Mabalinmo Kadi a Tarusan ti Biblia?
“Dinomingo nga agbasa iti Biblia ti pamiliami. Awan a talaga ti ganasko iti dayta. Patiek a ti Biblia ket Sao ti Dios, ngem nagrigat a tarusan ti kaaduan kadagiti binasak.”—Steven, Britania.
“Idi agtawenak iti 17, pinadasko a basaen ti Biblia. Diak maaw-awatan isu nga insardengko.”—Valvanera, Espania.
“Binasak naminsan ti Biblia gapu ta napanunotko a rumbeng nga aramidek dayta kas maysa a Katoliko. Naipalpasko iti tallo a tawen! Ngem bassit laeng ti naawatak.”—Jo-Anne, Australia.
TI Biblia pay laeng ti kalatakan a libro iti lubong. No idilig iti dadduma pay a libro, kanayon a dayta ti kaaduan a malaklako. Ad-adun a tattao ti makagun-od iti dayta iti ad-adu a lenguahe, ken iti nadumaduma a format kas kadagiti audio tape, CD ken DVD. Ngem adu kadagiti addaan iti Biblia ti marigatan a mangtarus iti dayta. Kastaka met kadi?
Kayat Kadi ti Autor a Matarusantayo ti Saona?
“Amin a Kasuratan impaltiing ti Dios,” kuna ti Biblia. (2 Timoteo 3:16) Wen, ni Jehova a Dios ti Autor ti Biblia. Kayatna kadi a matarusantayo ti Saona? Wenno inrantana dayta a di matarusan ti amin malaksid iti sumagmamano kas kadagiti klero ken eskolar ti Biblia?
Usigem dagiti sumaganad a bersikulo ti Biblia a mismo:
“Daytoy a bilin nga ibilbilinko kenka ita nga aldaw saan a nakarigrigat kenka, saan met nga adayo.”—Deuteronomio 30:11.
“Ti mismo a panangibutaktak dagiti saom mangted iti lawag, mangted iti pannakaawat kadagidiay awanan kapadasan.”—Salmo 119:130.
“Iti dayta met laeng nga oras [ni Jesus] naglaplapusanan ti rag-ona iti nasantuan nga espiritu ket kinunana: ‘Idaydayawka iti publiko, Ama, Apo ti langit ken daga, agsipud ta dagitoy a banag siaannad nga inlimedmo kadagiti mamasirib ken nasasaririt, ket impalgakmo ida kadagiti maladaga.’”—Lucas 10:21.
Kayat ngarud ti Autor ti Biblia a matarusam ti Saona! Nupay kasta, adu latta a napasnek a tattao ti marigatan a mangtarus iti dayta a libro. Ania ti makatulong? Maibinsabinsa kadagiti sumaganad nga artikulo ti tallo a singasing a makatulong kenka a mangtarus iti Biblia.