Danonen dagiti Puso Babaen kadagiti Epektibo a Panangyadal ti Biblia
1 Ni Jesus nakasarak iti ragsak iti panangaramidna ti pagayatan ni Amana, ken tinagiragsakna ti panangtulongna kadagiti dadduma nga agserbi met ken Jehova. (Sal. 40:8; Mat. 9:37, 38; 11:28-30) Kayattayo met a tulongan dagiti dadduma nga agserbi ken ni Jehova tapno magun-odanda ti biag. Maaramidantayo a sibaballigi daytoy babaen ti panangdanon kadagiti puso dagiti iyad-adalantayo ti Biblia. Ramanenna daytoy ti ad-adu pay ngem ti saludsod-ken-sungbat a diskusion iti maysa a publikasion. Tapno madanon ti puso, kasapulan ti panagsaganatayo a sipapanunot iti iyad-adalantayo.
2 Ni Jesus naaddaan ti personal nga interes kadagiti dadduma. Kinonsiderarna ti punto-de-vistada. Inusarna dagiti ilustrasion tapno nalaka a matarusan dagiti nauneg a tema. No dagiti dumdumngeg kenkuana ket dida maala ti kababagas ti isursurona, siaanus a nangiladawan ti aniaman nga ibagana. (Mat. 16:5-12) Ti nauneg nga interes ni Jesus kadagiti dadduma rebbeng a tignayennatayo a mangaramid iti isu met laeng kadagiti iyad-adalantayo ti Biblia.
ITAMPOK TI BIBLIA
3 Aniat’ nakatulong kadagiti adu a mangawat a sibubulos iti mensahe a naited kadakuada? Maigapu ta daydiay mensahe nga inawatda ket naggapu iti Biblia a Saot’ Dios. Wen, ti saot’ Dios danonenna dagiti puso. (Heb. 4:12) Tulongan ti iyad-adalan a mangkita no apay a ti maysa a kurso ket masirib wenno minamaag. Makirinnason kenkuana no kasano a ti panagtulnog kadagiti bilin ti Dios mangited ti paglainganna.—Kitaenyo Ti Pagwanawanan, Pebrero 1, 1985, pinanid 15-16.
4 Adu nga agibumbunannag nasarakanda a ti panangusar iti Panakirinnason a libro ket epektibo la unay iti panangitampok iti Biblia. Kas pangarigan, no ad-adalen ti panid 124, parapo 13, iti libro nga Agbiag nga Agnanayon, ti material iti pinanid 167 ken 168 iti libro a Panakirinnason iti sidong ti “Apay a matmatay dagiti maladaga?” mabalin a mausar a mangipaganetget iti interes ni Jehova a mangipreserbar iti urnos ti pamilia. Daytoy nga impormasion mabalin a kumbinsirenna daydiay tao maipapan ti ayat ni Jehova iti sangatauan.
AGSALUDSOD
5 Ti epektibo a panangusar kadagiti saludsod tinulonganna ni Jesus a nanggutugot kadagiti tattao nga agpanunot ket agrason. (Mat. 17:24-27) Dagiti sungbat ti iyad-adalan mabalin a tulongannatayo a mangammo no ania ti maad-adalna agraman kadagiti di nainkasuratan a panangmatmat nga ik-ikutanna pay laeng. Mabalin a ti iyad-adalan lablabananna pay laeng iti ugali a panagtabako. Ti panangadal ti material iti kapitulo 27 ti libro nga Agbiag nga Agnanayon ti mabalin a nangtulong kenkuanan a mangkita a masapul nga isardeng ti panagtabako. Nupay kasta, talaga kadi a nakumbinsiren a masapul nga isardeng dayta? Mabalin a kunaem: “Ania ti maikunam ditoy? No bilang agsardengkan ita ngem sumagmamano kadagiti gagayyemmo ket umsiendaka. Ania ngay ti aramidem?”
6 Uray no kasta, masapul ti agannad. No maminsan dagiti kakasta a saludsod mabalin a mangiyegdat’ sungbat a mangdismaya kenka. Ania ngaruden? No sensitibo daydiay tema a pagsasaritaanyo, nasaysayaat siguro a saan nga ipilit ti isyu ngem kunaem: “Bay-an ta pay laeng daytoy a tema. Subliantanto daytoy no madamdama.” Wenno, “Bueno, maysa a banag daytoy a pagpampanunotan, saan kadi?” No ti iyad-adalan ket napigsa ti riknana maipapan iti daydiay a banag, mabalin nga isaganam ti impormasion nga mangtulong kenkuana a mangaramid iti ad-adu pay a panagrang-ay. Ganetgetantayo a tignayen ti puso ti maysa a tao ken ikararag ken Jehova a tulonganna a rumang-ay iti naespirituan.—1 Cor. 3:5-9.
7 No mangikonkondukta iti panangyadal ti Biblia, kanayon a laglagipenyo ti mangala ti umdas a tiempo a makirinnason iti iyad-adalan iti material a maad-adal. Ibagay dagiti metodo ti panangisuroyo tapno maitunos kadagiti partikular a kasapulanna. Ipamuspusan nga ikabil idiay pusona ti nauneg nga ayat ken panagraem ken ni Jehova, iti Biblia, ken ti organisasion ni Jehova.—Ara. 2:41-46.