Panangiparang ti Naimbag a Damag—Iti Tunggal Maysa
1 Bayat a nangasaba ni Jesus impakitana ti nabara nga interesna a mangdanon iti adu a tattao agingga ti mabalin. (Mar. 6:34; Juan 4:7, 40, 41) Masapultayo met nga ikagumaan a danonen dagiti adu a tattao agingga ti mabalintayo. Agngangabit dagiti biag—biagda ken biagtayo. (1 Tim. 4:16) Kayattayo a tulongan dagiti sabsabali a mangammo ken Jehova tapno umawagda met iti naganna ket masalbarda.—Ara. 2:21.
2 Ti gagangay a problema a maipasango kadagiti adu kadatayo isu daydiay panangsarak kadagidiay saan a madandanon iti taengda iti umuna a sarungkar. Pinadasyo kadin ti simmarungkar iti mumalem iti isu met laeng nga aldaw? Adu dagiti nagballigi a nangaramid iti dayta. Wenno padasenyo ti sumarungkar iti sabali nga aldaw. Dagidiay narigat a madanon iti balayda ti mabalin a madanon babaen iti surat. No agtrabahotayo iti teritoria ti siodad, isarakyo a kasarita dagidiay masabetyo iti pagserkan ken pagruaran dagiti apartment wenno iti igid ti dalan. No apagbiit laeng iti pannakisaoyo, masarakanyo a makagunggona no mangidatagkayo iti maysa kadagiti uppat a tracts: Why You Can Trust the Bible, What Do Jehovah’s Witnesses Believe?, Life in a Peaceful New World, ken What Hope for Dead Loved Ones?
3 Ti pannakiraman nga agtrabaho kadagiti lansangan ti tumulong kadakayo a mangsabet kadagiti gagangay a saantayo a madanon iti pagtaenganda. No umasidegkayo kadagiti tattao, makaallukoy iti kinamannakigayyem ken diretsa a panangirugi iti saritaan. Ti panangiparupa iti ababa, natadem a saludsod ti tumulong kadakayo a mangtignay iti interes. Kalakaan nga asitgan dagidiay saan unay nga agap-apura. Nagballigi dagiti dadduma babaen ti pannagnagda a kagiddan daydiay tao bayat a maiparang iti apagdarikmat dagiti magasina. No reprep ti tao kadagiti lansangan, masarakan a praktikal no kasao dagidiay adda iti igid dagidiay agdadarison. Ti store-to-store a trabaho ket tumulong met kadakayo a mangdanon kadagiti negosiante ken empleado a masansan a saan a madanon iti balbalayda. Iranayo ti sumarungkar kadagiti tiempo nga awan unay ti adu nga aggatang iti pagtagilakuan.
4 No addakayo iti lansangan ken pagtagilakuan a trabaho, saanyo a pagarupen a magasina laeng iti mabalinyo nga ipresenta. Mabalin met nga itukon dagiti libro ken broshur. Maysa a naballigi nga agibumbunannag ti nangirugi iti saritaan babaen ti panagsaludsodna iti, “Nakitayo kadin daytoy kaudian a libromi?” Nalaka laeng ti panagkuna ti sabali, “Adda laeng kayatko nga ipakita kadakayo.”
5 Kasano a makultibar dagiti interes a masarakan kadagiti lansangan ken pagtagilakuan? Adu dagiti nagballigi iti daytoy babaen ti panangsaludsod iti direksionda tapno makasaoda ida iti nawaya a tiempo. No masarakanyo a saanda nga agnanaed iti teritoriayo, ti panagsarungkar isut’ makiddaw iti daydiay rumbeng a kongregasion. Ti mangidaulo a manangaywan iti kongregasionyo ti siraragsak a tumulong kadakayo iti daytoy a banag.
6 Pagayatan ni Jehova a maikkan ti oportunidad dagiti amin a dumngeg iti kinapudno. “Ket tunggal maysa a mawaw umay koma; ket ti mayat awatenna iti danum ti biag nga awan bayadna.” (Apoc. 22:17) No ikagumaantayo iti napasnek a panangsarak kadagiti amin a tattao, maipakita iti ayattayo kadagiti dadduma a kas ken Jehova.—Juan 3:16.