Itukon Dagiti Kasayaatan a Magasin Ditoy Lubong
1 Ti naibaga a panggep Ti Pagwanawanan isut’ “panangitan-ok ken Jehova a Dios kas Soberano nga Apo ti uniberso.” Ti Agriingkayo! isut’ “agpaay a pakalawlawagan ti intero a pamilia. . . . Pabpabilgen daytoy a magasin ti panagtalek iti kari ti Namarsua maipaay iti natalna ken natalged a baro a lubong.”
2 Aramaten dagitoy a magasin iti ministeriotayo bayat ti Abril ken Mayo. Tapno epektibo, masapul a basaen ti kada ruar, a siputan dagiti puntos a mausar no itukontayo ida. Padasenyo a panunoten ti maysa a banag a sawen a mangsagid iti puso dagiti tattao ken mangtignay kadakuada a mangadal pay ti ad-adu.
3 Panangilawlawag iti Abril 1 a Ruar: Kaaduan a tattao ti aggagar a maipaay iti nasaysayaat a lubong, maysa nga awanen dagiti adu a problema a kas ita a mangagaw iti rag-oda.
Kalpasan a maiyam-ammo ti bagitayo, mabalintayo a kunaen:
◼ “Kayatko nga ipakita kadakayo ti maysa a komento a naaramid ditoy artikulo a ‘Ti Nasaysayaat a Lubong—Maysa Laeng Aya a Tagtagainep?’ Kunaenna: ‘Awan duadua a di makaay-ayo a lugar daytoy a lubong, ti lubongtayo. . . . Kasla awan pagpatinggaan ti listaan dagiti dakes a kasasaad iti agdama.’ Ipakitak kadakayo, nupay kasta, no ania ti makuna ti Salmo 37:11 maipapan iti masakbayan.” No napabur ti sungbat ti bumalay, iturong iti artikulo a “Ti Nasaysayaat a Lubong—Asidegen!,” panid 4, ken kunaen: “Adda sumagmamano a teksto ti kasuratan a naisitar, agraman daydiay kabasbasatayo manipud Salmo 37:11. Patiek a pagragsakanyo a basaen dagitoy nga artikulo. Tagiragsakek ti mangibati kadagitoy kadakayo.” No maiparbeng, madakamat iti suskripsion tapno umawatda a regular kadagiti kakasta nga artikulo.
4 Panangilawlawag iti Abril 15 a Ruar: Ti artikulo iti panid 4 isaludsodna: “Sadino ti Pakasarakanyo iti Mapagtalkan a Giya?”
Kalpasan a maiyam-ammoyo ti bagiyo, mabalinyo a kunaen:
◼ “Nagadu dagiti problema ditoy lubong ita, kas iti [madakamat dagiti banag a pakaseknan ti komunidad wenno paulo dagiti pagiwarnak]. Pagduaduaennatayo no adda pay pamuspusan kadagitoy a problema. Makaparagsak, ipasigurado ti 2 Timoteo 3:16, 17 kadatayo a ti Biblia isut’ giya nga agturong iti natalged a dana ti biag. Babaen ti panagsuskribe Ti Pagwanawanan makaawatkayo iti daytoy a giya a regular.”
5 No mas kayatyo a dakamaten ti Agriingkayo!, mabalinyo nga usaren ti Mayo 8 a ruar ken ti artikulo a “Pudpudno a Masakbayan Dagiti Ubbing.” Kaaduan kadagiti nagannak ti masagid babaen dagiti kasapulan ti annak ken kayatda nga ammuen no ania ti maaramid a makatulong kadakuada.
6 No narayraytayo maipapan kadagiti magasin, ti kasayaatan ditoy lubong, sipupuottayo a mangipaima kadakuada iti sabsabali tapno itan-okda met ni Jehova kas Soberano nga Apo iti uniberso.—Sal. 83:18.