‘Linagipko ti Naindaklan a Namarsua Kaniak’ Nobenta a Tawenen ti Napalabas
Kas insalaysay ni Edwin Ridgwell
IDI Nobiembre 11, 1918 nga Aldaw Dagiti Beterano, di ninamnama a naummong dagiti estudiante iti eskuelaanmi tapno selebraranda ti panagpatingga ti Dakkel a Gubat, a naawagan idi agangay iti Gubat Sangalubongan I. Lima laeng idi ti tawenko ken diak pay naan-anay a maawatan no ania dayta nga okasion. Ngem gapu kadagiti insuro kaniak dagiti dadakkelko maipapan iti Dios, ammok a saan a rumbeng a makipasetak iti dayta a selebrasion. Nagkararagak iti Dios ngem diak napengdan ti riknak isu a nagsangitak. Kaskasdi a diak nakipagselebrar. Dayta ti nangrugian ti ‘pananglagipko iti Naindaklan a Namarsua kaniak.’—Ecl. 12:1.
Sumagmamano a bulan sakbay dayta a pasamak idiay eskuelaan, immakar ti pamiliami iti asideg ti Glasgow, Scotland tapno sadiayen ti pagnaedanmi. Iti dayta a tiempo, natabunuan ni Tatang ti palawag publiko a napauluan iti “Minilion a Sibibiag Ita ti Saanton a Pulos a Matay.” Dayta ti nangbalbaliw iti biagna. Rinugian da Tatang ken Nanang ti nagadal iti Biblia ken masansan a pagsarsaritaanda ti Pagarian ti Dios ken dagiti bendision iti masanguanan. Agyamanak iti Dios ta sipud idin, sinuruandak dagiti dadakkelko nga agayat ken agtalek Kenkuana.—Prov. 22:6.
Panangrugik iti Amin-Tiempo a Ministerio
Idi agtawenak iti 15, kualipikadoakon nga agkolehio ngem talaga a kayatko ti agserbi kas amin-tiempo a ministro. Kuna ni Tatang nga ubingak pay unay isu a nagopisinaak iti sumagmamano a tiempo. Nupay kasta, tarigagayak unay ti agserbi ken Jehova iti amin a tiempo isu a maysa nga aldaw, nagsuratak ken J. F. Rutherford, a mangidadaulo iti sangalubongan a trabaho a panangasaba iti dayta a tiempo. Dinamagko no ania ti makunana iti planok. Kastoy ti subalit ni Kabsat Rutherford: “No kabaelamon ti mangged, kabaelam metten ti agserbi iti Apo. . . . Patiek a bendisionannaka ti Apo no ikagumaam ti agserbi a simamatalek Kenkuana.” Dayta a surat a napetsaan iti Marso 10, 1928 tinignayna ti pamiliami. Di nagbayag, dagiti nagannakko ken uray dakami ken manangko ket agserserbin kas amin-tiempo a ministro.
Iti kombension idiay London idi 1931, inawis ni Kabsat Rutherford dagiti mayat nga agboluntario a mangikasaba iti naimbag a damag iti sabali a pagpagilian. Nagboluntarioak ket kaduak ni Andrew Jack a naidestino idiay Kaunas, a kabesera idi ti Lithuania. Agtawenak idi iti 18.
Panangikasaba iti Mensahe ti Pagarian iti Ballasiw-Taaw
Iti dayta a tiempo, nakurapay a mannalon dagiti umili ti Lithuania, ken saan a kaskarina ti mangasaba kadagiti away. Narigat ti agsapul iti pagdagusan, ken dinto pulos mapunas iti lagipmi ti dadduma a nagyananmi. Iti maysa a rabii kas pagarigan, nariingkami ken Andrew ta saankami a makaidna. Idi sinindianmi ti gasera, nagbalayan gayam ti nagadu a kiteb ti pagid-iddaanmi. Napno ti bagimi iti nagkagatanda! Iti makalawas, binigat a mapanak aguper iti asideg a nalamiis a karayan tapno maep-ep ti ut-otna. Kaskasdi a determinadokami nga agtultuloy iti ministerio. Di nagbayag, narisut met laeng ti parikutmi iti pagdagusan idi naam-ammomi ti agkabannuag nga agassawa nga immawat iti kinapudno ti Biblia. Pinadagusdakami iti bassit ngem nadalus a balayda. Naragsakan ken nabang-arankami a naturog iti datarda!
