Ti Pagwanawanan ken Agriingkayo!—Pagiwarnak ti Kinapudno
1 Ti Enero 1, 1994, a ruar Ti Pagwanawanan, panid 22, ipalagipna kadatayo a dagiti magasintayo iwarnakda dagiti “naintiempuan nga artikulo a mangusig kadagiti napaypayso a kasapulan dagiti tattao.” Bayat ti Abril ken Mayo, dakamatentayo dagitoy a magasin kadagiti amin a masabettayo.
2 Ti panagbalaybalay a trabaho mangted iti kasayaatan nga oportunidad a mangipaima kadagiti magasin. Ti epektibo nga impormal a panangasaba, panagtrabaho iti kalsada, ken lugar ti negosio a teritoria ket ekselenteda a wagas a mangpaadu ti maiwaras.
3 Dagiti Suheto a Pagsasaritaan: Ti Abril 1 a ruar iti Pagwanawanan ipausigna dagiti suheto a “Ti Nasaysayaat a Lubong—Maysa Laeng Aya a Tagtagainep?” ken “Ti Nasaysayaat a Lubong—Asidegen!” Sigurado a maitunos daytoy iti panggep ti magasin a mangiyanunsio iti Pagarian ti Dios. Ti maikadua nga artikulo ipakitana no kasano a ti paraiso ket pumudno iti sidong ti panagturay ni Kristo.—Luc. 23:43.
4 “Sadino ti Pakasarakanyo iti Mapagtalkan a Giya?” isut’ saludsod a nailawlawag iti Abril 15 a ruar. Dagiti ruar ti Mayo mangibinsabinsa iti daytoy a suheto kadagiti artikulo a “Maipaay Aya ti Relihion Dagiti Kasapulanyo?” ken “Apay a Rumbeng a Basaenyo ti Biblia?” Mabaelantayo nga irugi ti saritaan a silalaka kadagiti tattao a makarikna nga awan panggep ti biagda.
5 Panangpaadu ti Maipaima: Ti Enero 1 a ruar itukonna dagiti uppat a singasing iti panangpaadu ti maipaima. Maparegtatayo nga (1) agbalin a sipapanunot iti magasin. No basaentayo a mismo, mapanunot no ania nga artikulo ti makaallukoy kadagiti tattao idiay teritoriatayo. Kasta met, no regulartayo a mangitugot kadagiti kopia, mabalin a maipaima kadagiti katrabaho, kaarruba, maestro ken maestra, kaeskuela, wenno managgatang.
6 Mapalagipantayo a (2) mangpalaka ti panangiparangtayo. Pilien ti maysa a makapainteres a punto, ket sawen dayta iti sumagmamano laeng a balikas. No maipaimayo ti magasin, makaammon nga “agsao” kadagiti tattao idiay balayda.
7 Ti sabali a kasapulan isut’ (3) panagbalin a manangibagay. Nasayaat no addaantayo ti nagduduma nga artikulo iti panunot a mapagsaritaan—maysa ti agpaay iti agtutubo, sabali ti agpaay iti lallaki, ken adda met agpaay iti babbai.
8 Kamaudiananna, kasapulanyo ti (4) mangituding ti personal a kalat a maipaima. Bayat a ti kongregasion ket saanna a maituyang ti masinunuo a kota, tunggal maysa kadatayo ti mangeddeng a maipaay iti bagina. Tumulong daytoy kadatayo nga agbalin a narayray a mangitukon kadagiti magasin.
9 Kayattayo a dagiti dadduma ket maammuanda ti maipapan iti Pagarian ti Dios. Naan-anay a gundawayanyo dagiti magasin a mangiwaragawag iti damag ti Pagarian.—Mat. 10:7.