Isinggalut Dagiti Tract iti Dadduma a Literatura
1 Kadagiti amin a magasina a maimalmaldit ita, dagiti laeng Ti Pagwanawanan ken Agriingkayo! ti makatulong kadagiti napudno a managbasa a mangsarak iti dana nga agturong ti biag. Bayat a makisaokayo kadagiti tattao iti Mayo, ipakitayo kadakuada dagiti kaudian a magasina wenno ti maysa kadagiti broshur iti Sosiedad. Adda dadduma nga ipakitada ti bassit nga interes iti damo. Iti kasta a kaso, umuna nga ilawlawagyo ti maysa wenno dua a punto iti tract; kalpasanna no ti bumalay ipakitana iti kanayonan nga interes, isinggalut ti tract iti magasina wenno broshur a dakamatenyo.
2 Mabalinyo a kunaen:
◼ “Kaaduan a tattao ti kumanunong nga iti agdama a lubong, ad-adu ti problema ngem iti solusion. Ammoyo kadi nga adu kadagiti kakaruan a problematayo ket naipadtoda iti Biblia?” Kalpasanna mabalinyo nga iturong idiay pinanid 4 ken 5 iti tract a Daytoy Kadi a Lubong Makalasatto? ken ilawlawag dagiti dadduma a problema.
3 No iparangyo ti Mayo 1 a Pagwanawanan ket ipamatmat iti bumalay ti interes idiay nabasayo manipud iti tract, mabalinyo nga iturong idiay artikulo nga “Pannakaisalakan iti Pannakaiparangarang ni Jesu-Kristo” ken mailawlawag no kasano a solbaren ni Kristo Jesus dagiti amin a problema ti tao. Wenno, no usarenyo ti Mayo 15 a ruar mabalinyo nga usaren iti artikulo a “Kasano Kinamapagtalkan dagiti Padto ti Biblia?”
4 No ti Mayo 8 nga “Agriingkayo!” iti ilawlawagyo, mabalinyo nga usaren ti introduksion a naiwayat iti parapo 2 daytoy nga artikulo ken inayonyo:
◼ “Adu dagiti agduadua no ti relihion a maidanggay iti siensia ket isu ti sungbat.” Kalpasanna basaen ti maitutop a punto iti artikulo a “Relihion ken Siensia—Nakapuy a Panaglaok.”
5 No aramatenyo ti “Adtoy!” a broshur, mabalinyo nga usaren iti sabali nga idudupag:
◼ “Adu a tattao iti agduadua no ania ti mapasamak kadatayo no mataytayo. Kuna dagiti dadduma a mapantayo idiay langit wenno impierno; saan a masigurado dagiti dadduma. Ti sungbat iti Biblia isut’ makapnek.” Kalpasanna ilawlawagyo dagiti benneg ti tract nga Ania’t Namnama Kadagiti Ing-ingungoten a Natayen? Maitultuloyyo babaen ti ipapanyo iti pinanid 16 ken 17 iti broshur no ipakita ti bumalay iti interes.
6 Adu ti nagballigi a nangusar iti tract a Biag iti Maysa a Natalna a Baro a Lubong. Mabalinyo a saludsoden iti bumalay no ragsakenna ti agbiag iti sidong ti kasasaad a nailadawan iti tract. Kalpasan a makasungbat, ilawlawagyo no kasano nga umay ti kasta a natalna a baro a lubong. Kalpasanna usarenyo ti Mayo 1 a Pagwanawanan iti wagas a naisingasing idiay parapo 3 daytoy nga artikulo.
7 No maysakayo nga agdadamo kas agibumbunannag, awan duadua a patgenyo ti nalaka nga iyaasideg. Apay a dikay mangala ti abastoyo a tract a Daytoy Kadi a Lubong Makalasatto? ket surotenyo dagiti singasing a naiwayat ditoy ngato iti parapo 2?
8 Mapadayawantayo a mangyeg iti mensahe ti pannakaisalakan iti pagtaengan dagiti tattao. Iti panangbiruktayo ‘kadagiti maikari,’ sayaatentayo nga usaren dagiti tract ken isinggalut ida iti dadduma a literatura no adda masarakan nga interes.—Mat. 10:13.