Napigsa idi ti impluensia dagiti klero ti Iglesia Romana Katolika ken Russian Orthodox iti Lithuania. Dagiti laeng babaknang ti makagatang iti Biblia. Ti kangrunaan a kalatmi ket wanasen ti adu a teritoria ken agipaima iti adu a naibasar-Biblia a literatura kadagiti interesado. Umuna, agbirokkami iti pagdagusanmi iti ili. Kalpasanna, siaannad a wanasenmi dagiti bario iti aglawlaw saminto darasen a wanasen ti mismo nga ili. Iti kasta, masansan a malpasminton ti panangasabami sakbay a riribukendakami dagiti papadi.
Pakaigapuan ti Panagusioso ken Panagdinamag ti Trabahomi
Idi 1934, naawis ni Andrew nga agtrabaho iti sanga nga opisina iti Kaunas, ket ni John Sempey ti nagbalin a kaduak. Adu ti nakallalagip a kapadasanmi. Naminsan, napanak iti opisina ti maysa nga abogado iti bassit nga ili. Nakapungtot ti lalaki ket inruarna ti paltogna iti uuyosan sana kinuna a pumanawak. Nagkararagak a siuulimek ken nalagipko ti balakad ti Biblia: “Ti maysa a sungbat, no naalumamay, pagbaw-ingenna ti pungtot.” (Prov. 15:1) Isu a kinunak, “Immayak a kas gayyem ken adda koma ibagak a naimbag a damag. Pagyamanan ta nagteppelkayo.” In-inut nga inikkatna ti ramayna iti gatilio ket nagin-inayadak metten nga immatras a rimmuar iti opisinana.
Idi nagkitakami ken John, kinunana nga uray isu ket naaddaan met iti makapadanag a kapadasan. Naipan iti polisia gapu ta napabasol a tinakawanna iti dakkel a kantidad ti kuarta ti maysa a babai a nakasaritana. Kinapkapan ken pinaglabusda ni John idiay polisia ngem saanda a nasarakan kenkuana ti kuarta. Idi agangay, natiliwda met laeng ti agpayso a nagtakaw.
Dagita a pasamak ti namagusioso kadagiti umili iti dayta a natalna nga ili isu a naglaka a nagdinamag ti trabahomi!
Dagiti Nalimed a Trabahomi
Narisgo ti panangipan kadagiti naibasar-Biblia a literatura iti kabangibang a Latvia ta maiparit ti panangasaba sadiay. Agarup maminsan kada bulan nga agtrenkami iti rabii a mapan sadiay. No dadduma, kalpasan a maitulodmi dagiti literatura, agderetsokami idiay Estonia tapno mangala iti ad-adu pay a literatura nga itulodmi idiay Latvia inton agawidkamin.
Naminsan, napakaammuan ti maysa nga opisial ti aduana maipapan iti trabahomi ket imbilinna a dumsaagkami iti tren ken ipanmi dagiti literatura iti boss-na. Inkararagmi ken John a tulongannakami ni Jehova. Nakaskasdaaw ta saan nga imbaga ti opisial iti boss-na no ania dagiti awitmi. “Adda ideklara dagitoy a lallaki,” kinunana lattan. “Indeklarak” ti dineskribirko kas literatura a makatulong kadagiti mannursuro ken estudiante tapno maawatanda ti kaipapanan dagiti mapaspasamak iti nariribuk unay a lubongtayo. Ti opisial ti aduana pinalubosannakami a pumanawen isu a sitatalged a naitulodmi dagiti literatura.
