Surat Manipud Ireland

Naanep a Panagsapul

NALULEM daydi nga aldaw. Gapu ta agar-arbis, nabasa dagiti sarming ti luganko isu a diak unay makita ti aglawlaw. Kalpasan ti panagmanehok iti 16 a kilometro, nadanonko ti tapaw ti turod a sadiay matannawagan ti Westport, maysa a bassit nga ili iti igid ti baybay iti makinlaud nga Ireland. Ngem gapu ta naginit met laeng, nagpukaw ti angep. Iti baybay, agminaren ti adu a babassit nga isla a kasla naipattopattok a nagpipintas nga esmeralda iti rabaw ti asul a tela. Manmano laeng kadagita ti mapagnanaedan, ngem dagiti umili nga agtartaraken iti animal ibarangayda dagiti dinguenda tapno mapanda ipaarab iti sumagmamano kadagita nga isla.

Katurturodan ti igid ti baybay nga agpalaud. Gapu ta aduan iti mulmula, kasla napasileng a gambang ti buyada no mumalem. Iti pangadaywen, nalawag a makita ti Croagh Patrick, ti bimmalisungsong a bantay nga aw-awagan dagiti umili iti Reek. Intultuloyko ti nagmaneho kadagiti akikid ken aduan iti tao a kalsada ti Westport, linabsak ti Reek, agingga a nakadanonak iti lugar a manmano a papanan dagiti Saksi ni Jehova.

Nagdaliasatak tapno sarungkarak ti maysa a lalaki ngem dina ammo nga ita ti iyaayko. Nakaawatak iti surat a nagkuna nga isu ket nabiit pay nga immakar ditoy ken kayatna nga itultuloy ti makipagadal iti Biblia kadagiti Saksi. Pinampanunotko: ‘Mano ngatan ti tawenna? Adda ngatan asawana wenno awan pay? Ania ngata dagiti paginteresanna?’ Tinaldiapak ti bagko ken linagipko no nakaitugotak met laeng iti Biblia ken nadumaduma a publikasion. Pinampanunotko no ania ti ibagak tapno maparayray ti interesna iti mensahe maipapan iti Pagarian.

Nalabsakon ti Reek. Nagpintas ti buya ti kataltalonan iti igid ti baybay. Nakellekelleng dagita iti nagtutuon a batbato a kaaduanna ket naaramid pay la kabayatan ti Dakkel a Bisin idi maika-19 a siglo. Iti tangatang, nagmayat met ti panagampayag ti maysa nga agila ti taaw. Iti nagtugmokan ti langit ken daga, adda dagiti kayo a hawthorn ken blackthorn a no kitaem iti adayo, kasda la kubbo a lallakay a nagkikinnallabay a nakatallikud iti paggapuan ti angin.

Awan ti numero dagiti balay wenno nagan dagiti kalsada iti daytoy nga away. Ti adres ti lalaki ket nagan laeng ti balay ken sitio. Nupay kasta, panggepko a sapulen nga umuna ti kartero ta sigurado nga ammona ti pagnanaedan ti amin a lumugar. Kalpasan ti 30 a minuto, nasarakak ti pagopisinaan ti kartero iti maysa nga apartment ngem nakaserra dayta. Kaskasdi a napanak nagsaludsod iti tiendaan ket insuro ti aglaklako no kasano a makadanonak iti sitio a papanak.

Kalpasan ti panagmanehok iti walo pay a kilometro, nakitak met laengen ti pagilasinan a sapsapulek​—ti pagkurbaan nga agpakannawan nga adda akikid nga eskinitana nga agpakannigid. Nagtuktokak iti asideg a balay. Maysa a baket ti rimmuar ket imbagana a nupay sadiayen ti pagnanaedanna sipud pay kinaubingna, dina ammo dayta nga adres nga ayan ti lalaki a sapsapulek. Kinunana nga adda teleponuanna a pagsaludsodan isu a pinastreknak.

Agkarataldiap kaniak bayat a makisasao iti telepono. Sigurado a pampanunotenna no asinoak ken no ania ti rantak. Nakitak ti bassit nga estatua ni Birhen Maria iti abay ti ridaw ken ti dakkel a ladawan ni Kristo iti diding. Adda met rosario iti rabaw ti lamisaan iti kosina. Tapno di madanagan, kinunak lattan nga adda napateg nga ipapaibaga dagiti gagayyem ti lalaki a sapsapulek.

Nakitungtong met ti asawa ti baket ken inestoriana ti pakasaritaan ti lugarda. Kabayatanna, awan ti naammuan ti baket iti immuna a tineleponuanna ngem pinaguraynak biit ta adda pay dadduma a teleponuanna. Kasla awan met ti makaam-ammo iti lalaki wenno iti ayan ti balayna. Kinitak ti oras. Mumalemen isu a napanunotko nga agsubliakto laengen iti sabali nga aldaw. Nagyamanak kadakuada nga agassawa, nagsubliak iti kotsek ket rinugiakon ti naunday a biahe nga agawid.

Nagsubliak iti simmaruno a lawas ket nadanonko ti kartero. Nalawag ti insurona a pagturongak. Kalpasan ti 15 a minuto, nasarakakon ti dineskribirna a krosing. Nagpakannigidak sa namin-adu nga inunorko ti sumang-at sumalog a kalsada ta sapsapulek ti sumaruno a pagilasinan​—ti daan a rangtay a bato. Diak nasarakan dayta ngem naiparna a nakitak ti maudi a pagilasinan iti tapaw ti turod. Sadiay a nakitakon ti balay a nagbayag ken nagrigatko a sinapul.

Pinanunotko biit no kasanok nga ibaga ti naimbag a damag. Adda lakay a nanglukat iti ridaw. “Dispensarem ta saan a daytoy ti balay a sapsapulem. Daydiay ne,” kinunana. Intudona ti maysa a balay a medio nalingdan iti kaykayo. Magagaranakon isu a simmalogak ken napanko tinuktok ti ridaw. Bayat nga agur-urayak, tinannawagak ti medio asidegen a Taaw Atlantico. Pimmigsan ti angin, ket nakapurpuraw dagiti dalluyon a sumabsabuag iti kinilkilometro a nagpintas nga aplaya. Awan matatao iti aglawlaw ken uray met iti balay.

Namindua pay a nagsubliak sakbay a nadanonko ti maysa nga agkabannuag a lalaki. “Daytoy ti balay a sapsapulem,” kinunana, “ngem ti dati nga agnanaed, nga isu ti lalaki a sapsapulem, ket immakaren ken diak ammo ti pagnanaedannan.” Inlawlawagko no apay a nakaumayak ket naammuak nga awan pay a pulos ti Saksi ni Jehova a nakasarsaritana. Gapu ta natakawan idin, pampanunotenna no apay nga ipalpalubos ti Dios a mapasamak ti kasta ken ti dadduma pay a kinaawan hustisia. Naragsakan nga immawat iti kabaruan a ruar dagiti magasin a Pagwanawanan ken Agriingkayo! a naglaon kadagiti artikulo maipapan a mismo iti dayta a topiko.

Ibilin ti Biblia nga ikagumaantayo a biroken dagiti nasingpet ti panagpuspusona ken agsapsapul iti kinapudno. Nakalkaldaang ta diak nasarakan ti lalaki a sapsapulek. Nupay kasta, diak sayangen ti panagbannogko. Ditoy Ireland, adu ti magagaran a mangammo iti mensahe ti Pagarian, ket babaen iti pamendision ni Jehova, mabalin nga agbunganto dagiti babassit a bukel ti kinapudno a naimula iti puso dayta nga agkabannuag a lalaki.