Ti Pagwanawanan—Espiritual a Taraon iti Umiso a Tiempo
1 Iti agarupen a 114 a tawtawen, binagbagaan Ti Pagwanawanan dagiti managbasana nga agridamda iti naespirituan. Matalek daytoy a publikasion kas maysa nga instrumento a manglawag ti danatayo iti daytoy nasipngetan a lubong. (Isa. 60:2) Ti kinapudno iti Sao ti Dios saan a pulos nga agbaliw, ngem ti pannakaawattayo iti dayta ti lumawlawag bayat nga usaren daytoy ni Jehova ken dagiti dadduma nga instrumento a mangted kadatayo iti espiritual a “taraon iti umiso a tiempo.”—Mat. 24:45; Prov. 4:18.
2 Usarenyo ti Kasayaatan Dagiti Magasina: Mabalintayo nga idemostra ti panagyamantayo a maipaay iti espiritual a pannakalawag a naawattayo babaen ti narayray a pammaregta kadagiti tattao a bumasa iti Ti Pagwanawanan. Masansan, adu dagiti tattao ti agkedked nga agsuskribe iti damo a sarungkar ti panagbalaybalay a trabaho wenno impormal a panangasaba. Ngem adu dagiti regular a mangala iti sinaggaysa a kopia dagiti magasina ken nabatad a pagragsakanda a basaen. Dagitoy a tattao ti mabalin a mangipateg iti gundaway nga umawat ti suskripsion. Kaykayat iti dadduma ti mangpadas pay a mangala iti magasina nga umuna, ket kalpasanna agsublikayo a mangitukon ti suskripsion no agminar iti interesda.
3 Kasanoyo a matingiting no adda napudno nga interes nupay ti bumalay ket saan nga agsuskribe iti umuna a dupag? Bayat nga iparangyo ti maysa wenno dua a puntos iti magasina, siputanyo ti tignay iti bumalay. Sititimud aya ti panagimdengna? Raemenna kadi ti Biblia ken surotenna iti pannakabasa ti teksto? Sumungbat aya kadagiti saludsodyo? No kasta, mabalinyo nga iyurnos ti panagsarungkar iti las-ud ti lawas tapno pagragsakanyo iti dayta a tiempo ti kanayonan a diskusion. Iti saan nga agbayag mabalin nga umannugotton nga agsuskribe tapno umawat a regular kadagiti magasina.
4 Dagiti baro a magasina ti masapul a maalan dagiti agibumbunannag apaman a makagteng iti kongregasion. No makaawatkayo iti baro a ruar, kabisaduenyo dayta. Ania dagiti suheto a pakaseknan unay dagiti tattao a lumugar? Talna ken talged ti lubong? Ti ekonomia? Naimbag a gobierno? Ti arubayan? Kangrunaan, iturong Ti Pagwanawanan dagiti tattao iti kakaisuna a permanente a solusion, ti Pagarian iti Dios. (Dan. 2:44; Mat. 6:10) Pudno unay daytoy a di mabaloran a sagut manipud iti “Naindaklan nga Instruktor.”—Isa. 30:20.
5 Itukon ti Mayo iti nagpaiduma a gundaway a mangipaay ti nawadwad a tiempo iti tay-ak ti serbisio. Agsipud ta addaan ti lima a ngudo dagiti lawas, adu dagiti agpalista nga auxiliary payunir. Agtrabahotayo koma amin a sipipinget ken sirarayray a mangparegta ti tunggal maysa a masabet iti Mayo a basaenda Ti Pagwanawanan ken Agriingkayo! tapno maaddaanda ti espiritual a taraon iti umiso a tiempo.