti sanga nga opisina dagiti Saksi ni Jehova idiay Yangon ket nangibaon iti grupo a mangsaranay iti kongregasion ti Bothingone, iti wangawangan ti delta. Limmasatda kadagiti lugar a nakaro ti pannakadadaelna, limmiklikda kadagiti managsamsam, ken limmabasda kadagiti agruprupsan a bangkay, agingga a nakadanonda idiay Bothingone nga awitda dagiti abasto a bagas, pansit, danum, ken kandela. Isuda ti immuna a grupo dagiti manangsaranay a nakagteng iti dayta a lugar. Kalpasan a naiwarasda dagiti abasto kadagiti lumugar a Saksi, nangipaayda kadagiti makaparegta a Nainkasuratan a palawag ken nangibatida kadagiti Biblia ken literatura yantangay nayanud amin nga ik-ikutanda kabayatan ti bagyo.

Mapagwadan ti kababalin dagiti Saksi a naapektaran iti bagyo. Maysa kadakuada manipud iti kongregasion iti nalayus a rehion ti Irrawaddy ti nagkuna: “Napukaw ti amin nga ik-ikutanmi. Nadadael ti amin a balaymi. Nalayus ti amin a mulami. Kontaminado ti amin a mainum a danum. Ngem saan unay a nagdanag dagiti kakabsat a kas iti panagdanag ti dadduma. Agtalekkami kenni Jehova ken iti organisasionna. Surotenmi ti aniaman a maibilin kadakami, agtalinaedkami man ditoy a purok wenno agkamangkami iti sabali a lugar.”

Adda grupo ti 30 a Saksi, a naawanan met kadagiti amin a sanikua, a siraragsak a nagkansion kadagiti kanta ti Pagarian bayat ti 10-oras nga ipapanda iti lugar nga ayan ti grupo a mangipaay kadagiti pangsaranay nga abasto. Sakbay a nakagtengda, naammuanda nga adda maang-angay nga asamblea sirkito dagiti Saksi ni Jehova iti kabangibang nga ili. Inkeddengda ti tumabuno nga umuna iti asamblea tapno gumun-odda iti naespirituan a pammaregta ken tagiragsakenda ti Nakristianuan a panaglalangen.

Iti intero a lugar a dinalapus ti bagyo, 35 a balay dagiti Saksi ti nadadael, 125 a pagtaengan ti di unay nadadael, ken 8 a Kingdom Hall ti bassit laeng ti perdina. Imbag laengen ta saan unay a naan-ano dagiti pasdek iti sanga nga opisina.

Idi kalkalpas ti bagyo, arigna a naiputong ti sanga nga opisina gapu kadagiti natuang a dadakkel a kayo a nangbangen kadagiti kalsada iti asideg. Sumagmamano la nga oras kalpasanna, nasurok a 30 a miembro ti sanga nga opisina ti manomano a timmulong a nangikkat kadagiti naibangen a kaykayo. Bayat ti panagtrabahoda, masmasdaaw dagiti tattao a mangbuybuya kadakuada. Di nagbayag, simmangpet ti grupo dagiti Saksi a babbai nga addaan kadagiti makarepresko nga inumen ken kappuros a prutas para kadagiti trabahador ken kadagiti masmasdaaw a kaarrubada. Idi nakita dayta ti maysa a kolumnista, inyimtuodna, “Siasino dagitoy a nakagaggaget a tattao?” Idi naammuanna no siasinoda, kinunana, “Sapay koma ta ad-adu pay a tattao ti kas kadagiti Saksi ni Jehova a sisasagana a tumulong!”

