Posible Kadi ti Makiuman Kadagiti Espiritu?

ADDA dagiti rebbengen nga intalek ti Dios a Mannakabalin-amin iti dadduma nga espiritu a parsua. Kas pagarigan, intalekna ken Jesu-Kristo ti panangituray iti daga, ken nangdutok kadagiti matalek nga anghel a tumulong a mangiwanwan iti pannakaikasaba ti naimbag a damag. (Apocalipsis 14:6) Nupay kasta, saanna nga intalek iti sabsabali ti panangdengngeg kadagiti kararag. Rumbeng a maiturong laeng iti Dios dagiti kararagtayo.

Ni Jehova ti “Managdengngeg iti kararag.” (Salmo 65:2) Denggen ken sungbatanna dagiti kararagtayo. Maipapan iti kararag, insurat ni apostol Juan kadagiti padana nga adipen ni Jehova: “Uray ania ti dawatentayo maitunos iti pagayatan [ti Dios], denggennatayo. Kanayonanna, no ammotayo a denggennatayo maipapan iti aniaman a dawdawatentayo, ammotayo a maaddaantayo iti bambanag a dinawattayo yantangay dinawattayo ida kenkuana.”​—1 Juan 5:14, 15.

Saan a kayat dagiti matalek nga anghel nga awagan wenno pagkararagantayo ida. Ammoda ken makitunosda iti urnos ti Dios mainaig iti kararag, ken no dadduma adda direkta a pasetda iti dayta. Kasano? Idi a ni mammadto Daniel nagkararag ken Jehova maipapan iti langalang a kasasaad ti Jerusalem, sinungbatan ti Dios ti kararag ni Daniel idi imbaonna ni anghel Gabriel a mangparegta iti mammadto.​—Daniel 9:3, 20-22.

Mensahe Dagiti Natay?

Rumbeng kadi a makiumantayo kadagiti natay? Adu ti mangibaga a nakasaritada kano dagiti espiritu dagiti natay. Kas pagarigan, maysa a mannakiuman iti espiritu wenno medium ti nakisarita iti maysa a balo idiay Ireland ket kinunana a nakasaritana ni Fred nga asawa ti balo. Ngem sumagmamanon a lawas a natay ni Fred. Insalaysay ti medium dagiti impormasion nga imbaga ni “Fred,” bambanag a patien ti balo nga isu laeng ti makaammo. Nakombinsir la ketdi ti balo a sibibiag ni Fred kas maysa nga espiritu ket padpadasenna ti makikomunikar babaen iti dayta a medium. Nupay kasta, maisupadi dayta iti nalawag nga ibagbaga ti Biblia maipapan iti kasasaad dagiti natay.​—Kitaem ti kahon iti baba.

Kasano ngarud a mailawlawag ti kakasta nga estoria? Ti maysa a pangallilaw dagiti demonio ket ti panangtuladda kadagiti natay. Kasta ti inaramidda iti nadakamat a kaso ni Fred. Ania ti panggepda? Tapno maisiasi dagiti tattao iti sursuro ti Biblia ken kumapuy ti pammati ken panagtalekda ken Jehova. Wen, ni Satanas ken dagiti demoniona iyaw-awanda dagiti tattao “buyogen ti tunggal mannakabalin nga aramid ken dagiti ulbod a pagilasinan ken dagiti tanda ken buyogen ti tunggal nakillo a panangallilaw kadagidiay madaddadael.”​—2 Tesalonica 2:9, 10.

Agpayso nga adda dagiti medium ken dagiti kakaduada a talaga a mamati a makaum-umanda dagiti natay. Iti kinapudnona, siasinoman nga espiritu ti pakiumananda, makium-umanda kadagiti espiritu a bumusbusor ken Jehova. Umasping iti dayta, adda dagidiay mamati nga agdaydayawda iti Dios, ngem nagbiddutda. Napaltiingan ni apostol Pablo a mangisurat iti daytoy nabileg a pakdaar: “Ti bambanag nga isakripisio dagiti nasion isakripisioda kadagiti sairo, ket saan nga iti Dios.”​—1 Corinto 10:20, 21.