Bayat a kumarkaro ti kasasaad ti politika iti Baltic States, kimmaro ti ibubusor kadagiti Saksi a nagresulta iti pannakaiparit met ti trabaho a panangasaba iti Lithuania. Naideporta da Andrew ken John, ket gapu ta mapaspasungadan ti Gubat Sangalubongan II, naibilin kadagiti amin a Briton a pumanawda iti pagilian. Pimmanawak met a malmalday.
Dagiti Pribilehio ken Bendision iti Makin-amianan nga Ireland
Iti dayta a tiempo, immakaren dagiti dadakkelko iti Makin-amianan nga Ireland, ket nakipagnaedak kadakuada sadiay idi 1937. Naiparit met dagiti literaturatayo iti dayta a lugar gapu iti karirikna dagiti tattao maipapan iti gubat, ngem intultuloymi ti nangasaba uray manarimaan ti gubat. Kalpasan ti Gubat Sangalubongan II, saanen a maipagel ti trabahomi. Ni Harold King nga aduan kapadasan a payunir nga idi agangay ket nagmisionero idiay China ti nangidaulo ken nangyurnos kadagiti palawag publiko a naangay kadagiti plasa wenno nawayang a disso. “Iti daytoy a Sabado, siak ti umuna nga agpalawag,” kinunana, sa kimmita kaniak, “Sikanto met inton sumaganad a Sabado.” Naklaatak.
Diak malipatan ti damo a panagpalawagko. Ginasut ti dimmar-ay. Nagpalawagak bayat a nakatakderak iti rabaw ti maysa a kahon ken awan man la ti inusarko a mikropono. Idi nalpas ti palawag, inasitgannak ti maysa a lalaki ket inalamanonak sana inyam-ammo ti bagina kas ni Bill Smith. Kinunana a nakitana ti nagaaribungbong a tattao isu nga immasideg tapno ammuenna no ania ti mapaspasamak. Ni gayam Bill ket nakasarita idin ni tatangko ngem didan nagkita idi napan nagpayunir idiay Dublin da Tatang ken ti agsiuman kaniak. Nangrugikami nga agadal iti Biblia. Idi agangay, ni Bill ken walo pay a kapamiliana ket nagbalin a Saksi ni Jehova.
Nangasabaak met kadagiti dadakkel a balbalay iti ruar ti Belfast, ket sadiay a naam-ammok ti maysa a babai a taga-Russia a nagnaed idi idiay Lithuania. Idi impakitak kenkuana ti sumagmamano a literatura, intudona ti maysa a libro ket kinunana: “Adda kastak. Inted ti ulitegko a propesor iti unibersidad idiay Kaunas.” Impakitana ti libro a Creation, iti lenguahe a Polako. Namurumoran iti surat ti ig-igid dagiti panid. Anian a siddaawna idi naammuanna a siak ti nangted iti dayta a libro kenni ulitegna idi nagam-ammokami idiay Kaunas!—Ecl. 11:1.
Idi nadamag ni John Sempey a mapanak idiay Makin-amianan nga Ireland, kiniddawna a sarungkarak ti adingna a ni Nellie ta interesado iti kinapudno. Duakami ken manangko a Connie a nangyadal iti Biblia kenkuana. Napartak ti panagrang-ay ni Nellie ken indedikarna ti biagna ken Jehova. Idi agangay, inaremko ket nagkallaysakami.
Agkatakunaynaykami ken Nellie a nagserbi ken Jehova iti unos ti 56 a tawen ket pribilehiomi ti timmulong iti nasurok a 100 a tattao a nangammo iti kinapudno iti Biblia. Ninamnamami a malasatanmi a dua ti Armagedon agingga iti baro a lubong ni Jehova, ngem ti naulpit a kabusor a ni patay inuyosna ti biag ni Nellie idi 1998. Naldaangak unay gapu iti dayta—maysa dayta kadagiti kakaruan a suot iti biagko.
