Panagtultuloy iti Awan Sardayna a Panangisuro
1 Saannatayo a pagduaduaen ti Biblia maipapan iti kita ti teritoria dagiti nagkauna a Kristiano a disipulo. Saan unay a nabayag kalpasan iti ipapatay ni Jesus, pinakdaaran ida dagiti autoridad a sardengandan ti “agsao wenno mangisuro” maipapan ken Jesus. (Ara. 4:18) Apay? Ti maysa a rason isu daydiay nakaskasdaaw a panagballigida iti dayta. Rinibo dagiti namati, kas impadamag ti Aramid 4:4: “Adu kadagiti dimngeg iti palawag ti namati, ket ti bilang dagiti lallaki ti agdagup iti lima a ribo.”
2 Agsipud ta nagtultuloytayo nga awan sardayna iti panangisuro, ginasut a ribo, wen, minilion dagiti namati kadagitoy aldawtayo. Kabayatan ti Abril addaantayo iti pribilehio a mangitukon iti suskripsion ti Pagwanawanan. Awan duadua a Ti Pagwanawanan ket addaan iti nasken a papel maipapan ti panangaramid kadagiti tattao a sipupuot iti espiritual a kasapulanda. Nangiturong daytoy iti ragsak dagiti adu, agsipud ta naadalda iti pagayatan ni Jehova.—Maidilig iti Mateo 5:3.
PANANGDANON ITI TUNGGAL MAYSA
3 Agpapan pay matrabaho a masansan dagiti teritoriatayo, kaskasdi a mabalintayo a makasao dagiti dadduma a tattao a bassit laeng ti gundawayda a dumngeg iti naimbag a damag. Kasano a kasta? Kadagiti teritoria a narigat a danonen iti panagbalaybalay a ministerio, apay a dikay gundawayan iti singasing a naaramid idi kombension ti distrito maipapan iti panangasaba babaen ti telepono, wenno babaen iti panagsurat? Wenno aramidenyo ti nagpaiduma a regta a makisao iti bumalay no mangasabakayo. Babaen ti panangidulin iti house-to-house record, mabalin a masarakantayo dagiti dadduma a miembro ti pamilia, kas iti maysa nga apong a baket wenno lakay, maysa a kaanakan wenno kasinsin a madama nga ageskuela, wenno maysa nga ipag nga agtartrabaho iti ngalay ti lawas. No nayonanyo ti reggetyo a makisao iti kada miembro ti pamilia pudno a magunggonaankayo.
4 Adu dagiti nagduduma a naimbag a pamuspusan tapno makagun-odkayo ti suskripsion iti daytoy a bulan. Mabalin a maawis dagiti estudianteyo ti Biblia ken dadduma nga interesado a tattao nga agsuskribe. Nalabit a maysa kadagiti estudiantetayo iti Biblia ti nagsuskriben iti maysa a magasina. Apay a dikay isingasing nga agsuskribe pay iti daydiay sabali? Mabalin a maparegta dagiti tunggal miembro ti pamilia nga agsuskribe iti Pagwanawanan tapno makasaganada amin a maipaay iti panagadal. Ti sabali pay a singasing isut’ panangpatanor kadagiti rota ti magasina a sarunuen iti panangitukon ti suskripsion kadagidiay mangipakita iti karkarna nga interes. Maitukon met iti panagadal ti Biblia kadagidiay mangipakita iti napudno nga interes.
PALAWAENYO TI MINISTERIOYO
5 Rinibribo dagiti agserbi nga auxiliary payunir kabayatan ti Abril. Maysakayo aya kadakuada? No kasta, maiplanoyo kadi nga idur-asyo ti panagpayunir agingga iti Mayo ken Hunio? Mabalinan aya ti intero a pamilia iti agpayunir kabayatan ti Mayo? No saan a makapayunir iti intero a pamilia, makapagtutunoskayo kadi a maysa wenno ad-adu kadagiti miembro ti pamilia iti makaaramid a kasta? No saan, posible aya a mapawadwad iti tiempoyo idiay tay-ak ti ministerio a mangitukon iti Pagwanawan ken Agriingkayo! a magasina, nga addaanda kadagiti espesial a suheto bayat ti Abril ken Mayo?
6 Ipategtayo unay dagiti espiritual a pagimbagan ken bendision a maawattayo manipud iti pinanid Ti Pagwanawanan. Ammotayo a dagiti nasingpet iti panagpuspusoda a tattao idiay teritoriatayo ti magunggonaan met a sibabaknang manipud iti regular a panagbasada kadagitoy a magasina. Bayat iti bulan ti Abril, nga agtultuloy agingga iti Mayo, itultuloytayo ti awan sardayna a panangisuro babaen kadagiti nasayaat nga instrumento nga impaay ni Jehova kadatayo. Babaen ti panangaramid iti dayta, apitentayo iti bendision ni Jehova a pakabendisionan met dagiti dadduma.—Gal. 6:9.