No Kasanom a Tarusan ti Biblia

3. Agpatulongka

Idi a ti eksplorador a ni Edward John Eyre dinaliasatna ti langalang a Nullarbor Plain, isu ket sinuruan dagiti Katutubo iti dayta a lugar no kasano ti agurnong iti danum manipud kadagiti turod a kadaratan ken iti kaykayo a eucalyptus. Idi agangay, nakalasat ni Eyre gapu iti panagpatulongna kadagidiay pamiliar iti dayta a lugar.

KAS iyilustrar dayta a pagarigan, masansan a kasapulan ti tulong ti maysa nga aduanen iti kapadasan tapno sibaballigi a mairingpas ti narikut a gakat. Kasta met laeng no rugiam a basaen ti Biblia.

Saan a ninamnama ni Jesus a ti Biblia ket maawatan dagiti pasurotna no dida agpatulong iti sabsabali. Naminsan, “linuktanna a naan-anay ti pampanunotda tapno matarusanda ti kaipapanan dagiti Kasuratan.” (Lucas 24:45) Ammo ni Jesus a dagiti agbasa iti Biblia kasapulanda ti tulong tapno matarusanda dagiti Nainkasuratan a sursuro.

Pagpatulongam?

Binilin ni Jesus dagiti pudno a pasurotna nga ipaayda ti kasta a tulong. Kinuna ni Jesus sakbay a nagpalangit: “Inkayo ngarud ket mangaramidkayo iti ad-adalan kadagiti tattao iti amin a nasion, . . . nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Ti kangrunaan a trabaho dagiti Kristiano ket ti panangisuro, a pakairamanan ti panangilawlawag no kasano a mayaplikar dagiti prinsipio ti Biblia iti inaldaw a panagbiag. Dagiti pudno a Kristiano tulonganda ti sabsabali a mangtarus iti Biblia.

Di nagbayag kalpasan nga imbilin ni Jesus dayta kadagiti pasurotna, adda makapainteres unay a napasamak. Saritaen ti Biblia ti maysa nga opisial ti pagarian ti Etiopia nga agbasbasa iti paset ti padto ni Isaias. Adda dagiti nabasana a bersikulo a dina matarusan. Sigun iti Biblia, dagitoy dagiti bersikulo a dina maawatan: “Kas iti karnero isu naipan iti pagpartian, ket kas iti kordero nga awan timekna iti sanguanan ti mamukpukis kenkuana, kasta met a saanna a ngangaen ti ngiwatna. Kabayatan ti pannakaipababana naipanaw kenkuana ti panangukom. Siasinonto ti mangibaga kadagiti detalye ti kaputotanna? Agsipud ta ti biagna naikkat iti daga.”​—Aramid 8:32, 33; Isaias 53:7, 8.

Ti opisial ket nagsaludsod ken Felipe nga aduan kapadasanen a Kristiano a nalaing iti Kasuratan: “Maipapan iti siasino a kunaen daytoy ti mammadto? Maipapan iti bagina wenno iti sabali pay a tao?” (Aramid 8:34) Ti napasnek nga Etiope ket kagapgapuna idiay Jerusalem tapno agdayaw, ken posible nga inkararagna ti panangiwanwan ti Dios. Nabatad nga isu ket sigagagar ken sieemma nga agbasbasa. Ngem kaskasdi a dina maawatan dagita a bersikulo isu a sipapakumbaba a nagpatulong ken Felipe. Napalalo ti ragsakna iti panangilawlawag ni Felipe isu a nagutugot nga agbalin a Kristiano.​—Aramid 8:35-39.

Itultuloy dagiti Saksi ni Jehova ti trabaho nga inaramid ni Felipe ken ti dadduma pay a nagkauna a Kristiano. Iti nasurok a 235 a pagilian, boluntario a tumultulong dagiti Saksi iti sabsabali a mangtarus iti pudno nga isursuro ti Biblia. Ar-aramidenda dayta babaen ti sistematiko a panangadal kadagiti topiko iti Biblia. Daytoy a progresibo a pamay-an ti panagadal iti Biblia ramanenna ti panangusig iti isursuro ti Biblia maipapan iti partikular a topiko wenno suheto.a​—Kitaem ti kahon a “Dagiti Makapnek a Sungbat Kadagiti Saludsod Maipapan iti Biblia.”

“Nasungbatan Amin a Saludsodko”

Da Steven, Valvanera, ken Jo-Anne a nadakamat iti umuna nga artikulo inadalda ti Biblia a kadua dagiti Saksi ni Jehova. Kinuna ni Steven: “Nasdaawak ta babaen laeng iti panangidilig iti sumagmamano a Nainkasuratan a prinsipio wenno salaysay, masansan a ti sungbat ket adda a kanayon iti Biblia. Sakbay ti panagadalko iti Biblia, awan pay ti nakaisuro kaniak no kasano nga aramiden dayta. Urayak la a nabang-aran a nakaammo a ti Biblia ket saan gayam a nasken a pagdedebatean ken saan a naglaon iti agkokontra a kapanunotan maipapan iti Dios.”

Kasta met laeng ti nakuna ni Valvanera: “Agtutunos ken nainkalintegan amin a naadalko. Nasursurok a patien ti bambanag saan a gapu ta imbaga dagita ti relihionko no di ket gapu ta ti amin ket adda nainkalintegan a pannakailawlawagda.” Kinuna met ni Jo-Anne: “Gapu ta nasungbatan amin a saludsodko babaen iti Biblia, natignayak a mangidayaw​—ken mangraem unay iti Autorna​—yantangay nasaksakbay nga impaisuratna ti umiso a sungbat iti aniaman nga iyimtuod ti tao.”

Adda kadi am-ammom a Saksi ni Jehova? Apay a dimo kiddawen nga idemostrana kenka no kasano ti sistematiko a panagadal iti Biblia? No awan pay ti am-ammom a maysa kadagiti Saksi ni Jehova, pangngaasim ta agsuratka iti maysa kadagiti adres a nailista iti panid 4 daytoy a magasin. Babaen ti nasantuan nga espiritu ti Dios, silulukat a panunot, ken tulong ti kualipikado a mangisuro iti Biblia, mabalinmo a tarusan ti Sao ti Dios!

[Footnote]

[Kahon/Ladawan iti panid 8]

Dagiti Makapnek a Sungbat Kadagiti Saludsod Maipapan iti Biblia

Dagitoy ti sumagmamano kadagiti topiko a mausig bayat ti panagadal iti Biblia a kadua dagiti Saksi ni Jehova:

• Ania ti panggep ti Dios para iti daga?

• Sadino ti ayan dagiti natay?

• Agbibiagtayo kadin kadagiti “maudi nga al-aldaw”?

• Apay a ti Dios ipalpalubosna ti panagsagaba?

• Kasano nga agbalin a naragsak ti biag ti pamiliak?

[Dagiti Ladawan iti panid 7]

Tapno maawatam ti Biblia . . . ikararagmo iti Dios nga ipaayannaka iti espirituna, agbasaka a silulukat ti panunotmo, ken agpatulongka