Panagsubli iti Baltic States
Agarup makatawen kalpasan ti ipapatay ni Nellie, nakaawatak iti nagsayaat a bendision. Naawisak a mapan agpasiar iti sanga nga opisina idiay Tallinn, Estonia. Kuna ti surat manipud kadagiti kakabsat idiay Estonia: “Kadagiti 10 a kakabsat a naidestino iti Baltic States idi arinunos ti dekada 1920 ken iti nasapa a paset ti dekada 1930, dakayo laengen ti sibibiag.” Kinuna pay ti surat a ti sanga nga opisina ket agisagsagana iti pakasaritaan ti trabaho iti Estonia, Latvia, ken Lithuania, sa dinamagda: “Makaumaykayo kadi ditoy?”
Nagsayaat ketdin a lagipen dagiti kapadasanmi kadagidi a tawen! Idiay Latvia, naipakitak kadagiti kakabsat ti immuna nga apartment a nausar kas sanga nga opisina ken ti bobida a nangilemmenganmi kadagiti literatura a di pulos natakuatan dagiti polis. Idiay Lithuania, naipanak iti bassit nga ili ti Šiauliai a nagpayunirak. Iti maysa a taripnong sadiay, kinuna kaniak ti maysa a kabsat: “Adu a tawenen ti napalabas, gimmatangkami ken nanangko iti balay ditoy ili. Idi madama a daldalusanmi ti siled nga asideg iti pangatepan, nakitak dagiti libro a The Divine Plan of the Ages ken The Harp of God. Idi binasak dagidiay, naamirisko a nasarakakon ti kinapudno. Dakayo la ketdi ti nakaibati kadagidiay a libro iti dayta a balay!”
Tinabunuak met ti asamblea sirkito iti maysa nga ili a nagpayunirak idi. Napadasakon ti nakiasamblea sadiay 65 a tawenen ti napalabas a tinabunuan laeng idi ti 35. Ngem anian a makaparagsak a makita ita ti tallaong a buklen ti nasurok a 1,500! Talaga a binendisionan ni Jehova ti trabaho!
‘Saannak a Binaybay-an ni Jehova’
Itay laeng nabiit, nakaawatak iti diak pulos ninamnama a bendision idi immanamong a makikallaysa kaniak ti maysa a napintas a kabsat nga agnagan Bee. Nagkasarkami idi Nobiembre 2006.
Maipanamnamak kadagiti agtutubo a dida pay ammo no kasanoda nga usaren ti biagda a nainsiriban ti panangipangag kadagitoy a naipaltiing a sasao: ‘Lagipem ti Naindaklan a Namarsua kenka kadagiti aldaw ti kinaagtutubom.’ Mariknakon ti rag-o a kas iti narikna ti salmista iti Biblia a nagkuna: “O Dios, insuronak nanipud pay kinaagtutubok, ket agingga ita isarsaritak ti maipapan iti nakaskasdaaw nga ar-aramidmo. Ket uray pay agingga iti kinalakay ken kinaubanan, O Dios, saannak a baybay-an, agingga a ti maipapan iti takiagmo maisaritak iti kaputotan, kadagidiay amin nga umay, ti maipapan iti kinamannakabalinmo.”—Sal. 71:17, 18.
[Mapa iti panid 25]
(Para iti aktual a pannakaurnosna, kitaem ti publikasion)
Maysa a narisgo nga annongen ti mangipan kadagiti naibasar-Biblia a literatura idiay Latvia
ESTONIA
TALLINN
Gulpo ti Riga
LATVIA
RIGA
LITHUANIA
VILNIUS
Kaunas
[Ladawan iti panid 26]
Nangrugiak nga agserbi a colporteur (payunir) idiay Scotland idi agtawenak iti 15
[Ladawan iti panid 26]
Ti panagkasarmi ken Nellie idi 1942