Apay nga agkararagtayo pay laeng iti siasinoman no makapagkararagtayo met iti Kangatuan, a mangay-ayat ken maseknan kadatayo? Nabatad nga impasigurado ti Biblia: “No maipapan ken Jehova, mapan nga agsublisubli dagiti matana iti intero a daga tapno ipakitana ti pigsana maigapu kadagidiay a ti pusoda naan-anay kenkuana.”​—2 Cronicas 16:9.

[Blurb iti panid 9]

Apay nga agkararagtayo pay laeng iti siasinoman no makapagkararagtayo met iti Kangatuan, a mangay-ayat ken maseknan kadatayo?

[Kahon/Ladawan iti panid 8, 9]

Pudno ken Di Pudno

PUDNO: NI SATANAS KET PUDNO A PERSONA

“Ni Satanas a mismo pagbalbalinenna ti bagina a kasla anghel ti lawag.”​—2 Corinto 11:14.

“Agtalinaedkayo a sipupuot, managbantaykayo koma. Ti kabusoryo, ti Diablo, agsursursor a kasla leon a ngumerngernger, nga agsapsapul iti alun-onenna.”​—1 Pedro 5:8.

“Ti agar-aramid iti basol nagtaud iti Diablo, agsipud ta ti Diablo agbasbasolen nanipud pay idi damo.”​—1 Juan 3:8.

“Ngarud, agpasakupkayo iti Dios; ngem busorenyo ti Diablo, ket isu agtalawto kadakayo.”​—Santiago 4:7.

Ti “Diablo . . . ket mammapatay idi a nangrugi, ket saan a nagtakder a di maisin iti kinapudno, agsipud ta awan kenkuana ti kinapudno. No sawenna ti ulbod, agsao a maitunos iti bukodna a pagannayasan, agsipud ta isu maysa a managulbod ken ti ama ti kinaulbod.”​—Juan 8:44.

DI PUDNO: AMIN A MATAY KET AGBALIN NGA ESPIRITU

“Iti ling-et ta rupam mangankanto iti tinapay agingga nga agsublika iti daga, ta dayta ti nakaalaam. Ta tapokka ket iti tapok agsublikanto.”​—Genesis 3:19.

“Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.”​—Eclesiastes 9:5.

“Isuamin a masarakan ta imam nga aramiden, aramidem buyogen ti mismo a bilegmo, ta awan ti aramid wenno uray gakat wenno uray pannakaammo wenno uray sirib idiay Sheol [ti tanem], ti disso a papanam.”​—Eclesiastes 9:10.

“Ti espirituna pumanaw, isu agsubli iti dagana; Iti dayta nga aldaw mapukaw dagiti panunotna.”​—Salmo 146:4.

PUDNO: MASEKNAN KADATAYO DAGITI MATALEK NGA ANGHEL

“Ti anghel ni Jehova agpakpakarso iti intero nga aglikmut dagidiay agbuteng kenkuana, ket alawenna ida.”​—Salmo 34:7; 91:11.

“Saan aya nga espirituda [dagiti anghel] amin a maipaay iti publiko a panagserbi, a naibaon tapno agserbida kadagidiay agtawid iti pannakaisalakan?”​—Hebreo 1:14.

“Nakakitaak iti sabali pay nga anghel nga agtaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnanaed iti daga, ken iti tunggal nasion ken tribu ken pagsasao ken ili, a kunkunana iti natbag a timek: ‘Agbutengkayo iti Dios ket idayawyo.’”​—Apocalipsis 14:6, 7.

DI PUDNO: NI JESUS KET KAPADA TI DIOS

“Kayatko a maammuanyo a ti ulo ti tunggal lalaki isu ti Kristo; ket ti ulo ti babai isu ti lalaki; ket ti ulo ti Kristo isu ti Dios.”​—1 Corinto 11:3.

“Inton ti amin a bambanag naipasakupen kenkuana, iti kasta ti Anak a mismo ipasakupnanto met ti bagina iti Daydiay a nangipasakup iti amin a bambanag kenkuana, tapno ti Dios agbalinto nga amin a bambanag iti tunggal maysa.”​—1 Corinto 15:28.

“Pudno unay kunak kadakayo, Ti Anak saanna a kabalinan nga aramiden ti maysa a banag iti bukodna a nakem, no di laeng ti makitana nga ar-aramiden ti Ama.”​—Juan 5:19.