Panangpatanor kadagiti Nasinged a Relasion ti Pamilia
1 Gaput’ kinaadu ti mangsinga ti panawenda, dagiti nagannak naipasangoda iti karit ti panangpatanor ti pamilia a nairamut iti pudno a panagdayaw. Dagiti Kristiano a pamilia kasapulanda ti nadekket a singgalut a makatulong kabayatan dagitoy a napeggad a panawen. (Ecl. 4:9-12; 2 Tim. 3:1-5) Kabayatan a maparang-ay ti espiritualidad ti pamilia mapabileg.
PANANGPATANOR KADAGITI NAESPIRITUAN A KALIDAD
2 Dagiti miting ti kongregasion ken ti panagadal ti Biblia iti uneg ti pamilia ket kasapulan unay iti linawas nga eskediol ti pamilia. (Deut. 6:6, 7; Heb. 10:23-25; wIL86 11/1 pp. 23-5) Nupay kasta, ad-adu pay ti kasapulan. Ti makaay-ayo a relasion ti pamilia ket mabukel no dagiti nagannak adda pudno nga interesda iti espiritual a paglaingan dagiti annakda. Idiay Israel, dagiti nagannak responsableda iti edukasion ken panangsanay kadagiti annakda, a suruanda ida babaen ti sao ken ulidan. Ti programa ti edukasion ti Israel inramanna ti praktikal a panagsanay para ti biag ti nataengan, panangisuro kadagiti pamunganayan ti panagbasa ken panagsurat, ken instruksion ti panangpatanor kadagiti naespirituan a kalidad. Iti panangisuro kadagiti annak, ti panangipaganetget naikabil iti panangisuro kadakuada ti panagbuteng ken ni Jehova, ti Linteg, panagraem kadagiti nagannak ken dagiti nataengan a tattao, ken ti kinapateg ti panagtulnog.
3 Dagiti nagannak rebbeng a pagreggetandat’ maaddaan ti de-kalidad a panawen a kadua ti pamiliada tunggal aldaw. Dagiti naespirituan a bambanag mabalin a mapagsasaritaan iti impormal a kasasaad, a kas kadagiti tiempo ti pannangan tapno maparang-ay dagiti kasapulan a kalidad kadagiti annak tapno maliklikanda dagiti silo ti lubong!—1 Cor. 3:10-15.
PANANGTAGIRAGSAK TI TRABAHO IDIAY TAY-AK TI SERBISIO
4 Ti rag-o ket maysa nga emosion a parparayrayen ti panangsegga. No ti maysa ket nakasagana a rummuar idiay tay-ak, umiso laeng a seggaanna dagiti nasayaat a bunga. Ngarud, ti panagsagana isut’ tulbek ti naragsak a panangasaba. Ti regular a panagpraktis no ania ti isao kas maysa a pamilia sakbay a rummuar idiay tay-ak ti serbisio ket mangpatibker ti panagtalek.—Idiligyo ti Tito 3:1b.
5 Babaen ti pannakipagtrabaho kadagiti annakda iti ministerio, dagiti nagannak matulonganda dagiti annakda a mangparang-ay ti personal nga interes kadagiti tattao kas ti inyulidan da Jehova ken ni Jesus. Ti ministerio tulongannatayo met a mangpatanor ti nadekket a relasion ken ni Jehova. (wIL82 5/1 pp. 15-23) Dadduma a pamilia iyeskediolda ti panagkakaduada iti intero nga aldaw, nga iplanoda ti makaay-ayo a panaglinglingay kalpasan ti panangasaba. Daytoy ti mangiwaya ti panawen para iti panagpapatangda buyogen ti atmospera a naragsak ken pasingedenna dagiti nagannak kadagiti annakda.
6 Determinado kay koma a mangpatanor kadagiti kasapulan nga abilidad ti komunikasion tapno agtalinaed ti nadekket a relasionyo kadagiti annakyo. Dikay palubosan ti aniaman a manglapped kadakayo a mangala ti kasapulan a tiempo tapno mapabileg ti espiritualidad ti pamiliayo.—Sal. 127:1; Prov. 24:3.