Mamagpanunot a Saludsod

ADU ken agduduma ti kapanunotan ti tattao maipapan iti biag ken ipapatay. Kuna ti dadduma a no matay ti tao, mabalin nga agtultuloy nga agbiag kas sabali a parsua wenno iti sabali a lugar. Adda met mangibaga a mayanakda manen nga addaan iti sabali a katatao. Ngem adda latta dagiti mamati nga agpatinggan ti amin no matay ti maysa.

Baka adda met bukodmo a kapanunotan, depende iti pannakapadakkelmo wenno kultura a nabangonam. Gapu ta agduduma ti opinion maipapan iti mapasamak no matay ti tao, adda ngata pangalaantayo kadagiti mapagtalkan ken agpaypayso a sungbat daytoy mamagpanunot a saludsod?

Ginasut a tawenen nga isursuro dagiti lider ti relihion nga immortal wenno saan a matay ti kararua ti tao. Mamati dagiti miembro ti dandani amin a dadakkel a relihion—dagiti Kristiano, Hindu, Judio, Muslim, ken dadduma pay—nga adda immortal a kararua nga agtultuloy nga agbiag no matayen ti bagi ti tao sa mapan iti lubong dagiti espiritu. Mamati met dagiti Budista a babaen iti di mabilang a reinkarnasion, saanton nga agrigrigat ti maysa. Dayta a kararagsakan a kasasaad ket maaw-awagan iti Nirvana.

Gapu kadagita a sursuro, kaaduan a tao iti intero a lubong ti mamati a no matay ti maysa, maluktan ti ruangan ti biag iti sabali a lubong. Isu a para iti adu, ti ipapatay ket napateg a paset ti siklo ti biag ken agparang a karaman iti pagayatan ti Dios. Ngem ania ti kuna ti Biblia? Pangngaasim ta basaem ti sumaruno nga artikulo. Baka masorpresaka iti sungbat.