Dagus a nangbuangay dagiti Saksi iti dua a nagsina a komite dagiti manangsaranay tapno masigurado a maitulod dagiti abasto kadagiti kakabsat a nadidigra. Ginasut ti nagboluntario iti grupo dagiti manangsaranay. Iti las-ud ti sumagmamano nga aldaw, naibangon dagiti baro a balay para kadagiti Saksi a naawanan kadagiti pagtaengan. Idi simmangpet ti maysa a grupo dagiti manangsaranay tapno mangbangon iti baro a balay para iti maysa a Saksi, di makapapati dagiti kaarrubana. Kinuna ti maysa a kaarrubana: “Daytoy a Saksi ket imbangonan dagiti karelihionanna iti balay. Ngem awan man la kadagiti gagayyemko a Budista ti immay timmulong kaniak. Nagbalinak la koman a Saksi idi kinasabaannak!”

Idi a dagiti agibangbangon ken ti komite dagiti manangsaranay sinukimatda ti maysa a balay idiay Thanlyn a dandani naan-anay a nadadael, natukay ti riknada idi imbaga kadakuada ti pamilia a Saksi: “Saankay a madanagan ta mabalin pay a pagyanan ti balaymi! Dadduma a Saksi ti naawanan iti balay, isuda lattan ti tulonganyo!”

Iti maysa a lugar idiay Yangon, dadduma ti mapan koma agkamang iti maysa a simbaan sadiay. Ngem nakakandado ti ruangan isu nga awan ti asinoman a nakastrek. Napalalo ti rurod dagiti tattao ket kayatda a dadaelen ti ruangan. Maisupadi iti dayta, adu a tattao ti tinulongan dagiti Saksi ni Jehova nga agkamang kadagiti Kingdom Hall bayat ti bagyo. Kas pagarigan, 20 a madandanagan unay a kaarrubada ti pinastrek ti agassawa a Saksi iti maysa a Kingdom Hall idiay Dala. Kabigatanna, awanen dagiti balay a pagawidan dagitoy a pamilia, ken mabisindan. Adda nasarakan ti asawa a lalaki nga aglaklako iti bagas ket gimmatang iti umdas a pagtaraonda amin.

Adda maysa a pamilia idiay Yangon a saan nga amin a miembrona ket Saksi ni Jehova. Ngem kalpasan ti bagyo, nakigimong ti intero a pamilia iti Kingdom Hall. Apay? Inlawlawag ti maysa a kameng ti pamilia: “Imbaga dagiti karelihionanmi a sarungkarandakami kalpasan ti bagyo ngem dida pulos immay. Dagiti laeng Saksi ti bimmisita. Inikkandakami iti bagas ken mainum a danum. Naidumakayo kadagiti dadduma a relihion!” Dagiti saan a Saksi a kameng dayta a pamilia nagustuanda ti panagadal iti artikulo ti Pagwanawanan nga “Ipangag ni Jehova Dagiti Ararawtayo” ken namin-adu pay a nagkomentoda.

Kalpasan ti bagyo, nakigimong ti maysa a babai a makipagad-adal iti Biblia kadagiti Saksi. Bayat ti gimong, adda naibasa a surat manipud iti sanga nga opisina a nangipakaammo no ania a tulong ti naipaayen ken nangdakamat kadagiti kapadasan dagidiay nakalasat iti bagyo. Nakasangit ti babai bayat a maibasbasa dayta a surat. Natukay unay ti riknana ken maragsakan a nakangngeg nga awan ti nadangran a Saksi ken natalgedda amin. Kalpasanna, naikkan iti sumagmamano nga abasto a kasapulanna ken naibangonan iti tolda iti abay ti balayna. Kinunana a nariknana ti pudno a panangasikaso kenkuana dagiti Saksi.

Kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Ken impaganetget ni adalan a Santiago a ti pudno a pammati ket napakuyogan kadagiti naimbag nga aramid. (Santiago 2:14-17) Impapuso dagiti Saksi ni Jehova dagita a sasao ken ikagkagumaanda nga ipakita ti kasta nga ayat babaen ti panangtulong ken panangsaranay kadagidiay agkasapulan.

[Blurb iti panid 11]

Ibaga ti Biblia a ti pudno a pammati ket napakuyogan kadagiti naimbag nga aramid