No Liniputannaka ti Asawam

“Kayatkon ti matay idi imbaga ni lakayko a panawannak gapu iti ub-ubing a keridana. Nagdakes metten ti inaramidna aglalo ta nagadu ti insakripisiok para kenkuana.”—Maria, Spain.

“Idi bigla a pinanawannak ni baketko, awan ganaskon nga agbiag. Nadadaelen dagiti arapaap, namnama, ken planomi. Adda dagiti aldaw a kunak no naakseptarkon, ngem intono kuan, kaslaak manen malmes iti liday.”—Bill, Spain.

KASLA nagtupak ti langit kenka no liniputannaka ti asawam. Agpayso a mapakawan ti dadduma ti agbabbabawi nga asawada ken makisinnubliananda.a Ngem agtalinaedda man nga agassawa wenno saan, nasaem latta ti rikna dagiti inosente nga asawa gapu iti panangliput ti asawada. Kasanoda a mailiwliwag ti nasair a riknada?

DAGITI MAKATULONG A BERSIKULO TI BIBLIA

Adu nga inosente nga assawa ti naliwliwa iti Biblia uray no nakaro ti ladingitda. Naammuanda a makitkita ti Dios ti luluada ken marikriknana met ti saem a marikriknada.—Malakias 2:13-16.

“Idi immadu dagiti pakadanagak, liniwliwa ken pinaragsaknak.”—Salmo 94:19.

“Idi basbasaek dayta a bersikulo, nariknak a ni Jehova ket kas iti naasi nga ama a mangep-ep-ep iti saem a marikriknak,” malagip ni Bill.

“Napudnoka kadagiti napudno kenka.”—Salmo 18:25.

“Saan a nagbalin a napudno ni lakayko,” kuna ni Carmen nga adu a bulan a liniputan ni lakayna. “Ngem makapagtalekak a napudno kaniak ni Jehova. Dinak pulos paayen.”

‘Dikay madanagan iti aniaman, no di ket ipakaammoyo koma iti Dios ti amin a kiddawyo babaen ti kararag ken panagpakaasi, ket ti talna ti Dios a mangartap iti amin a pannakaawat salaknibannanto ti pusoyo.’—Filipos 4:6, 7.

“Inulit-ulitko a binasa dagitoy a bersikulo,” kuna ni Sasha. “Nagkarkararagak a nagkarkararag ket pinagbalin ti Dios a natalna ti panagbiagko.”

Narikna ti amin a nadakamat iti ngato a no dadduma, kayatdan ti sumuko. Ngem nagtalekda ken Jehova a Dios ket napabilegda iti Saona. Kastoy ti kuna ni Bill: “Kasla nadadael idin ti biagko, ngem gapu iti pammatik, adda manen direksion ti biagko. Nupay adda idi tiempo a ‘nakasipsipnget’ ti pagpagnaak, ti Dios ti nangkadua kaniak.”—Salmo 23:4.

a Para iti pannakailawlawag no mangpakawan wenno saan, kitaen ti agsasaruno nga artikulo iti Agriingkayo! nga Abril 22, 1999, “No Di Matalek ti Asawam.”

Ania ti Makatulong Kenka?

Basaem ken panunotem dagiti makaliwliwa a bersikulo ti Biblia.

Kuna ni Bill, “Binasak ti libro a Job, kalpasanna ti Salmo, sa inugedak ti tunggal sasao a maibagay iti situasionko. Ti nariknak a saem ken pannakaburibor ket napadasan met gayam dagiti tattao a nabasak kadagitoy a libro.”

Dumngegka iti makapabang-ar a musika.

“No saanak idi a makaturog iti rabii, dumngegak iti musika,” malagip ni Carmen. “Makaliwliwa unay dayta.” Kuna ni Daniel: “Sinursurok ti aggitara ket ti makaay-ayo nga unina ti nangpakalma iti riknak.”

Ibagam ti marikriknam.

“Diak nairuam a mangibaga iti rikriknak,” kuna ni Daniel. “Ngem adda nasasayaat a gagayyemko, ket inaldaw a kasarsaritak ida. Iti surat ken iti personal, inyebkasko kadakuada ti nadagsen a marikriknak. Talaga a nakatulong dayta.” Kuna ni Sasha: “Nakapatpateg ti tulong ti pamiliak. Kanayon nga adda ni nanangko para kaniak. No kayatko ti makisarita, nakasagana a dumngeg. Imparikna met ni tatangko nga adda dagiti pudno a mangay-ayat kaniak, ken siaanus a tinulongannak a makarekober.”

Itultuloymo ti agkararag.

“Nagkarkararagak a kanayon,” imbaga ni Carmen. “Nariknak nga asideg ti Dios kaniak, dumdumngeg, ken tultulongannak. Bayat daytoy nalidem a tiempo ti biagko, simmingedak iti Dios.”